Minesota- Autori u trokiti në derë si oficer policie, dinamika e atentatit ndaj dy politikanëve në Minnesota. Trump: Dhuna nuk do të tolerohet

Detaje të reja për atentatin e rëndë të ndodhur në Minnesota të Shteteve të Bashkuara, ku mbeti e vdekur deputetja demokrate Melissa Hortman dhe bashkëshorti i saj Mark.

Të plagosur rëndë mbetën senatori John Hoffman dhe bashkëshortja e tij.

Teksa ende nuk është kapur autori, autoritetet thonë se i dyshuari kishte parkuar makinën e tij para banesës së secilit prej tyre dhe kishte trokitur në derë i veshur me jelek, armë zjarri dhe një distinktiv të ngjashëm me atë të oficerëve.

Edhe automjeti ishte i ngjashëm me të policisë…

 Pasi ka qëlluar në drejtim të tyre, ka pasur një shkëmbim zjarri edhe me forcat e policisë lokale.

Teksa vijojnë kërkimet për identifikimin dhe kapjen e tij, Guvernatori Tim Walz u ka bërë thirrje njerëzve të mos marrin pjesë në asnjë tubim politik.

“Si masë, Departamenti im i Sigurisë Publike po rekomandon që njerëzit të mos marrin pjesë në asnjë tubim politik sot në Minnesota derisa i dyshuari të kapet”, ka thënë ai.

Pas ngjarjeve të rënda ka reaguar edhe presidenti i SHBA-së, Donald Trump, i cili tha se ishte informuar për të shtënat në Minesota dhe siguroi se një dhunë e tillë e tmerrshme nuk do të tolerohet.

“Jam informuar për të shtënat e tmerrshme që ndodhën në Minnesota, të cilat duket të jenë një sulm i synuar kundër ligjvënësve të shtetit. Prokurorja jonë e Përgjithshme, Pam Bondi, dhe FBI-ja po hetojnë situatën dhe do të ndjekin penalisht këdo që është i përfshirë me të gjitha fuqitë ligjore. Një dhunë kaq e tmerrshme nuk do të tolerohet në Shtetet e Bashkuara të Amerikës. Zoti i bekoftë njerëzit e mëdhenj të Minnesotës, një vend vërtet i mrekullueshëm!”, thuhet në reagim.

Detaje të reja janë zbardhur nga krimi në familje në Metoq të Sarandës. 49-vjeçarja E.T ka pranuar se ka vrarë bashkëshortin e saj Ll.T.

Rreth orës 08.00 të mëngjesit të ditës së djeshme, vajza që ishte në shtëpi, kur u ngrit nga gjumi, gjeti babanë e saj të pajetë në shtratin e tij.

Ajo kërkoi nëpër shtëpi për nënën e saj dhe e gjeti atë te dera e jashtme e shtëpisë.

Vajza mori në telefon motrën e saj, e cila është martuar edhe ajo në Metoq dhe i tregoi çfarë kish ndodhur. Kanë qenë këto të dyja që kanë njoftuar edhe policinë.

Sipas një komshiu të lagjes, 49-vjeçarja kishte rreth orës 04.00 të mëngjesit që rrinte jashtë tek dera.

“Unë, ka thënë ai, u ngrita për të shkuar tek shtëpia e babait tim që ishte i sëmurë dhe e pashë atë që rrinte tek dera dhe nuk reagoi fare kur kalova. U habita, po nuk më shkoi në mend se çfarë mund të kish ndodhur”.

Një gjykatë në Zelandën e Re ka hedhur poshtë padinë e një gruaje kundër ish-bashkëshortit të saj pasi ai nuk arriti ta çonte atë në aeroport, duke e bërë atë të humbasë një fluturim për në një koncert me miqtë, raporton BBC.

Ajo akuzoi partnerin e saj të atëhershëm se kishte thyer një “marrëveshje verbale” në të cilën ai pranoi ta çonte në aeroport, të qëndronte në shtëpinë e saj dhe të kujdesej për qentë e saj. Sipas dokumentit ligjor,gruaja tha se i kërkoi partnerit të saj që ta merrte në shtëpi dhe ta çonte në aeroport midis orës 10 dhe 10:15.

Ai nuk e bëri, i tha ajo Gjykatës së Mosmarrëveshjeve në Zelandën e Re, e cila merret me pretendime të vogla deri në 30,000 dollarë NZ, ose rreth 17,000 euro. Si rezultat, ajo humbi fluturimin e saj dhe iu desh të paguante kosto shtesë, duke përfshirë udhëtimin e ditës tjetër dhe rrugëtimin e qenve.

Dokumenti përshkruan gjithashtu shqetësimet me të cilat ajo u përball, si kostot e transportit deri në aeroport. Çifti kishte qenë në një lidhje për gjashtë vite e gjysmë para këtij sherri.

Gjyqtari përcaktoi se “natyra e premtimit është pjesë e dhënies dhe marrjes së zakonshme në një marrëdhënie intime” dhe se si e tillë nuk ka elementë të një kontrate.

Vendimi i gjykatës u mor në mars, por u shpall vetëm këtë javë.