Shqipëria nuk përfshihet në listën e vendeve, për shtetasit e të cilëve do të kërkohet garanci deri në 15 mijë dollarë për marrjen e një vize për në Shtetet e Bashkuara.

Të paktën për momentin.

Në një deklaratë për shtyp të publikuar nga Departamenti Amerikan i Shtetit thuhet se projekti pilot 12-mujor, që nis të zbatohet më 20 gusht, do të aplikohet fillimisht për shtetasit nga Malaui dhe Zambia, dy vende të Afrikës Jugore dhe Juglindore.

Burime nga Ministria e Jashtme thanë se deri tani nuk ka njoftim për këtë program pilot, por me hyrjen në fuqi të programit, do të njoftohen vendet që mund t’i shtohen listës.

Subjekt i kësaj mase janë aplikantët për viza turistike dhe biznesi.

Projekti parashikon 3 nivele garancish: 5 mijë, 10 mijë dhe 15 mijë dollarë, dhe do të jenë punonjësit e ambasadave që do të përcaktojnë se cilën shumë duhet të vendosin si garanci aplikantët, duke u bazuar në kriteret e rrezikshmërisë së shkeljes së vizave, një prej të cilëve është historiku i udhëtimeve.

Sipas një raporti për vitin 2023 të Departamentit për Sigurinë e Brendshme, 42% e rreth 11 milionë të huajve që jetojnë në SHBA kanë hyrë me vizë të rregullt me afat dhe nuk u larguan më.

Përqindjen më të lartë të shtetasve që shkelën afatin e vizave gjatë 2023-shit e ka Çadi me 50%, Laosi me 35% dhe Haiti me 31%.

Shifra e shtetasve shqiptarë që shkelën afatin gjatë 2023-shit është rreth 2.3%. Malaui dhe Zambia, ku aplikohet fillimisht projekti pilot, kanë nivele po ashtu të ulëta: 10% – 14%. Ndërsa vendet me numrin më të madh të shtetasve që shkelin afatin e vizave janë Meksika, Kolumbia, Haiti, etj..

Kursi i këmbimit të Euros me Lekun pësoi përsëri rënie të premten dhe preku një minimum të ri historik. Sipas kursit zyrtar të këmbimit të Bankës së Shqipërisë, Euro u këmbye me 97.88 lekë, niveli më i ulët i shënuar ndonjëherë.

Agjentët e këmbimit mendojnë se rënia e kursit të Euros duket se lidhet me shtimin e ndjeshëm të prurjeve valutore të lidhura me turizmin gjatë muajit qershor. Një rënie e ndjeshme u shënua edhe në prag të fundjavës së kaluar, kur Euro pati zbritur përsëri poshtë vlerës së 98 lekëve.

Por, me afrimin e fundjavës duket se presionet rënëse mbi Euron janë forcuar përsëri, duke e zbritur monedhën europiane në vlerën më të ulët të regjistruar ndonjëherë në kursin zyrtar të këmbimit.

Sezoni veror, ashtu siç pritej, po ndikon edhe këtë vit në një rënie të mëtejshme të kursit të këmbimit të Euros me Lekun. Duke filluar nga gjysma e dytë e muajit prill, kursi i këmbimit Euro-Lek ka pësuar një zhvendosje në rënie. Të dhënat e viteve të fundit tregojnë se një rënie e tillë është pak a shumë e zakonshme dhe lidhet me rritjen e flukseve valutore hyrëse, të lidhura sidomos me shtimin e numrit të vizitorëve të huaj. Trysnia mbi kursin e Euros është forcuar më tej me fillimin e qershorit, kur sezoni veror bëhet më intensiv.

Nga ana tjetër, edhe politika fiskale shtrënguese, me suficite të mëdha, e viteve të fundit tenton të shtrëngojë ofertën e Lekut me kalimin e muajve, duke shtuar presionin për mbiçmimin e monedhës vendase. Deri në fund të 4-mujorit, buxheti ishte përsëri në suficit të dukshëm, në vlerën e 38 miliardë lekëve, megjithëse në rënie me 24% krahasuar me të njëjtën periudhë të një viti më parë.

