Për çështjen e inceneratorëve, Dumani shpjegoi se pas sekuestrimit të pasurive, administratori i inceneratorëve është përgjegjës për menaxhimin e fondeve, ndërsa për ata që dyshohet se kanë përfituar nga ato, janë vendosur masa sigurimi.

“Çështja e inceneratorit të Tiranës a është hetuar, ku kanë shkuar paratë?”– pyeti një prej gazetarëve të pranishëm.

“Në momentin që është vendosur sekuestro, inceneratori i Tiranës është nën administrimin e shtetit. Administratori ka detyrimin që ta menaxhojë, ai është personi përgjegjës për paratë. Për çështjen e sekuestrimit ka masë sigurimi, për ata që dyshohet se kanë përfituar nga ato fonde, po ashtu është duke u hetuar edhe për pjesën tjetër të parave”, tha Dumani.

Dumani gjithashtu nënvizoi se SPAK ka inkurajuar institucionet të dërgojnë kallëzime dhe materiale për çdo dyshim të shkeljeve të ligjit.

“Ka institucione që lënë për të dëshiruar, por ne i kemi inkurajuar që të na furnizojnë me kallëzime, kur kanë dyshime për shkelje të ligjit”,tha Dumani.

Kryetari i SPAK iu përgjigj dhe akuzave të Berishës se ai vetëm rrogën e shtetit, ndërsa bashkëshortja merrej me përkthim disponon tre apartament.

Tre apartamentet?

“Çdo pasuri e imja eshte e verifikuar ne detaj ne nje proces hetimi administrativ rigoros nga institucionet e vetingut. Kurrë në jetën time nuk kam pranuar jo rryshfet as dhurat mbi 100 dollarë. Unë e dua punën time. E bëj me mish e shpirt.’ tha Dumani në intervistë për një emision televiziv.

Në një intervistë në një emision televiziv, analisti Arben Meçe, analizoi deklaratat e kreut të Partisë së Lirisë, dhe akuzat e tij të forta kundër kreut të SPAK, Altin Dumaniu.

Meçe u shpreh se Meta ka kërcënuar hapur institucionin e rëndësishëm të Republikës së Shqipërisë.

Ndërsa më tej shtoi se këtij akti të Ilir Meta nuk i ka dalë asnjë opozitar në mbrojtje.

“Është e panatyrshme dhe e paarsyeshme që Meta të ngrejë një furtunë të tërë ndaj këtij personi kur nuk ka asnjë deklarim, apo aksion publik të SPAK apo në mënyrë të posaçme të Dumanit ndaj metës. Përse pikërisht u shënjestrua Dumani? Mos të harrojmë se tek deklarimet e Metës ka disa gjera që janë edhe një kërcënim, si edhe një shpërdorim të nenit të kodit të procedurës penale që është ofendimi ndaj një personi që kryen detyrë shtetërore. Ne kemi tre ditë që po merremi, me ngjarje që po ndodhim me Ilir Metën. Ai provokoi një situatë, dhe nuk ka një person që t’i dalë në mbrojtje. Të gjithë e kanë ndëshkuar dhe nuk i ka dalë askush në krahë. Ilir Meta foli për Vojo Kushë. Por nëse do ta ndjekësh sinkronin e plotë, tha se kishte 300 mijë Vojo Kushë. Këta ndodhen në Gjermani, Francë, Angli, Amerikë. Pra t’i i dashur prokuror nuk ke ku të futesh. Kërcënim më të hapur se kjo nuk ka. Ai kërcënoi një institucion Kushtetues të Republikës së Shqipërisë. Goditi sistemin që gjithë infrastruktura ndërkombëtarë po investon Jemi në kuadër të një personi që është i qartë në atë që bën, dhe nuk mund të themi që është i çmendur. Ai kërcënoi dhe ai goditi dhe kërcënoi pastër fare me 300 mijë Vojo Kushash të shtrirë në të gjithë botën. Mafia këtë ka”, tha ai.

Kreu i SPAK, Altin Dumani ka deklaruar ditën e djeshme se janë të paktën 11 objektiva që institucioni që ai parashikon të mbushë në 3-vjeçarin e ardhshëm. Dumani, gjatë raportimit të tij në Këshillin e Lartë të Prokurorisë tha se objektivat e SPAK kanë të bëjnë që nga përmirësimi i kapaciteteve të hetimeve, tek shtimi i strukturave mbështetëse, bashkëpunimi ndërkombëtar e deri tek ngritja e një sistemi të administrimit të çështjeve. “Objektivi i parë është përmirësimi i kapaciteteve të hetimit penal. Së dyti forcimi i kapaciteteve për hetimin financiar dhe pasurore, qasja proaktive në hetimin e pastrimit të parave, nxjerrja e akteve nënligjore për goditjen e pastrimit të parave, forcimi i hetimeve kundër financimit të terrorizmit, sigurimi i standarde të larta ligjore të integritetit institucional, shtimi i strukturave mbështetëse, forcimi i ndihmës dhe bashkëpunimit ndërkombëtar, reduktimi i çështjeve të mbartura, forcimi i transparencës dhe komunikimi me publikun si dhe ngritja e sistemit të administrimit të çështjes”, tha Dumani gjatë fjalës së tij. Altin Dumani gjithashtu bëri bilancin e institucionit që ai drejton përgjatë 2023. Dumani ka vënë theksin se SPAK është një institucion i besueshëm në sytë e aleatëve, e ndërsa tha se në 2023 është arritur një rritje cilësore. “Për 2023 SPAK ka njohur një rritje cilësore, këto të cituara edhe në Progres Raporti i publikuar në nëntor 2023. SPAK ka arritur të krijojë besueshmeri tek autoritetet partnere. Përfaqësues të DEA dhe FBI janë atashuar pranë SPAK. Kemi krijuar kontakt direkt me autoritete të vendeve të Amerikës Latine”, tha Dumani.