Një objektiv prej 10 mijë hapash në ditë rekomandohet SHPESH për të ruajtur formën dhe shëndetin. Megjithatë, hulumtimet e reja tregojnë se “mikro-shëtitjet” prej vetëm 10 deri në 30 sekonda mund të jenë më efektive për djegien e kalorive dhe përmirësimin e shëndetit të përgjithshëm sesa ecja klasike e vazhdueshme.

Studiuesit italianë ndoqën lëvizjen e dhjetë të rriturve të shëndetshëm dhe zbuluan se ecja në intervale të shkurtra shpenzonte deri në 60% më shumë energji në krahasim me të njëjtën distancë të përshkuar me një lëvizje. “Sa herë që fillojmë të ecim, shpenzojmë një sasi të konsiderueshme energjie dhe oksigjeni vetëm për të lëvizur trupin”, shpjegon Francesco Luciano, një fiziolog nga Universiteti i Milanos dhe autor i studimit, shkruan Index.hr.

Luciano e krahasoi fillimin e çdo shëtitjeje me një makinë që ka nevojë për më shumë karburant për kilometrat e parë sesa për ato të mëvonshme. Studiuesit vëzhguan pjesëmarrësit teksa ecnin në një rutinë dhe përdorën një pajisje ngjitjeje, duke regjistruar konsumin e oksigjenit dhe energjinë e nevojshme për çdo “shëtitje”. Rezultatet treguan se energjia e kërkuar në fillim të çdo aktiviteti është më e madhe se kur trupi tashmë është duke ecur.

Në një artikull të botuar në revistën Proceedings of the Royal Society B, studiuesit këshillojnë që, kurdoherë që është e mundur, duhet të ndërpresim periudhat e qëndrimit ulur me shëtitje të shkurtra. Organizata Botërore e Shëndetësisë (OBSH) rekomandon që të rriturit të bëjnë të paktën 150 minuta aktivitet me intensitet të moderuar në javë dhe mikro-ecja mund të jetë një mënyrë praktike për të arritur këtë qëllim.

OBSH-ja vlerëson se pasiviteti fizik kontribuon në vdekjen e rreth dy milionë njerëzve çdo vit në nivel global.