Një aksident ka ndodhur pasditen e sotme në rrugën Institut-Kamëz, ku një makinë ka përplasur një këmbësor.

Mjeti ka përplasur këmbësorin teksa ky i fundit po kalonte vijat e bardha.

I lënduari është dërguar në spital, ndërsa policia dhe grupi hetimor ka nisur punën për zbardhjen e rrethanave të aksidentit.

Një aksident tragjik ka ndodhur mbrëmjen e sotme në Durrës, ku një këmbësor ka humbur jetën. Ngjarja është regjistruar në segmentin rrugor Manëz-Kull, ku automjeti me targa AA334FU, i drejtuar nga Muharrem Jakupi, ka përplasur këmbësorin Seladin Ago.

Si pasojë e plagëve të marra, Ago ka ndërruar jetë në vendngjarje. Policia ka shoqëruar drejtuesin e automjetit për veprime të mëtejshme procedurale, ndërsa grupi hetimor po punon për zbardhjen e shkaqeve dhe dinamikës së aksidentit.

Një aksident ka ndodhur këtë mesditë në aksin “Ura e Leklit-Këlcyrë” në qytetin e Këlcyrës.

Një 33-vjeçar që po drejtonte një automjet tip “BMW”, ka aksidentuar një këmbësor 81-vjeçar, i cili është dërguar në Spitalin Rajonal të Gjirokastrës dhe ndodhet nën kujdesin e mjekëve.

Drejtuesi i mjetit është shoqëruar në komisariat për veprime të mëtejshme, ndërkohë që grupi hetimor ka mbërritur në vendngjarje dhe po vijon hetimet për zbardhjen e aksidentit.

Një aksident i rëndë është regjistruar në Itali, ku si pasojë kanë mbetur të plagosur gjashtë këmbësor, ndërsa dy kanë humbur jetën.

Ngjarja ka ndodhur në Lido di Camaiore të Italisë. Drejtuesja e  një automjeti, 44-vjeçare, pasi ka përplasur dy këmbësorët, 18 dhe 19 vjeç, ka goditur edhe këmbësorë të tjerë, më pas u përplas me semaforin në kryqëzimin me rrugën bregdetare të Lido di Camaiore dhe në fund me një makinë të parkuar.

Siç shkruajnë mediat italiane, dy të rinjtë që humbën jetën, në moshën 18 dhe 19 vjeç ishin turistë në Itali. Ata ishin me origjinë nga Gjermania. Studentët ishin me pushime në Versilia me një grup studentësh nga Duisburgu. Katër personat e tjerë të plagosur ishin gjithashtu të huaj, tre me kombësi franceze dhe një gjerman.

E plagosur ngeli edhe pasagjerja që ndodhej në makinë. Dy prej të plagosurëve u transferuan në spitalin Massa, pasi ndodhen në gjendje të rëndë për jetën.

Drejtuesja e mjetit ndodhet në “arrest shtëpie” në banesën e saj në Viareggio me akuzën “vrasje e dyfishtë”, ndërsa testi i alkoolit rezultoi negative.

Në momentin që 44-vjeçarja ka dalë nga makina pas aksidentit është shprehur se nuk vuri re asgjë.

“Nuk isha unë, nuk ishte faji im, nuk vura re asgjë”, tha ajo.

Mediat italiane shkruajnë se do të japë dëshminë e saj edhe pasagjerja që ndodhej në makinë me 44-vjeçaren. Personat që panë nga afër ngjarjen janë tronditur nga ky aksident.

“Ne menduam se ishte një sulm. Ajo makinë po udhëtonte me shpejtësi marramendëse.Skena të tmerrshme, nuk do të mund t’i harrojmë kurrë. Dhe ajo gruaja pas timonit që thoshte se nuk kishte bërë asgjë. Është absurd”, u shpreh njëri nga dëshmitarët.

Ndërkohë në qytetin e Camaiore, dita e sotme u shpall ditë zie, zyrat e bashkisë u ndalën në orën 12 për një minutë heshtje, duke ftuar gjithashtu aktivitetet dhe të gjithë komunitetin të bëjnë të njëjtën gjë.

Një këmbësor ka humbur jetën ditën e enjte në Gjilan. Viktima është goditur nga një makinë në vendkalimin e këmbësorëve.

Rasti ka ndodhur në në rrugën “Idriz Seferi” rreth orës 20:00, shkruajnë mediat e Kosovës.

“Rr. Idriz Seferi, Gjilan / 15.08.2024-20:00. Është arrestuar i dyshuari mashkull kosovar pasi që i njëjti duke drejtuar automjetin dyshohet se nga pakujdesia në vendkalim të këmbësorëve ka goditur këmbësorin viktimë mashkull kosovar të cilit i ka shkaktuar lëndime të rënda trupore. Viktima pasi është dërguar në QKUK ka ndërruar jetë, vdekjen e të cilit e ka konfirmuar ekipi mjekësor”, thuhet në njoftimin e policisë.

Me vendim të prokurorit, trupi i pajetë është dërguar në IML për obduksion, ndërsa i dyshuari është dërguar në paraburgim.