Një vatër zjarri është regjistruar pak minuta më parë në fshatin Lin në Pogradec.

Zjarri ka renë në afërsi te varrezave të fshatit, ndërsa flakët po përhapen. Në vendngjarje po mbërrin ekipi i zjarrfiksës së Pogradecit, ndërsa në afërsi të vatrës ka dhe banesa.

Pritet që situata të vlerësohet dhe të ndërhyet për neutralizimin e flakëve.

Një tjetër vatër zjarri është raportuar mbi Delvinë, në zonën e fshatit Kakodhiq, Njësia Administrative Delvinë. Zjarri ka përfshirë shkurre dhe fier në një sipërfaqe të madhe, poshtë qendrës së banuar të fshatit.

Sipas shërbimit të Mbrojtjes nga Zjarri dhe Shpëtimit në Bashkinë Delvinë, një automjet zjarrfikës dhe një grup shërbimi janë dërguar menjëherë në vendngjarje për të lokalizuar dhe izoluar përhapjen e flakëve. Aktualisht, zona e banuar nuk është e rrezikuar, por era e fortë po vështirëson operacionin.

Ky incident vjen pas një ngjarjeje të ngjashme të ndodhur një ditë më parë, kur flakët përfshinë zonën pranë Varrezave të Dëshmorëve të qytetit. Situata është duke u monitoruar ngushtë, ndërsa autoritetet po bëjnë thirrje për kujdes dhe bashkëpunim për të shmangur dëme të mundshme.