Kolegji i Posaçëm i Apelimit vendosi sot shkarkimin nga detyra të gjyqtares së Vlorës, Mirela Mishgjoni, e cila ishte konfirmuar më parë nga Komisioni i Pavarur i Kualifikimit.

Drejtuesi i SPAK Altin Dumani që ka zëvendësuar në procesin e vetingut Komisionerin Publik, pas mbarimit të mandatit të këtij të fundit, i kishte kërkuar Kolegjit ndryshimin e vendimit të KPK-së dhe shkarkimin e vendimit të gjyqtares Mishgjoni, për shkak të problemeve me pasurinë.

Sipas tij, gjyqtarja ishte në pamundësi të vërtetimit të ligjshmërisë së të ardhurave të bashkëshortit të subjektit nga shitja e aktivitetit në Itali, nga shitja e një fabrike vaji në Shqipëri në vitin 1997, si dhe ato të përfituara po prej bashkëshortit nga puna si shef kuzhine në Vlorë, pasi nuk ishin paguar detyrimet tatimore.

Për të ardhurat nga shitja e fabrikës në ’97-ën, u konstatua se ato as nuk ishin deklaruar si burime në vite, as në deklaratën veting. Në vendimin e sotëm, KPA vlerësoi se Mishgjoni ishte e pabesueshme për kriterin e vlerësimit të pasurisë, gjendej e papërshtatshme për të vijuar detyrën dhe e shkarkoi atë duke votuar unanimisht.

‘Trupi gjykues i Kolegjit të Posaçëm të Apelimit, i përbërë nga Natasha Mulaj kryesuese, Albana Shtylla relatore, Mimoza Tasi, Rezarta Schuetz, Sokol Çomo anëtarë, shpalli vendimin për çështjen nr. 27/2024, datë 18.07.2024, që i përket ankimit të Komisionerit Publik kundër vendimit të Komisionit të Pavarur të Kualifikimit nr. 754, datë 05.04.2024, që lidhet me subjektin e rivlerësimit Mirela Mishgjoni.

Në përfundim të gjykimit, trupi gjykues, bazuar në nenin 66, pika 1, shkronja “b” e ligjit nr. 84/2016, “Për rivlerësimin kalimtar të gjyqtarëve dhe prokurorëve në Republikën e Shqipërisë”, në mënyrë unanime, vendosi: Ndryshimin e vendimit të Komisionit të Pavarur të Kualifikimit nr. 754, datë 05.04.2024 dhe shkarkimin nga detyra të subjektit të rivlerësimit Mirela Mishgjoni’, thuhet në vendim.

E shoqëruar nga forcat e policisë, ish-gjyqtarja e Elbasanit, Pajtime Fetahu dhe avokati i saj u paraqitën këtë të premte në Gjykatën e Posaçme, aty ku togat e zeza i komunikuan masën e sigurisë “arrest në shtëpi” për akuzën e korrupsionit.

Ish-gjyqtarja ishte mes 33 urdhërarresteve të lëshuara nga SPAK, në kuadër të operacionit “Plumbi i artë” 2 ku u godit grupi kriminal i drejtuar nga vëllezërit, Franc dhe Hajdar Çopja.

Seanca për ish-magjistraten u zhvillua e veçuar nga pjesa tjetër e të akuzuarve, teksa përpara togave të zeza Pajtime Fetahu mësohet të ketë pretenduar se nuk ka dijeni për atë që e akuzojnë. Pasi u la në fuqi masa e sigurisë caktuar ndaj saj, ish-gjyqtarja nuk preferoi të flasë për mediat.

Po në të njëjtën seancë me ish-gjyqtaren, trupa gjykuese e GJKKO la në fuqi dhe masën për ndalim dalje jashtë vendit për sekretaren e saj, gjithashtu pjesë e kësaj çështje.

Ndërkohë me masën e sigurisë janë njohur dhe 11 të arrestuarit e tjerë po në kuadër të këtij operacioni. Nga 33 urdhër arreste, 13 janë ekzekutuar në Shqipëri, ndërsa 2 të tjera në qelitë e burgut jashtë vendit.

Mes tyre dhe masa e sigurisë arrest me burg ndaj Franc Çopjas, i konsideruar nga SPAK si një nga krerët e grupit kriminal që akuzohen si porositës të 6 vrasjeve, 2 grabitjeve e disa tentativa ekzekutimesh.

Tv Klan