Komisariati i Policisë Nr. 3, në bashkëpunim me Komisariatin e Policisë Nr. 2 dhe Nr. 6, ka finalizuar operacionin policor të koduar “Falco”, për goditjen e veprimtarisë kriminale në fushën e vjedhjes së pasurisë. Gjatë operacionit janë zbardhur dhe dokumentuar 11 raste vjedhjesh, si dhe një rast tjetër i mbetur në tentativë.

Në kuadër të këtij operacioni, është arrestuar shtetasi M. K., 26 vjeç, banues në Tiranë, i dyshuar si autor i këtyre vjedhjeve. Hetimet e policisë kanë zbuluar se ky person është i përfshirë në vjedhjen e sendeve me vlerë, kryesisht nga automjetet dhe skutera elektrikë, si dhe ka vjedhur shuma parash dhe sende të tjera të vlefshme.

Gjatë arrestimit të 26-vjeçarit, shërbimet e Policisë kanë sekuestruar gjithashtu një sasi të dyshuar narkotike, kanabis, që iu gjet gjatë kontrollit fizik të tij.

Në vijim të hetimeve, po punohet për zbardhjen e detajeve të tjera lidhur me aktivitetin kriminal të M. K., ndërsa ai ka përfunduar në pranga dhe do të përballet me akuzat për vjedhje pasurie dhe mund të ketë lidhje me raste të tjera të ngjashme.

Shënim: Disa imazhe gjenden nga interneti, që konsiderohen të jenë në domenin publik. Nëse dikush pretendon pronësinë, ne do të citojmë autorin, ose, sipas kërkesës, do të heqim menjëherë imazhin.

Një 33-vjeçar me iniciale E. B., është arrestuar nga Policia e Elbasanit pasi dyshohet për 3 vjedhje në këtë qytet. Policia bën me dije se janë zbardhur 3 raste të vjedhjes në banesa të kryera nga ky person, teksa një rast ka mbetur në tentativë për vjedhje. Sipas njoftimit të bluve, mësohet se 33-vjeçari i arrestuar është me precedentë të mëparshëm kriminal në fushën e vjedhjes së pronës.

“Si rezultat i veprimeve hetimore dhe operacionale të kryera me qëllim zbardhjen e rasteve të vjedhjes së pronës dhe pasurisë, identifikimin dhe kapjen e autorëve të dyshuar, shërbimet e Komisariatit të Policisë Elbasan, në kuadër të operacionit policor të koduar “Përsëritësi”, kapën dhe ndaluan shtetasin E. B., 33 vjeç, banues në Elbasan.

Nga veprimet hetimore dyshohet se 33-vjeçari është autor i 3 rasteve të vjedhjes në banesa konkretisht:

-më datë 05.12.2024 ka vjedhur bizhuteri në banesën e shtetasit D. V.;
-më datë 03.12.2024 ka vjedhur bizhuteri në banesën e shtetasit E. D.;
-më datë 07.12.2024 ka vjedhur një shumë të konsiderueshme parash në banesën e shtetasit F. K..

Gjithashtu, 33-vjeçari ka tentuar të vjedhë në dyqanin ushqimor në pronësi të një shtetaseje, në lagjen “Skënderbej”.

Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Elbasan, për veprime të mëtejshme.”, thuhet në njoftimin e policisë.

Një ngjarje e rëndë ka ndodhur sot në Ferizaj të Kosovës.

Mediat në Kosovë raportojnë se një grua ka humbur jetën në mënyrë tragjike. Viktima është qëlluar me armë zjarri nga ish-bashkëshorti i saj.

Kryeprokurori në Ferizaj, Shukri Jashari, tha se dyshohet që gruaja është vrarë nga ish-bashkëshorti i saj pas një mosmarrëveshje.

“Për momentin nuk kemi informacione, mirëpo dyshojmë që motivi është te një mosmarrëveshje mes ish-bashkëshortëve. Ata janë takuar afër Qendrës për Punë Sociale dhe aty ka ndodhur rasti. Personi [ish-bashkëshorti] është arrestuar”, tha kryeprokurori.

Një 51-vjeçar është vënë në prangat e policisë këtë të enjte, pasi në një nga urbanët në kryeqytet, ka tentuar të vjedhë një shtetase. Pasi është pikasur nga qytetarët në urban duke vjedhur, ai është arratisur nga dritarja e urbanit duke dhuruar spektakël.

Ngjarja ka ndodhur në rrugën “Panorama”, ndërsa i arrestuari është banues në Kashar.

“Në lidhje me një video të publikuar në rrjete sociale, në të cilën shfaqet një shtetas duke dalë nga dritarja e një autobusi, ju informojmë se:

Sot, rreth orës 10:30, është marrë njoftim se në një autobus që lëvizte në rrugën “Panorama”, një shtetas kishte tentuar të vidhte një shtetase. Shërbimet e Policisë kanë kaluar menjëherë në adresën e dhënë dhe kanë shoqëruar në Komisariat, shtetasin P. Zh., 51 vjeç, banues në Kashar, për veprime të mëtejshme.

Në lidhje me këtë rast, deri tani nuk ka asnjë kallëzues. Po punohet për dokumentimin e plotë ligjor të këtij rasti”, bëri me dije policia.