Qarku i Lezhës po përballet me mungesë të energjisë elektrike, veçanërisht në njësitë administrative, për shkak të motit të keq që ka përfshirë rajonin gjatë orëve të fundit. Era e fortë dhe reshjet intensive kanë shkaktuar dëme në rrjetin shpërndarës të energjisë elektrike, duke çuar në ndërprerje të energjisë në disa fshatra. Grupi i punës i Operatorit të Shpërndarjes së Energjisë Elektrike është në terren që prej mbrëmjes së së mërkurës dhe po punon për riparimin e defekteve dhe rikthimin e energjisë në zonat e prekura.

Po ashtu, deti është shumë i trazuar, me dallgë që arrijnë deri në 5 ballë. Autoritetet detare kanë bërë thirrje për peshkatarët dhe anijet e vogla që të shmangin daljen në det deri në përmirësimin e kushteve atmosferike.

Moti i keq pritet të vazhdojë edhe gjatë fundjavës, ndërsa strukturat e Mbrojtjes Civile në bashkitë Lezhë, Mirditë dhe Kurbin janë në gatishmëri për t’iu përgjigjur çdo situate emergjente që mund të krijohet nga reshjet dhe fortunat.

Një shpërthim i madh ka ndodhur në Zvicër, ku si pasojë kanë humbur jetën edhe dy persona dhe 11 të tjerë kanë mbetur të plagosur. Siç raportohet dy persona janë gjetur të vdekur pas shpërthimeve në garazhdin e një ndërtese apartamentesh në veri të Zvicrës.

Mediat zvicerane kanë raportuar se shpërthimet kanë krijuar re të madhe tymi që dukej edhe nga larg dhe po ashtu janë dëgjuar edhe jashtë qytezës. Ndërsa policia ka thënë se zjarri ishte përhapur në disa kate të ndërtesës dhe se njerëzit ishin evakuuar. Shpërthimet ndodhën në qytezën Obersiggenthal.