Vitin e kaluar, Banka e Shqipërisë e kufizoi rënien e kursit deri në nivelin e 98 lekëve, nëpërmjet blerjeve të mëdha valutore, që filluan në muajin maj dhe vazhduan pothuajse për të gjithë pjesën e mbetur të vitit. Banka Qendrore bleu afërsisht 933 milionë euro në tregun e brendshëm valutor në 2024, në vlerën më të lartë historike.

Banka e Shqipërisë ndërhyri në tregun valutor në fillim të javës së kaluar për të blerë Euro, duke bërë që monedha europiane të ringrihej përkohësisht sipër nivelit të 98 lekëve.

Sot, në tregun e këmbimit valutor, një dollar amerikan do të blihet me 87.3 lekë dhe do të shitet me 88.6 lekë.

Euro do të blihet me 97.8 lekë dhe do të shitet me 98.6 lekë. Franga zvicerane do të blihet me 103.8 lekë dhe do të shitet me 105.2 lekë.

Ndërsa paundi britanik do të blihet me 115.6 lekë dhe do të shitet me 117.2 lekë.

Dollari kanadez këmbehet me 62.4 lekë në blerje dhe me 63.8 lekë në shitje.

Dy shqiptarë janë arrestuar të Itali, pasi janë kapur nga autoritetet duke transportuar një sasi prej 20 kg drogë, e cila kapte vlerën e 6 milionë eurove.

Dy shqiptarët të moshës 36 dhe 25 vjeç, po lëviznin me dy makina në momentin kur u ndaluar nga Policia, në kryqëzimin Terni Ovest.

Në njërën nga makinat policia gjeti 4 pako me drogë, ndërsa në tjetrën 16 pako.

Lënda narkotike ishte fshehur në dyshemenë e rreme të bagazhit.

Gjykata ka vendosur konfiskimin e 7 sipërfaqeve të mëdha toke buzë detit pas hetimeve të Prokurorisë së Sarandës dhe i kanë kaluar shtetit.

Në seancën gjyqësore për 5 të pandehurit, Fredi Merkuri, Valter Llomi, Argonida Canaj (përfitues te tokave përmes dokumenteve të falsifikuar), noterin Aleko Anagnosti dhe Behar Mucobega, prokurori i çështjes Kledian Llaho kërkoi shpalljen fajtor të tyre.

Gjithashtu, prokurori kërkoi konfiskimin dhe kalimin në favor të shtetit të 7 trojeve buzë detit me sipërfaqe totale 6640 m2, me vlerë tregu rreth 15 milionë euro.

Në përfundim, magjistrati Alban Veçani vendosi dënimin me 1 deri në 1.2 vite burg për falsifikim dokumentash të të pandehurve Fredi Merkuri, Valter Llomi, Arhondia Caraj pas aplikimit të gjykimit të shkurtuar.

Ndërsa të pandehurit Behar Mucobega dhe Aleko Anagnosti me nga dy vite burg.

Gjithashtu magjistrati vendosi konfiskimin dhe kalimi në favor të shtetit të sipërfaqes prej 6640 m2.

Detaje nga dosja

Në 1 qershor 2022, Llaho kërkoi arrestimin e 10 shtetasve të dyshuar për “falsifikim dokumentash”, “pastrim i produkteve të veprës penale” dhe “shpërdorim detyre”.

Qytetarë e zyrtarë u akuzuan për tjetërsimin përmes dokumenteve false të mbi 10 mijë m2 truall buzë detit, të cilat më pas u pajisën me certifikata pronësie.

Prokuroria lëshoi urdhër arreste, si edhe u sekuestruan pronat e tjetërsuara.

Pas hetimeve intensive, dosja shkoi në Gjykatë për një pjesë të të pandehurve, të cilët kërkuan gjykim të shkurtuar, ndërkohë që vijojnë hetimet dhe gjykimi për një pjesë të të dyshuarve dhe një pjesë të sipërfaqes prej 10 mijë m2.

Nga ana tjetër, vazhdon të mbetet nën sekuestro edhe sipërfaqja e mbetur nga totali 10 mijë m2, si dhe hetimi apo gjykimi për të dyshuarit e tjerë.

Në 3 vitet e fundit, Prokuroria e Sarandës e përfaqësuar nga Kledian Llaho, ka kërkuar sekuestrimin e rreth 15 mijë m2 truall buzë detit në Sarandë e Ksamil, të dyshuara si të përfituara me dokumentE të falsifikuara.

