Një histori tronditëse është bërë publike, pas zbardhjes së zhdukjes së një 51-vjeçareje meksikane.

Blanca Arellano ndërroi jetë pasi u vra në mënyrë makabre, teksa trupi iu copëtua dhe organet iu shitën. Gjithçka nisi kur ajo fluturoi nga Meksika për në Peru, për të takuar njeriun me të cilin u dashurua në internet.

Blanca Arellano u nis nga Mexico City dhe zbarkoi në Lima, Peru, ku pati një takim me një burrë të quajtur Juan Pablo Jesus Villafuerte Pinto, 37 vjeç, student i mjekësisë dhe bioteknologjisë. Të dy ishin takuar në një aplikacion lojërash dhe kishin disa muaj në një lidhje online.

51-vjeçarja kaloi një javë në Peru, duke qëndruar me të dashurin e saj, në shtëpinë e tij. Gjatë këtyre ditëve ajo i komunikonte me mbesën e saj të cilës i thoshte se ishte shumë e dashuruar, deri në një moment kur nuk u bë më e gjallë.

Familja e saj nuk mund të kontaktonte më me të, dhe pas disa ditësh pa lajme prej saj, mbesa e gruas, Karla Arellano, nisi një apel në Twitter për të gjetur tezen e saj.

Karla Arellano mundi të kontaktonte me burrin për të cilin tezja e saj kishte nisur lidhjen dhe e pyeti nëse kishte ndonjë lajm për të. Ai iu përgjigj duke i thënë se ata ishin ndarë, pasi 51-vjeçarja ishte mërzitur me të dhe ishte nisur për në Meksikë.

Mirëpo, disa ditë më vonë, në plazhin Huacho, pranë shtëpisë së burrit u gjet koka e një gruaje. Disa orë më vonë, autoritetet gjetën edhe një gisht të prerë ku ende ndodhej një unazë argjendi. Të nesërmen në një kanal u gjetën pjesët e tjera të trupit.

Hetuesit zbuluan shpejt se kanali kalon përpara Universitetit Kombëtar Jose Faustino Sanchez Carrion, ku Villafuerte rezulton të jetë student. Ekspertët e mjekësisë ligjore përcaktuan gjithashtu se viktimës i ishte hequr fytyra nga një person i aftë në instrumentet kirurgjikale. Gjurmët e gjakut të Blanca Arellano u zbuluan në banesën e Villafuerte. Doli gjithashtu se burri kishte postuar video të organeve të gruas në TikTok.