Gjatë gjashtë ditëve të gjykimit, Prokuroria ka paraqitur katër dëshmi dhe prova si nxjerrje telefonike (mesazhe, fotografi, video, dokumente) që tregojnë veprimet e të pandehurve për kryerjen e dyshuar të krimit.

Tetë persona fizikë dhe tre persona juridikë përballen me një proces gjyqësor në Kompleksin Gjyqësor Verior të Kuitos për veprën penale të dyshuar të pastrimit të parave. Të pandehurit akuzohen nga Prokuroria e Përgjithshme se i përkasin një rrjeti kriminal të shqiptarit Dritan Gjika, i cili është i arratisur nga drejtësia.

Sipas Prokurorisë, të dyshuarit do të kishin përdorur para nga trafiku i drogës për blerjen dhe shitjen e produkteve bujqësore, pasurive të paluajtshme, automjeteve, makinerive të rënda, artikujve luksoz dhe produkteve të mishit. Për ta bërë këtë, ata do të kishin krijuar kompani që funksiononin si mbulesë për aktivitetet e paligjshme.

Shuma e përfshirë në pastrimin e pretenduar të parave midis 2015 dhe 2023 do të ishte 43,468,059 USD.

Katër gazetarë rusë dolën të mërkurën para një gjykate në Moskë nën akuzën se kanë punuar për organizatën kundër korrupsionit, e themeluar nga politikani i ndjerë opozitar, Alexei Navalny, e shpallur nga autoritetet organizatë ekstremiste, në vitin 2021.
Antonina Favorskaya, Artyom Kriger, Sergey Karelin dhe Konstantin Gabov u arrestuan në fillim të këtij viti dhe ndaj tyre u ngrit akuza për bashkëpunim me një organizatë ekstremiste. Nëse shpallen fajtor ata mund të dënohen me deri në gjashtë vjet burg. Të katër gazetarët i kanë hedhur poshtë akuzat.

Gjyqi, i cili po mbahet me dyer të mbyllura, është rasti më i fundit në përpjekjet e shumta të Kremlinit për të shtypur mospajtimet. Këto përpjekje kanë arritur nivele të pashembullta pas nisjes së agresionit rus në Ukrainë, para më shumë se dy vitesh. Autoritet kanë goditur politikanë opozitarë, gazetarë të pavarur, aktivistë dhe qytetarë e të thjeshtë, që janë kritikë ndaj Kremlinit. Qindra prej tyre janë burgosur dhe janë përballur me akuza penale. Mijëra të tjerë janë larguar nga vendi nga frika e përndjekjes nga autoritetet.

Zoti Navalny ishte kundërshtari më i ashpër dhe më i njohur i Presidentit Vladimir Putin. Ai ka bërë fushatë pandërprerë kundër korrupsionit në Rusi. Në muajin shkurt, zoti Navalni vdiq në një burg në Arktik ndërsa kryente një dënim prej 19 vitesh. Ndaj tij rëndoni shumë akuza, përfshirë edhe atë se udhëhiqte një grup ekstremist, akuza që ia i kishte hedhur poshtë si të motivuara politikisht.

Gazetarët Favorskaya dhe Kriger kanë punuar për faqen e pavarur të internetit “SotaVision”, që mbulon protestat dhe proceset politike.
Zoti Gabov është producent që ka punuar për disa organizata mediash, përfshirë agjencinë e lajmeve ‘Reuters’.
Gazetari Karelin është video gazetar që ka punuar për agjenci të ndryshme perëndimore, duke përfshirë agjencinë e lajmeve “Associated Press”.

Ndërsa dërgoheshin për në dhomën ku do të mbahej seanca gjyqësore, një grup i mbështetësve i përfshëndeti ata duke i duartrokitur.
Në sallën e gjyqit, të katër u buzëqeshën familjarëve të tyre nga një kafaz xhami ku mbahën të pandehurit.
Duke iu drejtuar gazetarëve nga kafazi prej xhamit, zoti Kriger e cilësoi rastin kundër tij dhe kolegëve të tij gazetarë si një paralajmërim dhe u kërkoi gazetarëve që janë ende në Rusi të largoheshin nga vendi: “Nuk është shaka, çdo individ mund të akuzohet për çdo gjë”.

Zonja Favorskaya, nga ana tjetër, foli me shpresë: “Gjithçka që po ndodh tani, errësira që na rrethon, nuk do të vazhdojë përgjithmonë dhe ne patjetër do të shohim një ditë vendin ashtu siç e ëndërroi Alexei (Navalny), ne patjetër do të jetojmë në një vend ku të drejtat dhe liritë do të (respektohen) dhe gazetarët dhe njerëzit e tjerë nuk do të burgosen për pikëpamjet e tyre.”
Menjëherë pas fillimit të seancës, gjyqtari ka urdhëruar që procesi të zhvillohet me dyer të mbyllura me kërkesë të prokurorisë edhe pse mbrojtja e ka kundërshtuar këtë kërkesë./VOA

Capital T ka ndarë një lajm të rëndësishëm me ndjekësit e tij në llogarinë e Instagramit.