TIRANA- Euro po fiton terren në kursin e këmbimit me lekun në ditët e fundit të janarit. Sipas kursit zyrtar të këmbimit të Bankës së Shqipërisë, monedha europiane u këmbye me 98.75 lekë, në rritje me 0.55 lekë në harkun e një jave. Kursi euro-lek ka arritur nivelin më të lartë për vitin 2025 dhe njëkohësisht më të lartin që prej datës 16 tetor të vitit të kaluar.

Sipas agjentëve të këmbimit valutor, rritja e kursit të euros në ditët e fundit ka ardhur kryesisht për shkak të një kërkese në rritje për blerje valute nga shoqëritë tregtare për nevojat e tyre. Në 2-3 vitet e mëparshme bizneset kishin një tendencë të rrisnin kërkesën për blerje valute qysh në fund të dhjetorit, ndoshta edhe si përpjekje për të përfituar nga nivelet e ulëta të kursit.

Kjo përkonte edhe me rritjen e shpenzimeve buxhetore në ditët e fundit të vitit dhe rritjen e ofertës së lekut në treg. Në dhjetorin e vitit të kaluar një gjë e tillë nuk ndodhi dhe kursi qëndroi në nivele të ulëta, madje Banka e Shqipërisë realizoi blerje me qëllim shmangien e rënies së mëtejshme deri në ditët e fundit të vitit. Me sa duket, këtë vit kërkesa për valutë nga bizneset po shfaqet më e vonuar, në përputhje edhe me ciklin e konsumit në ekonomi dhe rritjen e pritshme të nevojës për importe gjatë muajve në vazhdim.

Pavarësisht rritjes së ditëve të fundit, kursi i euros ngelet në rënie vjetore me afërsisht 5%. Kursi i këmbimit euro-lek e mbylli vitin 2024 në nivelin 98.15 lekë, shumë afër nivelit minimal historik të të gjitha kohërave, të regjistruar në nëntor 2024. Në javët e para të janarit, kursi u shfaq i qëndrueshëm pranë nivelit të 98.2 lekëve, ndërsa në ditët e fundit po shfaq një tendencë të lehtë në rritje.

Vitin e kaluar kursi mesatar i këmbimit euro-lek pësoi rënie për të katërtin vit radhazi dhe preku një minimum të ri historik. Sipas Bankës së Shqipërisë, euro u këmbye mesatarisht vitin e kaluar me 100.71 lekë, niveli më i ulët i regjistruar ndonjëherë. Kursi mesatar i këmbimit të euros me lekun ka rënë me 7.4% krahasuar me vitin 2023.

Analizat e Bankës së Shqipërisë kanë arritur në përfundimin se rritja e flukseve hyrëse i detyrohet kryesisht rritjes së eksportit të shërbimeve dhe sidomos të turizmit, rritjes së investimeve të huaja, veçanërisht në pasuri të paluajtshme, ndërsa në deklarimet e tij Guvernatori Sejko nuk ka përjashtuar as rolin e prurjeve valutore informale.

Të dhënat e bilancit të pagesave treguan se flukset valutore hyrëse edhe për 2024 kanë qenë të larta, por në tërësi deficiti i llogarisë korrente është rritur krahasuar me vitin 2023. Për 9-mujorin 2024 pozicioni i jashtëm i ekonomisë rezultoi në deficit, për një vlerë totale prej 230 milionë eurosh. Ky pozicion është përkeqësuar ndjeshëm krahasuar me një vit më parë, me një rritje prej 9.5 herë të deficitit të jashtëm, por sidoqoftë ky deficit ishte në vlerën e dytë më të ulët historike, pas vitit 2023.

Sipas statistikave të Bankës së Shqipërisë, investimet e huaja direkte vazhdojnë të mbulojnë vlerën e deficitit të llogarisë korrente. Për 9-mujorin 2024, vlera progresive e investimeve të huaja direkte arriti në 1.16 miliardë euro, shifër kjo 6.6% më e lartë krahasuar me të njëjtën periudhë të një viti më parë. Nga ana tjetër, edhe politika fiskale ka luajtur një rol shtesë në forcimin e lekut në kursin e këmbimit.

