Emisioni Fiks Fare solli fakte të pakundërshtueshme se familja Mataj ka ngujuar fisin Hasaj pas vrasjes së djalit të tyre.

Vetëm 20 ditë më parë në fshatin Dragoç të Shkodrës u vra 33 vjeçari Ramazan Mataj , nga Arjon Hasaj banor i të njëjtit fshat. Ky i fundit ka deklaruar pas arrestimit nga policia se e vrau 33 vjeçarin, pasi i kishte ndarë të motrën 2 herë nga burrat, pasi u dërgonte atyre video intime.

E ndërsa 2 vëllezërit Hasaj janë në burg, familja e tyre është e ngujuar. Fiksi solli dëshminë e babait të autorit, Rustem Hasaj, i cili tregon se familja e tij është e ngujuar dhe jo vetëm aq, por plotë 11 familje të fisit të tij janë të gjithë të ngujuar. “Para 3 ditësh më vdiq djali i xhaxhait , i kërkuam familjes së të ndjerit 3 ditë leje, që fisi të bënte varrimin, dhe ai na lejoi, por sapo u bënë 3 ditë të gjithë janë të mbyllur brenda” thotë Rustemi. Ai shpreh shqetësimin për 4 fëmijët e autorit, njëra prej tyre 8 vjeçare e cila është në klasë të dytë dhe nuk po shkonë në shkollë. “Nuk po shkon vajza në shkollë kemi frikë” thotë Hasaj.

Ndërkohë të njëjtin shqetësim ka edhe bashkëshortja e autorit, Ersilda Hasaj, e cila po kujdeset e vetme për 4 fëmijët e tyre. “Nuk kam ditur asgjë, bashkëshorti nuk kishte shfaqur asnjë shqetësim, vajzën nuk po e çoj në shkollë sepse kam frikë” thotë e reja.

Gazetarët e Fiksit nuk ndaluan vetëm te njëra familje, por shkuan edhe te familja Mataj po në atë fshat. Fatmir Mataj, babai i viktimës pranon se nuk e lejon fisin Hasaj të dalë nga shtëpia. “Të mos mërzitet aq shpejt fisi Hasaj se mua më ka vdekur djali dhe nuk më kthehet më, mos t’jua dëgjoi zërin e gojës atyre, brenda do rrinë” thotë Fatmir Mataj.

Babai i viktimës pretendon se djali i tij po përflitet nëpër media si një individ që ka patur të gjitha fajet ai, ndëkohë nuk është kështu. “Djali doli të takonte një vajzë që i shkruante në internet, dhe u vra, vajza i ka nis dhe mesazhe zanore dhe ka qenë zë femre, ku është ky person që nuk arrestohet?” thotë Fatmiri.

I pyetur nga gazetarët për lejen 3 ditore që i dha fisit Hasaj për të bërë varrimin e të afërmit, ai tha se i vajti kryeplaku dhe i kërkoj leje, ndaj i lejoi.

Gazetarët takuan dhe kryeplakun, Caf Çela i cili tregoi se nëse do familja Mataj me e fal fisin Hasaj e fal, nëse nuk do nuk e fal. “Unë shkova në shtëpinë e viktimës dhe kërkuam 3 ditë leje meqë në fisin Hasaj kishte vdekur dikush dhe na u dha leja, por vetëm 3 ditë dhe u mbyllën brenda sërish” thotë Çela.

Për kryeplakun hapi i radhës do jetë që gjithë fshati t’i kërkojë familjes Mataj ta fali fisin Hasaj, të paktën fisin. Sepse familjen ata nuk e falin. Ndërkohë pranon se e di dhe policia situatën mes familjeve. Pra institucionet shtetërore janë në dijeni dhe nuk reagojnë për këtë vetëgjyqësi të paralajmëruar.

Një burrë që, sipas autoriteteve, kaloi 12 orë jashtë fushës së golfit të ish-presidentit amerikan, Donald Trump, përpara se Shërbimi Sekret ta pikaste, u deklarua i pafajshëm ndaj akuzave federale, që përfshijnë akuzën për tentim vrasjeje.

I akuzuari Ryan Wesley Routh u paraqit në gjykatën federale në West Palm Beach disa ditë pasi u paraqit aktakuza me pesë pika, që lidhej me përpjekjen e dytë për të vrarë Trumpin që nga korriku.

Routh hyri në sallën e gjyqit i prangosur dhe i përshëndeti gazetarët e mbledhur për ta ndjekur procesin. Avokatët e tij refuzuan të komentojnë pas seancës.

Përpjekja e pretenduar për vrasje u pengua kur një anëtar i Shërbimit Sekret vuri re tytën e pushkës e Routh që dilte përtej gardhit të fushës së golfit, ku po luante Trump, sipas autoriteteve. Një agjent qëlloi në drejtim të Routhit, i cili u largua me shpejtësi dhe pastaj u arrestua pranë vendit të ngjarjes.

Zyrtarët kanë thënë se Routh nuk qëlloi asnjë plumb dhe nuk e kishte Trump në rrezen e shikimit të tij. Ai la pas një kamerë digjitale, një çantë shpine, një pushkë dhe një qese plastike me ushqime.

Prokurorët kanë thënë se Routh kishte shkruar për planet e tij për ta vrarë Trumpin në një shënim të shkruar me dorë disa muaj para arrestimit të tij më 15 shtator, ku e përshkruante veprimin e tij si një “përpjekje të dështuar për vrasjen e Donald Trump” dhe ofronte 150.000 dollarë për këdo që mund ta “mbaronte punën”.

Ky shënim ishte në një kuti që Routh raportohet se e kishte dorëzuar në shtëpinë e një dëshmitari të paidentifikuar disa muaj para arrestimit të tij.

Seanca e ardhshme në këtë rast do të mbikëqyren nga gjyqtarja federale Aileen Cannon, e cila u emërua në këtë post nga Trump dhe gjithashtu është caktuar të merrej me çështjen penale ku ish-presidenti akuzohet për mbajtjen e dokumenteve të klasifikuara në pronën e tij në Mar-a-Lago.

Cannon ka tërhequr vëmendje për mënyrën e saj të trajtimit të çështjes penale të Trumpit, të cilën e hodhi poshtë në korrik, vendim që tani po apelohet nga ekipi i këshilltarit special Jack Smith.

Arrestimi i Routhit ndodhi dy muaj pasi Trump u qëllua dhe u plagos në vesh gjatë një përpjekje për vrasje në një tubim fushate në Pensilvani. Shërbimi Sekret ka pranuar se ka pasur mangësi në sigurinë para atij sulmi, por ka thënë se masat e sigurisë funksionuan siç duhet për të parandaluar një sulm të mundshëm në Florida.

Fillimisht, Routh u akuzua vetëm për vepra penale që lidheshin me armët, përpara se prokurorët të ngrinin akuza të tjera më serioze. Prokurorët shpesh ngrenë fillimisht akuzat më të lehta për t’u provuar dhe më pas shtojnë akuza më të rënda gjatë zhvillimit të hetimit.

Akuzat e tjera përfshijnë posedimin e paligjshëm të armës, pavarësisht se ai kishte disa dënime penale, duke përfshirë dy akuza për posedim të mallrave të vjedhura në vitin 2002 në Karolinën e Veriut. Ai gjithashtu akuzohet për posedimin e një arme me numrin serik të fshirë, në kundërshtim me ligjin federal./REL