Komisoni Qendror i Zgjedhjeve përdori dy standarde për votuesit me karta Identiteti të skaduara në zgjedhjet e Himarës. Mësohet se rreth 256 qytetarë kanë votuar në zgjedhjet e 4 gushtit në Himarë, ndonëse në sistemin eletronik të identifikimit, ID-t e tyre rezultonin të skaduara. Ka qenë një urdhër i drejtuesve të KQZ, që ka detyruar komisionerët që këta qytetarë, të votonin normalisht. Por nga ana tjetër, më shumë se 6 mijë qytetarëve, me pretendimin se u kishte skaduar ID-ja, iu mohua e drejta e votimit.

Në të njëjtën ditë, që më shumë se 6 mijë qytetaërve të Himarës iu hoq e drejta për të votuar për zgjedhjet e pjesësshme për kryebashkiak me pretendimin se u kishte skaduar karta e identitetit, qindra qytetarë u lejuan të votonin në ato zgjedhjeve edhe pse sistemi Elektronik i Identetifikimit të Zgjedhësve, i nxirrte karta e tyre të skaduara.

Por si qëndron e vërteta?

Në zgjedhjet lokale të 4 gushtit në Himarë, rreth 256 votues arritën të hidhnin votën në kutitë e votimit, ndonëse gjatë kohës që kryen identifikimin elektronik, sistemi PEI i nxirrte kartat e tyre të skaduara. Këta votues, sipas burimeve të sigurta, kishin rinovuar kartat e Identitetit me urgjencë vetëm pak ditë para zgjedhjeve, dhe për rrjedhojë të dhënat e tyre nuk ishin ngarkuar në sistemin PEI nga ana e Komisionit Qendror të Zgjedhjeve. Por me një urdhër verbal, KQZ u ka kërkuar komisionerëve që këta qytetarë të votojnë, pavarësisht se kartat e tyre në sistemin e identifikimit elektronik ishin të skaduara.

Ky rast dëshmon se me vullnet politik, dhe në respekt të frymës së kushtetutës për të garantuar të drejtën e qytetarëve për të votuar, edhe më shumë se 6 mijë qytetarëve të Himarës do t`u ishte garantuar kjo e drejtë. Ky rast rrëzon gjithashtu deklaratat e kreut të KQZ, i cili ditën e zgjedhjeve, deklaroi se nuk kishte pasur dijeni për skadimin e kartave të identitetit për 6 mijë qytetarë, duke i privuar nga e drejta për të votuar.