Reperi bën të ditur se ka për të hedhur në gjyq për shpifje gazetarin Robert Bojaj.

Ky i fundit deklaroi gjatë emisionit bashkë me një të ftuar se Capital T i ka kërkuar një artisti, pa përmendur emër, 50 mijë euro për të realizuar një këngë me të.

Në postimin e tij, reperi shkruan: “Rastësisht e pash emisionin e një gazetari që e ka emrin Robert Bojaj, që më njeh dhe ka kontakt me mua. Ai po pretendon se unë i kam kërkuar një x artisti 50.000 euro për bashkëpunim, këto janë komplet shpifje dhe rrena. Kurrë në jetën time nuk i kam lyp askujt para për bashkëpunim. Sepse unë muzikën e bëj për qejf dhe e bëj me njerëzit që më kanë pëlqyer çfarë bëjnë dhe më ka pëlqyer muzika e tyre. Dhe kam bërë muzikë për qejf, s’kam bërë muzikë për të marrë para. Kështu që ti e ke pasur mundësinë Robert të më thërrasësh dhe ta konfirmosh, por tani s’ke më punë, i ke hapur probleme dhe atij djalit që e vure në siklet me zor u mundove të ja nxirrje fjalët, keni për të shkuar të dy në Gjykatë për prishje imazhi! Edhe tani vërtetë keni për të paguar nga 50.000 euro të dy!”

Javën që shkoi përfundoi faza e dëgjimit të dëshmive në gjyqin penal ndaj ish-Presidentit Donald Trump i akuzuar për manipulim të të dhënave të biznesit. Gjyqi rifillon përsëri nesër më 28 maj, me paraqitjen e argumenteve mbyllëse nga prokuroria dhe avokatët mbrojtës. Pas kësaj juria tërhiqet për të marrë vendim nëse ish-presidenti do të shpallet fajtor ose jo.

Ja çfarë duhet të pritet në ditët në vijim:

ÇFARË NDODH GJATË PARAQITJES SË ARGUMENTEVE MBYLLËSE?

Duke filluar nga mëngjesi i së martës, prokurorët dhe avokatët mbrojtës do të kenë mundësinë e tyre të fundit për t’iu drejtuar jurisë në fjalimet përfundimtare që pritet të zënë pjesën më të madhe të ditës.

Argumentet përmbyllëse nuk llogariten si prova lidhur me çështjen ndaj zotit Trump i akuzuar për falsifikim të të dhënave të biznesit, me synimin për të fshehur pagesat bëra yllit të filmave pornografik, Stormy Daniels, e cila pretendon se ka patur një marrëdhënie seksuale me zotin Trump.

Qëllimi i argumenteve përmbyllëse është që avokatët t’u rikujtojnë anëtarëve të jurisë ato që i vlerësojnë si pika kyçe të procesit. Më pas juria do të tërhiqen për të marrë një vendim mbi çështjen.

Prokurorët pritet që t’u kujtojnë anëtarëve të jurisë se duhet t’u besojnë dokumenteve financiare që ata kanë parë dhe asaj që kanë thënë dëshmitarët, përfshirë zonjën Stormy Daniels, rrëfimi i së cilës për një takim të dyshuar seksual me zotin Trump është në qendër të çështjes. Po kështu prokuroria do t’u kujtojë atyre edhe dëshminë e ish avokatit personal të zotit Trump, Michael Cohen, i cili tha se ish Presidenti ishte i përfshirë drejtpërdrejt në dhënien e parave për të blerë heshtjen e zonjës Daniels duke miratuar pagesat.

Vlen të kujtohet se mbrojtja, e cila thirri vetëm dy dëshmitarë, por jo ish Presidentin Trump, nuk duhet të provojë asgjë ose të bindë anëtarët e jurisë për pafajësinë e zotit Trump.

Për të parandaluar një dënim, mbrojtjes i duhet thjesht të bindë të paktën një anëtarë jurie, që prokurorët nuk e kanë vërtetuar me ato që kanë ofruar si fakte, se ish presidenti është fajtor.

Pritet që mbrojtja të përpiqet të nxisë dyshime mbi argumentet e prokurorisë duke kundërshtuar dëshminë e zonjës Daniels lidhur me takimin e dyshuar seksual me zotin Trump. Ata do të bëjnë përpjekje për ta distancuar zotin Trump nga skema e pagesave prej 130,000 dollarësh që zoti Cohen i bëri aktores së filmave pornografik Stormy Daniels.

Mbrojtja gjithashtu mund të ripërsërisë qëndrimin se ish Presidenti Trump ishte më i shqetësuar të mbronte familjen e tij nga histori banale dhe jo sepse ndihej i rrezikuar se nuk do të fitonte zgjedhjet.

Mbrojtja padyshim do të sulmojë besueshmërinë e zotit Cohen, i cili është deklaruar fajtor në akuzat federale lidhur me pagesën bërë zonjës Daniels. Rezultati përfundimtar varet jo pak nga ajo sa do ta besojnë anëtarët e jurisë dëshminë e zotit Cohen.
Përpara se juria të tërhiqet për vendim, gjykatësi i çështjes Juan M. Merchan pritet të shpenzojë rreth një orë për të udhëzuar anëtarët e saj se çfarë duhet të kenë parasysh bazuar në parashikimet ligjore mbi çështjen, teksa vlerësojnë nëse ish ish-presidenti republikan është fajtor ose jo.

