Një aksident i rëndë është regjistruar në afërsi të fshatit Rëmbec, në Maliq.

Sipas informacioneve paraprake, një mjet ka përplasur një bari, i cili ka marrë lëndime në trup. Përveç bariut, i cili ndodhet nën kujdes mjekësor, aksidenti ka shkaktuar dëme edhe në tufën e tij të deleve, ku 3 nga kafshët janë goditur nga automjeti.

Drejtuesi i mjetit është larguar menjëherë nga vendi i ngjarjes pas aksidentit, duke e lënë pas të plagosurin.

Policia ka mbërritur në vendin e ngjarjes dhe ka nisur hetimet për zbardhjen e rrethanave të aksidentit, si dhe për identifikimin dhe kapjen e shoferit të arratisur.