Fluks këmbësorësh dhe automjetesh që largohen nga Kakavija.

Paraditen e së shtunës dogana e Kakavijës është përballur me një fluks të lartë të këmbësorëve dhe automjeteve në dalje të tokës shqiptare.

Për të evituar radhët e gjata të pritjes në kufi Policia Kufitare në Kakavije ka çuar në 5 numrin e sporteleve në dalje të tokës shqiptare.

Drejtuesit e policisë së Kakavijes kanë kontaktuar me palën greke për të shtuar numrin e sporteleve duke çuar në tre të tillë në hyrje të tokës greke në Kakavije. Fluksi në dalje në këtë doganë pritet të vazhdojë gjatë gjithë javës në vazhdim.

Gjatë 24 orëve të fundit në Kakavije janë përpunuar 9787 shtetasish në hyrje – dalje nga të cilët 3777 në hyrje dhe 6010 në dalje, ndërsa hyrje–dalje automjetesh janë 3150 gjithsej, ku 1198 janë në hyrje dhe 1952 janë në dalje të R.Shqipërisë.

Një 60-vjeçar është vënë në hetim, pasi ka tentuar që të kalojë kufirin pa deklaruar 25 mijë euro. 60-vjeçari ka qenë duke u larguar nga Shqipëria nga pika kufitare e Kakavijës, kur në kontrollin që i është ushtruar në çantë i janë gjetur 25 mijë euro të cilat di duhej t’i kishte deklaruar. Ndërkohë, 25 mijë eurot u sekuestruan nga Policia.

Kujtojmë, që 2 ditë më parë Policia Kufitare goditi një tjetër rast të kësaj veprimtarie të kundërligjshme, për të cilin sekuestroi 8390 euro, 12300 franga zvicerane, 85000 fiorinta hungareze, 470 dinarë serb dhe 15 lingota floriri, të gjitha të padeklaruara.