Prokurorët dhe avokatët mbrojtës zhvilluan një debat të ashpër javën e kaluar pa praninë e jurisë, ndërsa kërkuan të bindin gjyqtarin Merchan mbi udhëzimet që duhet të jepte.

Ekipi i zotit Trump, për shembull, kërkoi që në udhëzimet që i jepeshin jurisë, anëtarët e saj të informoheshin se pagesat që lidhem me këtë çështje nuk janë në thelb të paligjshme, një kërkesë që prokurori e quajti “tërësisht të papërshtatshme”. Nga ana e tij zoti Merchan tha se një udhëzim i tillë është i panevojshëm.

Ekipi i zotit Trump i kërkoi gjithashtu zotit Merchan të merrte parasysh natyrën “jashtëzakonisht të rëndësishme” të çështjes kur jepte udhëzimet e tij dhe t’i nxiste anëtarët e jurisë të arrinin në përfundime shumë të qarta. Prokurorët e kundërshtuan gjithashtu këtë gjë dhe zoti Merchan tha se do të ishte gabim të devijohej nga udhëzimet standarde.

“Kur thoni se është një rast shumë i rëndësishëm, më kërkoni të ndryshoj ligjin, por unë nuk do ta bëj një gjë të tillë”, tha gjyqtari Merchan.

PASI JURIA NIS SHQYRTIMIN E ÇËSHTJES

Diskutimet e anëtarëve të jurisë do të vazhdojnë në fshehtësi, në një dhomë të rezervuar posaçërisht për ta.

Ata mund të komunikojnë me gjykatën përmes shënimeve që kërkojnë nga gjyqtari, për shembull, udhëzime ligjore ose që t’u lexohen fragmente të veçanta të dëshmisë. Por pa e ditur se çfarë po i thonë anëtarët e jurisë njëri-tjetrit, do të jetë e vështirë të kuptohet shumë nga përmbajtja e këtyre shënimeve.

Askush mund ta hamendësojë se sa kohë do t’i duhet jurisë të vendosë ndërsa lidhur me këtë çështje nuk ka asnjë kufizim kohor. Jurisë i duhet të shqyrtojë 34 akuza për falsifikim të të dhënave të biznesit e për këtë shkak një vendim mund të mos dalë deri në fund të javës.

Për të marrë një vendim, qoftë fajtor ose jo fajtor, e që gjykatësi ta pranojë, duhet që të 12 anëtarët e jurisë të pajtohen e kenë një qëndrim.

Situata do të ndërlikohej nëse juria nuk të arrinte konsensus pas disa ditësh diskutimesh. Megjithëse avokatët mbrojtës mund të kërkonin menjëherë një gjyq të ri, për shkak të mungesës së vendimmarrjes, gjyqtari Merchan me gjasë do t’i bënte edhe një herë thirrje anëtarëve e jurisë që të vazhdonin përpjekjet për një vendim, duke qenë të gatshëm të rishqyrtonin qëndrimet e tyre.

Nëse edhe pas atij udhëzimi, juria nuk do të arrinte të merrte një vendim, procesi gjyqësor do të konsiderohej “i pavlefshëm”, duke i hapur rrugë një procesi gjyqësor të ri, me të njëjtat palë dhe akuza, por me një juri të re./ VOA

Në datën 18 Janar, gjyqtari i posaçëm Erjon Çela do të shqyrtojë kërkesën e SPAK për të marrë të pandehur ish-zv/Kryeministrin Arben Ahmetaj, për dyshimet se ka shpërdoruar detyrën në privatizimin e ish-fabrikës së bukës.about:blank

Kjo do të jetë përballja e parë e Ahmetaj me Prokurorinë e Posaçme në Gjykatë, për cilësinë e hetimeve dhe akuzat, të cilat i ka mohuar në disa postime në rrjetin e tij social Facebook.

Gjykata ka ftuar të dyja palët që në orën 09:00 të kësaj date të paraqiten për të përballur qëndrimet e tyre në lidhje dyshimet e ngritura nga prokuroria.

Kjo e fundit thotë se Ahmetaj ka shitur si pronë shtetërore fabrikën e bukës, ndërkohë që shkallët e gjyqësorit i kishin njohur të drejtën e pronësisë një familje.

Me anë të reagimeve ne rrjetet sociale, nga arratia, ish-zëvendëskryeministri, i cili pritet që në seancë të përfaqësohet nga avokatët e tij, pretendon se në këtë rast ka mbrojtur interesat e shtetit dhe nuk asnjë dëm të shkaktuar si pasojë e veprimeve të tij si ministër.

Kjo është dosja e parë ndaj ish-ministrit që shkon për gjykim me akuzë të ngritur, teksa ai vijon të jetë nën hetim në një tjetër dosje ajo e inceneratorit me dyshimet se është përfshirë në korrupsion dhe pastrim parash.