TIRANË- Aktori dhe prezantuesi Florjan Binaj ka shpallur ditën e sotme kandidaturën për kryetar bashkie të Tiranës. Me ana të një postimi në Facebook, Binaj shkruan se ka ardhur koha që të gjithë qytetarët të bashkohen.

Me mbi dy dekada përfshirje aktive në çështje me interes kombëtar, ai vjen si një alternativë e pavarur, larg partive politike, me synimin për ta kthyer bashkinë në një institucion në shërbim të qytetarëve, jo të partive.

Binaj shpreson që të gjitha partitë politike që duan vërtet ndryshimin, pavarësisht ngjyrave, të bashkohen me këtë nismë. Me një thirrje për unitet, ai fton të majtë, të djathtë dhe gjithë spektrin shoqëror që të bashkohen për një ndryshim real.

Postimi i plotë:

Të dashur mikesha dhe miq, qytetarë të ndershëm punëshumë e fjalëpakë të kryeqytetit të Shqipërisë. Si një artist i përfshirë në çështje publike me interes Kombëtar prej 22 vitesh, si një kryefamiljar, i rritur në një kryeqytet i cili ka shkatërruar shumëçka në emër të zhvillimit dhe që shumë pak gjëra kanë mbetur ende pa u bërë ish, nisur nga nevoja e menjëhershme për të pasur në drejtim të kryeqytetit një figurë e cila nuk është gjymtyrë e asnjë partie pasi e kemi parë në 34 vite që kjo mënyrë jo e drejtpërdrejtë nuk ka qënë frytëdhënëse në përmirësimin e cilësisë së jetës tonë. Na duhet një drejtues qytetar i zgjedhur nga qytetarët për qytetarët sepse asnjë nga ne nuk mund të presë më edhe 34 vite të tjera.

Prandaj kam vendosur, të shpall kandidaturën time për Kryetar Bashkie të Tiranës duke dhënë gjithë veten time për të përfaqsuar sa më denjësisht çdo qytetare dhe qytetar, me apo pa parti, elektoratin gri por pa i ndarë njerëzit në krahë, por si të barabartë, sepse asnjë qytet dhe aq më tepër kryeqyteti, nuk mund ti shërbejë vetëm palës politike që e drejton. Unë besoj se kontributi im do i shërbejë edhe pse gjysëm mandati, shpresës dhe bashkimit, përmirësimit të jetës të të gjithë kryeqytetasve.

Uroj dhe shpresoj që të gjitha partitë politike qe duan vërtet ndryshimin pavarësisht ngjyrave të bashkohen me këtë nismë dhe të kenë besim tek qytetarët ashtu siç qytetarët kanë pasur besim tek ta. Qëllimi im është, që së bashku, ta nxjerrim bashkinë nga gjëndja në të cilën ndodhet për shkak të politikës dhe t’jua rikthejmë atë qytetarëve si një shtëpi për të gjithë ne. Të rikthejmë besimin tek institucioni i bashkisë në shërbim të komunitetit! Ftoj të gjithë qytetarët, intelektualët të majtë dhe të djathtë të na bashkohen. Faleminderit.

TIRANË – Kryeministri Edi Rama ka bërë një reagim simbolik në lidhje me drejtimin e Bashkisë së Tiranës gjatë një vizite të dytë të tij në këtë institucion. Gjatë një bisedë me gazetares Enkelejda Mema nga Euronews Albania, kur ajo e pyeti se kush do ta drejtojë Bashkinë pas arrestimit të Erion Veliajt, Rama tregoi me gishta drejt monumentit të Skënderbeut në shesh, duke lënë të kuptohet se figura e historisë kombëtare është një simbol i forcës dhe drejtpeshimit në këtë moment sfide.

Ky moment simbolik i Ramës ndodhi pas ngjarjeve të fundit, kur Veliaj, kryebashkiaku i Tiranës, u arrestua nga Prokuroria e Posaçme (SPAK) për akuza korrupsioni, fshehje pasurie dhe pastrim parash. Arrestimi i Veliajt ka sjellë shqetësime dhe diskutime në nivel politik dhe institucional, ndërkohë që Rama ka theksuar vazhdimisht rëndësinë e pavarësisë së drejtësisë dhe barazisë para ligjit.

Duke drejtuar gishtin drejt Skënderbeut, Rama duket se ka sinjalizuar një qëndrim të fortë dhe një përkushtim ndaj integritetit dhe përparimit të qytetit të Tiranës, duke e lidhur këtë moment me vlerat e drejtësisë dhe udhëheqjes kombëtare që përfaqëson figura e Skënderbeut.

