Në Gjykatën e Posaçme ka nisur procesi ndaj ish-ministrit të Mbrojtjes, Fatmir Mediu. Gjatë seancës, Mediu ka paraqitur kundërshtimet në lidhje me akt-ekspertiza tekniko-ushtarake.

“Ekspertët e thirrur nga prokuroria ishin në nivel të ulët ushtarak. Gjatë procesit disa ushtarakë të lartë i kanë kundërshtuar këta ekspertë. Në këtë sallë prokurori deklaroi se nuk kishte njohuri për kalibrat se ishte jurist.

Procedimi penal është ngritur në mënyrë të qëllimshme nga Prokuroria e kohës për ministrin e Mbrojtjes. Ministri nuk merret me çështje ushtarake. Përgjegjësia për këto çështje i takon Shefit të Shtabit të Përgjithshëm dhe stafit ushtarak. Ministri i Mbrojtjes është civil”, ka thënë Mediu në seancë.

Sot shënohen 17 vite nga shpërthimi tragjik në Gërdec, ku 26 persona humbën jetën dhe rreth 300 u plagosën në fabrikën e demontimit të armëve më 15 mars 2008.

Familjarët e viktimave vijojnë të kërkojnë drejtësi, ndërsa procesi gjyqësor ndaj ish-ministrit të mbrojtjes, Fatmir Mediu, po zvarritet. Ndërkohë, SPAK ka hapur një çështje për korrupsion dhe pastrim parash, duke synuar identifikimin e përgjegjësve kryesorë, përfshirë ish-kryeministrin Sali Berisha dhe djalin e tij, Shkëlzen Berisha.

Pavarësisht dënimeve të dhëna në vitin 2012 për disa nga të pandehurit kryesorë, asnjë nuk është sot në qeli dhe askush nuk është dënuar për vrasje. Familjarët e viktimave e quajnë vendimin të turpshëm dhe kërkojnë që drejtësia të mos mbetet peng i politikës.