Në vitin 2024 u regjistruan 177 aksidente të punë të raportuara nga Inspektorati Shtetëror i Punës dhe Shërbimeve Shoqërore.

Të paktën 33 persona kanë humbur jetën nga këto aksidente. Të dhënat zyrtare të institucionit tregojnë se dy sektorët më problematikë vijojnë të mbeten ndërtimi dhe minierat.

“Sektori i ndërtimit mbetet më i rrezikuari me 24% të aksidenteve, duke reflektuar zhvillimin e shpejtë të këtij sektori me 1,019 kantiere leje ndërtimi të lëshuara në vitin 2024″,– sipas INSTAT.

Pavarësisht kontrolleve intensive nga ISHPSHSH, aksidentet në këtë sektor vazhdojnë të jenë një sfidë. Është e domosdoshme forcimi i sistemeve të sigurisë dhe shëndetit në nivel ndërmarrjeje, veçanërisht për rolin e Koordinatorit të Sigurisë dhe ndërgjegjësimin e punëdhënësve për zbatimin korrekt të ligjit.

Sektori “Miniera-Kariera” përfaqëson 18% të aksidenteve, duke mbetur një nga sektorët me risk shumë të lartë. Inspektimet në nëntokë janë kompetencë e AKSEM, me të cilin ISHPSHSH bashkëpunon për trajtimin e aksidenteve në këtë sektor” thuhet në raportin vjetor 2024 të Inspektoratit.

Të paktën 90% e aksidenteve janë raportuar nga punëdhënësit, një rritje prej 2.4% krahasuar me vitin e kaluar, që sipas institucionit tregon një ndërgjegjësim më të lartë për deklarimin e ngjarjeve.

Sipas raportit në vitin 2024, është vënë re një rritje e përqindjes së subjekteve që disponojnë “Dokument Vlerësim Risku”, kanë emëruar Koordinatorin e Sigurisë dhe Shëndetit në Punë, krijuar Këshillat e Sigurisë dhe Shëndetit në Punë dhe kanë angazhuar Mjekun e Ndërmarrjes.

Në vitin 2024 u inspektuan në total nga ana e Inspektoratit 190,340 vende pune në 9,860 subjekte me rritje në masën 22% të total inspektimeve të realizuara krahasuar me vitin paraardhës./Monitor

Shkurti i këtij viti ka shënuar sërish rritje të aksidenteve në raport me shkurtin e një viti më parë. Të dhënat zyrtare të publikuara nga Instituti i Statistikave treguan se në muajin e dytë të vitit aksidentet ishin 108 me një rritje 22.7 për qind në raport me të njëjtin muaj të vitit të shkuar. Ndërkohë që të dy muajt janar dhe shkurt sëbashku kanë regjistruar një shifër prej 270 aksidentesh me një rritje prej 57  për qind në raport me të njëjtën periudhë të 2023-it.

“Në muajin Shkurt 2024 numërohen 108 aksidente rrugore. Numri i të aksidentuarve (të vrarë dhe të plagosur) rezulton 149 persona në muajin Shkurt 2024” vlerëson INSTAT.

Sa i takon atyre që kanë shkaktuar aksidentin të dhënat zyrtare konfirmojnë se problematikë vijon të mbetet sjellja e shoferëve në timon ndërkohë që grupmosha problematike gjatë shkurtit ka qenë ajo 45-59 vjeç.