Nga Adriatik BALLA

Tri javë më parë në një nga ambientet e kryeministrisë befasoi me shfaqjen e vet ekipi i taekundosë (taekwondo) dhe kikboksit (kickboxing) të Kamzës. Duket e pamundur por është e vërtetë, Kamza po sfidon bashkinë e madhe të Tiranës në sport. Ky zhvillim duhet parë në dy drejtime: Në shtimin e numrit të sportistëve dhe, së dyti, në përhapjen e disiplinave. Sot në Kamzë ka ekipe sportive kolektive por edhe sporte individuale me përbërje cilësore. Viti që po mbyllet ishte veçanërisht i suksesshëm për dy disiplina, taekundonë dhe kikboksin, që drejtohen nga trajneri Sokol Çera. Ai ka në total 70 sportistë, 35 në taekundo dhe 25 në kikboks, në të gjitha grupmoshat, përfshi jo vetëm meshkuj por edhe femra.

Sa për të krijuar një ide mbi rëndësinë që i ka dhënë Bashkia e Kamzës dhe personalisht kryebashkiaku Rakip Suli sportit në tërësi vlen të thuhet se dy disiplinat që drejton Çera kanë marrë pjesë në Kupën e Shqipërisë në kikboks dhe kanë zënë vend të dytë, e po vend të dytë për kadetë edhe në taekundo, me pritshmëri edhe më të mëdha në të ardhmen.
Bashkia i ka plotësuar kushtet për sportistët, duke u vënë në dispozicion palestrat dhe duke i mbwshtetur vazhdimisht sportistwt dhe stafin. Qëllimi është që sporti në Kamzë jo vetëm të masivizohet, por edhe të jetë konkurrues në rang vendi e pse jo dhe në nivel ballkanik dhe europian.
Çdo ditë që kalon me ekipin bashkohen të rinj e të reja, si dhe kategori të ndryshme fëmijësh. Janë vetë prindërit që interesohen që fëmijët e tyre të ushtrohen me sport. Kjo është dhe një mënyrë për t’i shkëputur ata nga përdorimi me orë të zgjatura i telefonit apo largimi i tyre nga veset. Gjithçka ndodh në qendrën përgatitore në Kamzë, ku fëmijët ushtrohen, seleksionohen dhe marrin një drejtim sportiv. Në këtë pikë organizimi, siç thamë, Bashkia e Kamzës e ka sfiduar edhe Bashkinë e madhe të Tiranës.
Çera thotë se ekipin e ka pasur edhe në vitin 2011, më pas u mbyll, por me suportin e Rakip Sulit si kryebashkiak, ai jo vetëm e ka kthyer ekipin, por sot është ndër shoqëritë sportive elitare në rang vendi. Kamza në taekundo dhe në kikboks nuk është vetëm skuadër që merr pjesë, por është ekip me kampionë në përbërje, me sportistë të fuqishëm.
Por e ardhmja duket edhe më e ndritur. “Planet tona për vitin 2025 janë të zgjerojmë ekipet, por edhe të marrim pjesë në gara ballkanike dhe europiane. Në kampionatet kombëtare do të synojmë të marrim pjesë me të gjitha grupmoshat e në të gjitha kategoritë e peshave. Kemi sportistë cilësorë, ku veçoj në taekundo për të rritur Albian Deda e Aris Shkjau, ndërsa te vajzat Nertila Tota dhe Lorena Muça, e shumë të tjerë. Në kikboks spikatën Dejvid Ndoca, Rei Balla kampionë kombëtar etj”, shprehet tekniku 39-vjeçar Sokol Çera.
Së fundmi, më 21 dhjetor Bashkia organizoi ceremoninë “Më të mirët 2024”, ku u dhanë certifikatat përkatëse. Një prani e madhe njerëzish, në një sallë të tejmbushur, çka tregon se Rakip Suli i ka dhënë besim sportit në Kamzë dhe për pak vite nga kjo bashki do të dalin kampionë të fuqishëm në shumë lloje sportesh.

Flakadanë, tym edhe flakë para bashkisë Tiranë.

Protestuesit kanë hedhur edhe shishe me molotov, duke shkaktuar një zjarr të madh në hyrje të bashkisë.

Opozita po proteston që prej orës 11:00 para bashkisë, pas arrestimeve të disa ish-zyrtarëve të këtij institucioni për abuzim me detyrën për dosjen ‘5D’.

Ata kërkojnë dorëheqjen e kryebashkiakut Veliaj.

Përveç molotivit dhe flakadanëve, protestuesit hodhën edhe bojë të zezë dhe mollë drejt Bashkisë. Për më tepër shihni videon e siguruar për BalkanWeb nga gazetari Osman Stafa.