Suficiti buxhetor rekord në pjesë më të madhe të vitit ka ulur ofertën e monedhës vendase dhe ka shtyrë më tej në rënie kursin euro-lek. Sipas të dhënave të Ministrisë së Financave, për 11-mujorin 2024, suficiti buxhetor kishte blerën rekord të 71.7 miliardë lekëve, në rritje me 90% krahasuar me të njëjtën periudhë të një viti më parë./ Monitor

I dënuar me 21 vite burg në Itali për trafik droge, me kërkesë të Prokurorisë Tiranë gjykata konfiskon pasuritë e Emiljan Burbës me origjinë nga Elbasani.

Bëhet fjalë për 2 godina resorte, me vlerë të paktën 3 mln euro, të dyja në zonën e Vergos dhe Delvinës, në qarkun e Vlorës, për të cilat ai ishte shprehur se i kishte bërë me punën si murator dhe kamionist në vendin fqinj.

Më 23 Shkurt 2023 Prokuroria kishte njoftuar sekuestron e dy pasurive.

Burba ishte shpallur në kërkim nga Interpol Roma, i dënuar me formë të prerë nga Gjykata e Apelit të Torinos për trafik droge.

Ai u arrestua për qëllime ekstradimi më 21 prill 2014, teksa u ndërmor edhe hetimi pasuror nga Prokuroria e Tiranës.

Njoftimi i Prokurorisë:

Me kërkesë të Prokurorisë pranë Gjykatës së Shkallës së Parë të Juridiksionit të Përgjithshëm Tiranë, gjykata konfiskoi pasuritë e shtetasit E.B. dhe të familjarëve të tij, i dënuar në Itali për veprën penale të ‘Trafikimit të drogës’.

Nga hetimet e kryera në kuadër të procedimit pasuror ndaj këtij shtetasi, rezultoi se ai ishte shpallur në kërkim ndërkombëtar nga Interpol Roma, pasi Gjykata e Apelit, në Torino, Itali e dënoi me 21 vite burgim për veprën penale te “Trafikimit te drogës” dhe në datë 21.04.2014, u bë arrestimi i tij me qëllim ekstradimin në Itali.

Ky shtetas në bashkëpunim me persona të tjerë, më datë 03.12.2003 në Romë, ka transportuar dhe mbajtur me qëllim tregtimi, një sasi prej disa kilogramësh heroine, e cila sigurohej nga Shqipëria dhe transportohej në Itali.

Prokuroria provoi se pasuritë që ky shtetas zotëron, nuk justifikohen nga pikëpamja ekonomike dhe dyshohet se rrjedhin nga veprimtaria kriminale. Shtetasi E.B., nuk figuron të ketë qenë i regjistruar në ndonjë Zyrë Rajonale Punësimi në Itali, edhe pse deklaroi se punonte si kamionist apo murator dhe niveli i lartë i jetesës nuk justifikohet nga pikëpamja ekonomike, nga ai apo pjesëtarët e familjes.

Pasuritë dyshohet se janë krijuar me të ardhura nga aktiviteti i paligjshëm i tregëtimit të lëndëve narkotike gjatë periudhës 2003 – 2006, pasi rezulton se e ka kryer këtë aktivitet në mënyrë të përsëritur gjatë këtyre viteve..

Duke vlerësuar se ka të dhëna të mjaftueshme që vërtetojnë aktivitetin kriminal të shtetasit E.B., për veprën penale të parashikuar nga nenet 283 të Kodit Penal dhe se këto pasuri nuk kanë prejardhje të ligjshme si dhe faktin që këto pasuri janë krijuar pas kryerjes së aktivitetit kriminal dhe dënimit të këtij shtetasi, prokuroria kërkoi konfiskimin e pasurive të mëposhtme, dy godina dhe kalimin e tyre në pronësi të shtetit:

-Pasuria e ndodhur në qarkun Vlorë, njësia Delvinë, adresa Vanë, ndërtim pa leje aplikuar për legalizim; dhe

-Pasuria e ndodhur në qarkun Vlorë, njësia Vergo adresa Vane, ndërtim pa leje, aplikuar për legalizim.

Shënim: Disa imazhe gjenden nga interneti, që konsiderohen të jenë në domenin publik. Nëse dikush pretendon pronësinë, ne do të citojmë autorin, ose, sipas kërkesës, do të heqim menjëherë imazhin.

