Një sulm me dronë nga Rusia në kryeqytetin ukrainas, Kiev, ka vrarë një person dhe ka plagosur katër të tjerë, thanë zyrtarët lokalë.

Forcat e Moskës – që kanë nisur pushtimin e Ukrainës në shkurt të vitit 2022 – kanë përshkallëzuar sulmet ajrore në mbarë Ukrainën që nga javët e parë të stinës së dimrit, duke kryer sulme edhe në ditën e Vitit të Ri në Kiev, sulme që vranë dy persona.

“Një person është vrarë dhe katër të tjerë janë plagosur gjatë një sulmi ajror të armikut në rajonin e Kievit”, tha Mykola Kalashnyk, kreu i rajonit të Kievit.

Ai tha se një shofer kamioni është vrarë pasi është goditur nga copëzat e një droni të rrëzuar rus.

Copëza të dronit po ashtu ranë mbi një shtëpi, duke plagosur tre persona, përfshirë një djalë 16-vjeçar.

Forcat ajrore ukrainase thanë se Rusia ka lëshuar 93 dronë gjatë natës. Ushtria tha se ka rrëzuar dronët ose i ka penguar përmes pajisjeve elektronike.

Autoritetet thanë se copëzat e dronëve ranë në dy qarqe në Kiev, por nuk u raportua për të plagosur./REL

Rusia ka nisur sulmin e saj të pestë me dron në Kiev në dy javë, sipas ushtrisë së Ukrainës.

Sistemet e mbrojtjes ajrore shkatërruan të gjitha armët përpara se të arrinin në kryeqytetin ukrainas. “Këto sulme sistematike… me dronë, dëshmojnë edhe një herë se pushtuesi po kërkon në mënyrë aktive një mundësi për të goditur Kievin.

Ata po testojnë taktika të reja, po kërkojnë rrugë të reja afrimi drejt kryeqytetit, duke u përpjekur të ekspozojnë vendndodhjen e mbrojtjes sonë ajrore.” tha Serhiy Popko, kreu i administratës ushtarake të Kievit.

Forca ajrore e Ukrainës tha se sistemet e saj të mbrojtjes ajrore shkatërruan 35 nga 39 dronë dhe dy raketa lundrimi që Rusia kishte lëshuar gjatë natës.