Dhurata Çupi, deputete e PD-së, tha se kjo parti ka kryetar Sali Berishën dhe në dijeninë e saj nuk ka asnjë garë të hapur për të zgjedhur kryetar të ri.

Çupi u shpreh se nuk do të ketë zgjedhje të brendshme në PD për postin e kryetarit përpara zgjedhjeve të 2025-ës.

E pyetur lidhur me mundësinë që drejtimin e kësaj partie ta marrë Argita Malltezi apo emra të tjera, Çupi tha se PD sot e ka kryetarin, është Sali Berisha, dhe nuk mendoj se do të kemi zgjedhje përpara 2025-ës. “Sot nuk kemi shpallur zgjedhje për Kryetar të PD-së, sot kemi kryetar Sali Berishën.

Kur të hapet gara mund të kandidojnë shumë emra, PD nuk funksionon mbi bazën e thashethemeve, dhe si anëtare e Kryesisë së PD-së mund t’ju them se nuk kemi vend të lirë për postin e Kryetarit të partisë”, tha Çupi.

Ish-kandidati për kryetar në Bashkinë e Tiranës, Belind Këlliçi është shprehur se nuk është kundër kandidimit të Argita Malltezit si kryetare e PD-së.

Ai theksoi se fakti që është e bija e Sali Berishës,  nuk i jep avantazh zonjës Malltezi që të jetë në krye të opozitës.

“Unë do isha dakord që lider i PD-së të bëhet kushdo që futet në garë dhe merr mbështetjen e demokratëve, ka platformën e vet dhe merr mbështetjen e shumicës në PD. Pak më intereson emri. Zonja Malltezi këto ditë kemi parë që ka pasur reagime. Ka ardhur për herë të parë në Kuvendin e PD që ka mbajtur një fjalim. Jo vetëm zonja Malltezi po kushdo që do donte të merrte lidershipin e PD do të duhet të marrë mbështetjen e shumicës. Argitën nuk e avantazhin fakti që është e bija e Sali Berishës”-tha ai.