Sot, më 3 nëntor 2024, në tregun valutor, dollari amerikan blihet me 90.2 lekë dhe shitet 91.2 lekë.
Euro sot blihet me 98 lekë, ndërsa në shitje me 98.6 lekë. aundi britanik sot blihet me 116.4 lekë dhe shitet me 117.6 lekë.
Franga zvicerane këmbehet sot në blerje me 103.6 lekë, në shitje me 104.6 lekë.

Dollari kanadez sot në blerje këmbehet me 64.6 lekë dhe në shitje me 66 lekë. Për më tepër ndiqni tabelën e mëposhtme.
Franga zvicerane këmbehet sot në blerje me 103.6 lekë, në shitje me 104.6 lekë.

Studentët që kanë zgjedhur të kryejnë studimet në kryeqytet po përballen më vështirësi të shumta për të gjetur strehim, për shkak se çmimet e qirave kanë pësuar rritje nga viti në vit. Në një intervistë për SCAN TV, ekspertja e pasurive të paluajtshme Armela Spahiu, thekson se përpos çmimeve të larta, studentët hasin vështirësi për shkak edhe se pronarët e apartamenteve kërkojnë klientë për qiradhënie afatgjatë. “Qiratë sigurisht që janë me çmime të larta, nuk po flasim për zonat qendrore të Tiranës, por edhe në zonat periferike të Tiranës qiratë janë me çmime të larta dhe çdo vit çmimet ngrihen.

Por ne po hasim edhe probleme me qiradhënësit, pronarët, sepse nuk kanë dëshirë të akomodojnë studentët, kur bëhen bashkë 2-3 apo 4 studentë në një hapësire që mund të ketë 2-3 dhoma, sepse duan ti japin me qira afatgjatë 1-5 vjeçare dhe në rastin e studentëve ata na refuzojnë në shumë raste sepse mendojnë se studentët vijnë dhe largohen në fund të Korrikut, dëmtojnë shtëpinë dhe nuk janë të rregullt. Megjithatë mua më vjen keq ta shpreh këtë gjë sepse mundemi me të gjithë pronarët që t’i blindimin që këta janë studentë që familjarët e tyre e kanë marrë parasysh ti përballojnë shpenzimet e tyre.” Sipas saj, çmimet për këtë kategori janë bërë të papërballueshme, pasi arrijnë në 700 euro/muaji në zona periferike.

Një ngjarje e pazakontë është regjistruar në Itali, ku një prerja e tortës në një restorant i kushtoi shumë ditëlindjes dhe tashmë historia e përcjellë me një faturë të bërë publike, është kthyer në një polemikë edhe në rrjetet sociale.

Ngjarja e pazakontë ka ndodhur në Arezzo, ku një tortë ditëlindje kushtoi gjithsej 103 euro, pasi vajza që kishte dhe festën e veçantë, shpenzoi 45 euro për ta blerë në një pastiçeri, por më vonë për ta shërbyer në restorant iu desh të paguante edhe 58 të tjera, me një kosto prej 4 euro e gjysmë për secilin nga 13 të ftuarit!

Një sipërmarrës nga Arezzo, ka rrëfyer historinë e ditëve të fundit në një faqe kushtuar qytetit dhe lajmi u publikua edhe nga “La Repubblica” sot.

Në internet, vajza e cila festonte ditëlindjen të enjten e kaluar, tregoi faturën e ‘kripur’.

Ajo kishte shkuar në restorant, pak jashtë Arezzo-s, me 12 persona të tjerë dhe me tortën e blerë diku tjetër dhe që kërkoi ta shërbente në fund të darkës.

Kamerierët ua servirin ëmbëlsirën të ftuarve, por kur erdhi fatura, pati një surprizë të hidhur.

E habitur ajo e ka denoncuar ngjarjen në “Facebook”, duke marrë shumë komente.

Nga ana e tij, restoranti konfirmon se gjithçka është e vërtetë dhe se tarifimi i prerjes së ëmbëlsirave, apo ushqimeve të tjera, të sjella nga klientët nga jashtë ambientit, është rregull i biznesit.

Megjithatë, pronari, i cili mungonte në momentin e incidentit, pranon se “kënaqësia e klientit është e para në biznes dhe se, për rrjedhojë, punonjësit e tij mund të ishin më pak të ngurtë”.