Trajneri i Shqipërisë U-21, Alban Bushi, ka publikuar një mesazh të ndjerë, pasi humbi dy prindërit, në një aksident në Greqi.

Ne mesazhin e tij, Bushi shkruan se vdekja për shkaqe natyrale është e dhimbshme, por kur ajo vjen për shkak të një aksidenti, është ulëritëse.

“Mënyra për ta pranuar një humbje është e lidhur me mënyrën se si ka ardhur. Një vdekje e ardhur nga shkaqe natyrale është e dhimbshme, por është ulëritëse kur vjen për shkak të një aksidenti.

Nuk di sa forcë duhet për të përballuar veten që rri para jush, si dëshmitar i pafuqisë ekstreme për të ndryshuar atë ç’ ka ndodhur. Madje dhe kur fatmirësisht vjen një kujtim i mirë, s’ke fuqi as për britmë lumturie, por zëvendëson një palë lot me të tjerë.

Sot dhimbshëm mora orat që kane punuar në pulsat e zemrave tuaja, aq me formë dhe vlerë në orë të pafundme pa formë që kur ai aksident, me një përplasje ju hoqi fillin e jetës. Deri në përqafimet tona të ardhshme, ju dua pafundësisht, përjetësisht dhe përtej”, shkruan ndër të tjera Alban Bushi.

Dy prindërit e trajnerit, Ali (75 vjeç) dhe Bukurije Bushi (71 vjeç), humbën jetën pas një aksidenti të rëndë në rrugën “Egnatia” në aksin Veria-Selanik. Automjeti me të cilin ata po udhëtonin, u përplas nga një fugon, duke iu marrë jetën.

Kanë humbur jetën në një aksident tragjik prindërit e trajnerit të Kombëtares “U-21″, Alban Bushi.

Ngjarja ka ndodhur në rrugën “Egnatia”, në aksin Veria – Selanik, pranë Kouloura Imathias.

Furgoni me targa P”MX-8942” i drejtuar nga 47-vjecari grek Marios Simitliotis është përplasur me automjetin tip “Mercedes-Benz” me targa shqiptare “AB 454 GF” që drejtohej nga 75-vjecari shqiptar Ali Bushi.

Si pasojë e përplasjes kanë humbur jetën 75-vjecari Ali Bushi dhe pasagjerja 71-vjecare Bukurije Bushi. I plagosur lehtë ka mbetur edhe shtetasi grek, i cili është arrestuar nga policia.

Ali dhe Bukurije Bushi janë prindërit e trajnerit të kombëtares “U-21” dhe ish-futbollistit Alban Bushi.