Nënpresidentja Kamala Harris ka pranuar një ftesë nga rrjeti televiziv CNN për të marrë pjesë në një debat tjetër përballë rivalit Donald Trump më 23 tetor, ndërsa i ka kërkuar kandidatit republikan që të përballet me të, tha të shtunën ekipi i fushatës së kandidates demokrate.

“Donald Trumpi nuk duhet ta ketë problem të pajtohet për këtë debat”, tha në një deklaratë Jen O’Malley Dillon, drejtuesja e fushatës së kandidates Harris.

I pyetur nëse do të pranohej ftesa, një zëdhënës i fushatës së kandidatit Trump iu referua deklaratave të mëparshme të ish-presidentit se nuk do të kishte më debate.

Kandidatët Harris dhe Trump zhvilluan një debat për herë të parë më 10 shtator, i cili sipas anketimeve u fitua nga nënpresidentja.

Ish Presidenti Trump zhvilloi një debat me Presidentin Biden në qershor dhe pas paraqitjes së dobët zoti Biden u tërhoq nga gara për një mandat të dytë në Shtëpinë e Bardhë./VOA

Donald Trump ka refuzuar një ftesë për një debat të ri me rivalen e tij demokrate Kamala Harris përpara zgjedhjeve presidenciale.

“Është tepër vonë për të mbajtur një debat tjetër, votimi tashmë ka filluar”, tha Trump gjatë një tubimi të fushatës në Karolinën e Veriut.Më herët sot, stafi i Kamala Harris njoftoi se nënpresidentja e SHBA kishte pranuar një ftesë nga CNN për të marrë pjesë në një debat më 23 tetor.

“Donald Trump nuk duhet ta ketë problem të pajtohet me këtë debat. Është e njëjta formë dhe kornizë si debati i CNN ku ai mori pjesë dhe u shpall fitues në qershor, kur ai lavdëroi moderatorët, rregullat dhe vlerësimet e CNN”, tha menaxherja e fushatës Kamala Harris Jen O’ Maley Dillon.

Ukraina përballet me perspektiva jashtëzakonisht të ndryshme nën një presidencë të mundshme të kandidatëve Donald Trump apo Kamala Harris. Ndërsa fushata e zgjedhjeve presidenciale po i afrohet fundit, asnjëri nga kandidatët nuk ka përcaktuar saktësisht se si planifikojnë të merren me luftën e Rusisë kundër Ukrainës. Siç njofton korrespondentja e Zërit të Amerikës, Anita Poëell, ekspertët thonë se në të njëjtën periudhë, vetë beteja në Ukrainë ka ndryshuar rrënjësisht, duke i dhënë më shumë pushtet Ukrainës në përcaktimin e fatit të saj.

Analistët kanë qëndrime të ndryshme për të ardhmen e Ukrainës nëse kandidati republikan për President Donald Trump fiton një mandat të dytë. “Mendohet gjerësisht se kthimi i Trump-it në Shtëpinë e Bardhë nuk është skenari më i mirë për Ukrainën, megjithëse ka edhe mendime të tjera se gjëndja mund të mos jetë aq keq”, thotë Oleksiy Melnyk nga organizata ukrainase ‘Razumkov’. Ish Presidenti Trump ka thënë se do t’i japë fund luftës me shpejtësi edhe pse kandidati i tij për Nënpresident, JD Vance, më parë ka thënë se ‘nuk i intereson’ Ukraina duke i bërë ukrainasit të pasigurt se çfarë të mendojnë.

Zëvendëspresidentja e SHBA-së dhe kandidatja demokrate për president Kamala Harris ka mbledhur 540 milionë dollarë në donacione për fushatën që nga shpallja e papritur e kandidaturës së saj më 21 korrik.

Kryetarja e fushatës së Harris, Jen O’Malley Dillon e bëri njoftimin pas konventës së Partisë Demokratike në metropolin Midwestern të Çikagos, sipas The Hill online.

Dillon njoftoi se fushata e Harris mblodhi 82 milionë dollarë shtesë gjatë kongresit katër-ditor, duke e çuar totalin në 540 milionë dollarë.

Ajo gjithashtu vuri në dukje një rritje të konsiderueshme të donatorëve dhe raportoi se 200,000 vullnetarë të rinj janë regjistruar që nga fillimi i konventës.

Një e treta e donacioneve erdhën nga kontribues për herë të parë, me mësuesit dhe infermierët që ishin profesionet kryesore të donatorëve, tha ajo.

Konventa Kombëtare Demokratike u mbajt në Çikago të hënën deri të premten e kaluar.

Pas miratimit të Presidentit Joe Biden për ofertën e saj presidenciale, Harris mblodhi 81 milionë dollarë në 24 orët e para, shuma më e lartë e grumbullimit të fondeve njëditore në rekord.

Në SHBA shuma dhe numri i donacioneve të fushatës monitorohen nga afër për të kuptuar rezultatet e zgjedhjeve.