Drejtori i Departamentit të Laboratorëve Mjeko-Ligjor në Institutin e Mjekësisë Ligjore, Agron Thaqi, ka thënë se trupi i Faton Hajrizit tanimë është identifikuar edhe nga familjarët e tij.

“Mbrëmë rreth orës 1 është pranuar trupi i pajetë, i cili është i Faton Hajrizit. Këtë po e deklarojmë pas urdhrit që është bërë nga prokuroria, respektivisht nga prokurori përgjegjës. Është identifikuar nga familjarët e rastit në pranimin e mjekut kujdestar”, ka thënë Thaqi.

Thaqi ka thënë se sipas konsultimeve në institut është formuar edhe një komision tre anëtaresh për kryerjen e autopsisë, i përbërë nga ekspertët mjekoligjorë.

Ai ka thënë se pas autopsisë trupi do t’u dorëzohet familjarëve.

“Realisht për shkak të ndjeshmërisë së rastit dhe rrethanave, në konsultim edhe me drejtorin e përgjithshëm kemi formuar një komision treantarësh prej ekspertëve mjekoligjorë, që do të kryejnë autopsinë që do të fillojë rreth orës 13:00 në prani të prokurorit dhe familjarëve. Raporti i autopsisë varet, trupi i pajetë pas autopsisë do t’u dorëzohet familjarëve”, ka thënë ai

Miku i Faton Hajrizit, Erkin Morina, po vazhdon të thotë se Fatoni është gjallë. Kjo për shkak që ai nuk beson që ai ka vdekur, derisa nuk e sheh k*fomën e tij.

Morina shprehu shqetësimin e tij se miku i tij, mund të kapet i gjallë dhe të ekzekutohet.

“Besoj që Fatoni ende është gjallë dhe është frika më e madhe që ai mund të gjendet dhe të ekzekutohet dhe më pas skenarin e tyre ta bëjnë realitet”, tha ai në Klan Kosova.

Ai thekson se Serbia ka interes që Faton Hajrizin, ta shpallë “t*rrorist”.

Ministrja e Punëve të Jashtme dhe Diasporës në Kosovë, Donika Gërvalla, ka thënë ende nuk është verifikuar nga autoritetet në Prishtinë se Faton Hajrizi është vrarë në Serbi.

Gërvalla ka thënë se mostra e shenjavë të gishtërinjëve që u dërgua nga Serbia, pas verifikimit në Kosovë u konstatua të jetë e Faton Hajrizit, duke shtuar se “nuk kemi asnjë garancë që bëhet fjalë as për personin e vrarë dhe as për ndonjë prej pretendimeve të tjera”.

“Ne kemi qenë shumë këmbëngulës në kërkesën që trupi i personit të vrarë, kushdo që të jetë ai, t’I kthehet familjes për t’u varrosur në Kosovë. Kemi shpërndarë të gjitha informacionet në kohë me të cilat kemi mundur të pajisjemi gjatë kësaj kohe. Kemi pasur një mostër të shenjave të gishtërinjëve të një personi, i cili pas verfikimit në Kosovë është konstatuar të jetë qytetari i Kosovës, Faton Hajrizi, mirëpo nuk kemi asnjë garancë që bëhet fjalë as për personin e vrarë dhe as për ndonjë prej pretendimeve të tjera”, ka deklaruar Gërvalla.

Gërvalla tha se gjithçka që ka ndodhur në Serbi është ende e paqartë.

“Deri tani gjithçka ka ndodhur në Serbi është në mjegull. Nuk mund t’i themi qytetarëve tanë që kemi informacione të sakta, mirëpo nuk fshehim asnjë prej informacioneve që kemi marrë sepse dëshirojmë që edhe qytetarët dhe mediat të jenë po aq të inforuarr ose të painformuar sa janë edhe institucionet. Pra deri tani kjo është gjendja, pa dashur të paragjykojë asgjë që ka ndodhur në Serbi sepse jam shumë e sigurtë që nuk e dimë të gjithë të vërtetën dhe prandaj të presim se si do të rrjedhin”, ka thënë Gërvalla.

Kryediplomatja deklaroi se kanë kërkuar ndihmën e bashkësisë ndërkombëtare për zbardhjen e së vërtetës për këtë rast.

“I kemi bërë thirrje bashkësisë ndërkombëtare, u kemi bërë thirrje edhe misioneve diplomatike, edhe misionit të BE-së në Beograd që të na ndihmojnë në sqarimin e kësaj çështje, në zbardhjen e së vërtetës, mirëpo nuk mund t’ju jap me shumë siguri dhe me asnjë garancë informacione përtej asaj çfarë kemi deklaruar deri tani”, ka shtuar ajo.

Ndryshe, Kryeministri Albin Kurti e filloi mbledhjen e të mërkurës të Qeverisë, duke u marrë me rastrin e Faton Hajrizit. Ai tha se duhet bërë një hetim kombëtar dhe ndërkombëtar për të zbardhur të vërtetën mbi vrasjen e policit serb.

Ministri i Punëve të Brendshme të Serbisë, Ivica Daçiç deklaroi se policia po heton shkaqet dhe motivin që çoi në vrasjen e policit serb në Loznicë, ku autor i dyshuar ishte shqiptari Faton Hajrizi, i cili u ekzekutua nga policia serbe.

Sipas mediave serbe, Daçiç ka thënë se do të arrestohen të gjitha ata që kanë ndihmuar Hajrizin. Ndër të tjera, Daçiç u shpreh se Serbia do të kërkojë arrestimin e vëllait të Faton Hajrizit, i cili jeton në Gjermani.

“Do të hedhim dritë mbi çdo detaj dhe do të arrestojmë personat që kanë qenë të përfshirë dhe do të kërkojmë nga Gjermania që të arrestojë edhe vëllain e tij dhe të sqarojë historinë rreth dokumenteve të tij, dmth letërnjoftimin gjerman dhe pasaportën e lëshuar nga autoritetet e Kosovës”, theksoi ministri serb