Një tjetër tërmet me magnitudë 4.4 i shkallës Rihter është regjistruar mëngjesin e së dielës në Evia, me epiqendër pranë zonës së Prokopit.

Lëkundja, e regjistruar në orën 08:56, u ndje edhe në zonat përreth, përfshirë Atikën. Sipas përditësimit nga Instituti Gjeodinamik i Greqisë, tërmeti kishte një magnitudë prej 4.4 Rihter, me epiqendër 1 kilometër në lindje të Prokopit dhe me një thellësi fokale prej 15.7 kilometrash.

Më vonë, në orën 09:31, u regjistrua edhe një lëkundje pasuese me magnitudë 3.5 ballë.

Ndërkohë, në orët e para të mëngjesit, konkretisht në orën 01:52, një tjetër tërmet me magnitudë 4.1 Rihter tronditi pjesën veriore të Evias. Epiqendra ishte 3 kilometra në lindje të Prokopit, ndërsa thellësia fokale ishte 14.4 kilometra.

Edhe ky tërmet u ndje në Atikë dhe në rajonin e Ftiotidës. Sipas Institutit Euro-Mesdhetar tërmeti i mëngjesit është matur me magnitudë 4.5 të shkallës Rihter.

Nuk raportohet për dëme materiale apo të lënduar deri në këto momente.

Një ngjarje e rëndë kë ndodhur në rrugën “Myslym Keta” në Tiranë, ku dy të rinj kanë goditur me sende të forta një 34-vjeçar.

Sipas informacioneve paraprake, në pranga kanë rënë shtetasi me iniciale Xh. T., 19 vjeç dhe një shtetas 17 vjeçar, pasi gjatë një konflikti për motive të dobëta, kanë goditur me sende të forta shtetasin me iniciale J. Gj., 34 vjeç, i cili ndodhet në spital, në kujdesin e mjekëve.

Mësohet se gjatë kontrollit në banesën e 19-vjeçarit u gjet dhe u sekuestrua 1 mjet prerës (thikë).

“Komisariati i Policisë Nr. 4 arrestoi në flagrancë shtetasin Xh. T., 19 vjeç dhe një shtetas 17 vjeç, pasi në rrugën “Myslym Keta”, gjatë një konflikti për motive të dobëta, kanë goditur me sende të forta shtetasin J. Gj., 34 vjeç, i cili ndodhet në spital, në kujdesin e mjekëve. Gjatë kontrollit në banesën e shtetasit Xh. T., u gjet dhe u sekuestrua 1 mjet prerës (thikë)”, njofton policia.

Shënim: Disa imazhe gjenden nga interneti, që konsiderohen të jenë në domenin publik. Nëse dikush pretendon pronësinë, ne do të citojmë autorin, ose, sipas kërkesës, do të heqim menjëherë imazhin.

Dronet ukrainase kanë goditur një depo nafte në rajonin Bryansk të Rusisë, duke shkaktuar dëme të konsiderueshme në objekt.

Depoja në fjalë është një komponent kyç i infrastrukturës energjetike të Rusisë, e cila luan një rol të rëndësishëm në furnizimin e Evropës me naftë.

Kjo depo është e lidhur me tubacionin strategjik Druzhba, një nga tubacionet më të mëdhenj dhe më të rëndësishëm në botë për transportin e naftës.

Tubacioni Druzhba, që në gjuhën ruse do të thotë “miqësi”, është një arterie kryesore që dërgon pothuajse të gjithë naftën ruse dhe kazake në tregjet evropiane. Ndërprerjet në funksionimin e saj mund të kenë pasoja të mëdha ekonomike dhe politike, duke rritur tensionet tashmë të larta në rajon.

Një stuhi e madhe shkaktoi reshje dëbore dhe shiu në Kaliforni, duke çuar në rrëshqitje dheu dhe përmbytje në disa akse rrugore, ndërsa në anën tjetër të vendit të shtunën u dhanë paralajmërime për stuhi në zonat të tjera të Shteteve të Bashkuara.

Një tjetër stuhi pritet të mbërrijë gjatë javës së festës së Ditës së Falënderimeve, sipas Torry Dooley, meteorolog i Shërbimit Kombëtar të Motit.

Ultësira perëndimore amerikane deri në pjesën që njihet si “Great Lakes”, pranë Kanadasë, do të përfshihen nga reshje shiu dhe dëbore të hënën, ndërsa në brigjet lindore amerikane pritet përkeqësim i motit gjatë ditës së festës, të enjten.

Zonat nga Bostoni deri në Nju Jork mund të përballen me reshje dhe erëra të forta. Në pjesët veriore të Nju Hampshërit dhe Meinit mund të bjerë dëborë.

Stuhia goditi pjesën Veriperëndimore të Shteteve të Bashkuara në fillim të kësaj jave, duke shkaktuar vdekjen e dy personave dhe lënë pa energji elektrike mijëra vetë, kryesisht në zonën e Siatëllit, përpara se erërat e forta të zhvedosesin drejt Kalifornisë Veriore.

Brigjet perëndimore amerikane u goditën të martën nga një “ciklon bombë”, i cili ndodh kur një ciklon intensifikohet me shpejtësi. Erërat e forta rrëzuan pemë, dëmtuan makina dhe shtëpi.

Reshjet e shiut në Santa Rosa të Kalifornisë vazhduan për tre ditë me radhë, sipas Shërbimit Kombëtar të Motit.

Ndërkohë në brigjet lindore amerikane, ku disa zona në Nju Jork dhe Nju Xhersi ishin përfshirë nga zjarret, stuhia me reshje shiu u mirëprit nga banorët. Pjesë të Pensilvanisë u zbardhën nga reshje të mëdha bore.

Në disa pjesë të Virxhinias Perëndimore reshjet dëborës arritën deri në 61 centimetra dhe u shoqëruan me erëra të forta./ VOA

Një 16-vjeçar ka mbetur i plagosur rreth orës 13:20 të ditës së sotme në lagjen nr. 10 në Korçë. Policia njofton se gjatë një konflikti të çastit, shtetasi R. Ç., 21 vjeç dhe 2 shtetas ende të paidentifikuar kanë goditur me mjet prerës (thikë) dhe me përforcues grushti 16-vjeçarin.

I mituri po merr mjekim në spital dhe është jashtë rrezikut për jetën.

Shërbimet e Policisë po punojnë për kapjen e autorëve të dyshuar, të cilët dyshohet se janë larguar me automjet.

Grupi hetimor vijon punën për identifikimin e 2 shtetasve të tjerë të përfshirë në konflikt dhe për sqarimin e rrethanave të konfliktit.