Eksportet bujqësore në Shqipëri kanë shënuar një rritje të konsiderueshme prej 12% për 5-mujorin e parë të këtij viti, duke arritur në 182 mijë tonë nga 163 mijë tonë vitin e kaluar, njoftoi sot Ministrja e Bujqësisë dhe Zhvillimit Rural, Anila Denaj.

Në një postim në rrjetet sociale, ministrja Denaj u shpreh se “kjo rritje e qëndrueshme pasqyron përkushtimin e palodhur të fermerëve dhe bujqëve shqiptarë për të rritur prodhimin e produkteve “Made in Albania”. Gjithashtu, kjo rritje është rezultat i politikave të suksesshme të qeverisë në mbështetje të sektorit bujqësor”.

Ministrja Denaj theksoi se ky progres na afron gjithnjë e më shumë me objektivin ambicioz të arritjes së 1 miliard dollarë eksporte bujqësore deri në vitin 2030.

 Ministria e Bujqësisë dhe Zhvillimit Rural synon hapjen e hapjen e eksporteve të vezëve të klasit A, drejt tregut të BE-së.

Ministrja e Bujqësisë dhe Zhvillimit Rural, Anila Denaj mori pjesë në takimin me 11 prodhues të shpendëve për prodhimin e vezëve dhe Drejtorinë e Përgjithshme të Zhvillimit në Fushën e Sigurisë Ushqimore, ku diskutuan rezultatet shumë pozitive të auditit të detajuar nga ana e shërbimeve të Komisionit Evropian, që rezultuan në linjë dhe përputhje të plotë me kërkesat e BE-së.

Denaj tha se, sipërmarrja shqiptare në prodhimin e vezëve ka njohur një zgjerim të konsiderueshëm të investimeve cilësore dhe bashkëkohore duke punuar me standarde të larta të sigurisë ushqimore.

Ministrja vuri në dukje se, kërkesa e tyre për më shumë mbështetje me qëllim hapjen e eksporteve të vezëve të klasit A drejt tregut të BE-së vjen si një domosdoshmëri.

Në këtë takim u realizua plani i punës dhe bashkërendimi i veprimeve të mëtejshme për miratimin e “Programit Kombëtar të Kontrollit për Salmonelozën në pulat për vezë,” si garancia kryesore për hapjen e eksporteve të vezëve të klasit A, por njëherazi me rëndësi në shëndetin publik në përputhje me kërkesat e BE-së për përafrimet ligjore.

“Nëpërmjet politikave në nivel qendror do të arrihen të gjitha standardet sipas kërkesave të BE-së dhe arritja e këtij objektivi synon rritjen e të ardhurave në mënyrë të konsiderueshme për subjektet që ushtrojnë këtë aktivitet”, deklaroi Denaj.

Në agroturizmin “Adora” i kuruar në detaje, ku kënaqësia e mysafirëve është prioritet.

Ministrja e Bujqësisë dhe Zhvillimit Rural, Anila Denja ndau në rrjete sociale historinë e Pavlos që pas 8 vitesh qëndrimi në Zvicër, u kthye në vendlindje dhe ngriti agroturizmin “Adora”.

Agroturizmin “Adora”, është një investim mes ajrit të pastër të maleve afër liqenit të Komanit në Fierzë, dhe të ofron të gjitha produktet e zonës duke njohur turistë vendas e të huaj me shijen e mrekullueshme dhe cilësinë e produkteve “Made in Albania”.

Kjo pikë agroturistike është mjaft e frekuentuar nga pushuesit vendas dhe të huaj, sidomos tani në sezonin e verës.

Ministra u shpreh se, agroturizmi është kyç për zhvillimin e qëndrueshëm të Shqipërisë. “Ndaj dhe mbështetja për këtë sektor do të vijoj”, tha ajo.

“Nëpërmjet lehtësive fiskale dhe procedurave, Ministria e Bujqësisë dhe Zhvillimit Rural do të vijojë mbështetjen për këtë sektor duke promovuar ruajtjen e traditave dhe kulturës lokale, nxitjen e ekonomisë rurale dhe krijimin e mundësive të reja për komunitetet lokale”, tha Denaj.

Eksportet e perimeve kanë shënuar rritje në vlerë dhe sasi edhe gjatë këtij viti, duke treguar ecurinë e qëndrueshme të sektorit të bujqësisë.

Ministrja e Bujqësisë dhe Zhvillimit Rural, Anila Denaj bëri të ditur sot se “katërmujori i parë i këtij viti ka dhënë një sinjal të fortë pozitiv për eksportin e perimeve, me një rritje prej 23,9% në sasi dhe 12,5% në vlerë, krahasuar me një vit më parë”.

Denaj tha se, treguesit pozitivë afirmojnë cilësinë dhe rritjen e prodhimit të perimeve vendase, falë punës së palodhur të fermerëve tanë.

“Më shumë prodhime vendase dhe një Shqipëri krenare në tregjet ndërkombëtare në sajë të politikave tona për bujqësinë e qëndrueshme”, u shpreh ministrja.

Klima e favorshme, afërsia me tregjet evropiane, mundësia për mbulimin e tregjeve rajonale me potenciale të pashfrytëzuara, si dhe fuqia punëtore me kosto të ulët, e bëjnë Shqipërinë një vend me potencial premtues në disa sektorë, por veçanërisht në bujqësi.

Të rinjtë tashmë janë me një vizion të qartë për të ardhmen në bujqësi.

Ministrja e Bujqësisë dhe Zhvillimit Rural, Anila Denaj ndau në rrjete sociale shembullin e Bleis Konit, të riut që ka zgjedhur të punojë në sektorin e bujqësisë, pasi është kthyer nga studimet jashtë vendit.

Denaj e cilësoi këtë si modelin që po ndjekin shumë të rinj, teksa shkroi se, “Bleisi është kthyer nga Europa për të sjellë një frymë të re në bujqësinë shqiptare”.

Përmes një videomesazhi Bleisi tregon se punon në biznesin që kanë ngritur prindërit e tij për prodhimin e fidanëve, përmes aplikimit të inovacionit.

“Kompania jonë ka 30 vjet që operon në treg për prodhimin e fidanëve të perimeve, me fokus rritjen e cilësisë së produkteve bujqësore dhe zgjerimin e eksporteve”.

Ai tregon se pjalmimi me bletë, ose lufta biologjike, janë nga teknologjitë më inovative që po aplikon kompania. Bleisi tha se këto janë metoda, “që sot aplikohen edhe në bujqësinë e vendeve më të zhvilluara europiane dhe garantojnë cilësi dhe standarde prodhimi”.

“Prodhimi i fidanëve perimorë përmes këtyre teknologjive i garantojnë fermerit shqiptar, treg të sigurt të eksporteve me prodhimeve cilësore “Made in Albania””, tha ai.