Ministri i Shëndetësisë Arben Tavari ka thënë se 101 pacientë që u dogjën nga zjarri që ra në diskotekën në Koçan janë dërguar jashtë shtetit për një mjekim më të specializuar.

Travai tha se pacientët janë në gjendje të qëndrueshme si dhe sot do të transferojnë në Suedi 5 të lënduar.

“101 pacientë janë jashtë shtetit, mbas mbledhjes së Shtabit të Krizave në mëngjes konstatuam se të gjithë pacientët fatmirësisht janë në gjendje relativisht stabile, uroj dhe shpresoj që dalëngadalë disa pacientë të fillojmë ti lëshojmë për në shtëpi, sot tre apo katër pacientë do të lëshohen në shtëpi. Transferimi i fundit do të bëhet sot, vetëm në Suedi 5 pacientë dhe mbas asaj nuk kemi më transferime tjera”, tha ai.

Ndërkohë në Serbi janë dërguar 30 pacientë, në Bullgari 15, në Greqi 12 dhe në vende të tjera më pak se 10 pacientë. Ndërsa në klinikën shtetërore të vendit po trajtohen 64 pacientë dhe 13 në klinikat private.

Ditën e sotme në orën 13:00 është paralajmëruar një protestë në parkun e qytetit të Koçanit. Kjo protestë vjen pas zjarrit që shpërtheu në diskotekën në Koaçn ku humbën jetën 59 persona dhe u lënduan rreth 155 të tjerë.

Sipas Alsat, protesta është lajmëruar në faqen Zëri i Koçanit në facebook dhe shkruhet se do të luftojnë në nder të viktimave dhe të ndryshohet sistemi për të ofruar siguri dhe drejtësi.

“Kjo protestë është shprehje e dhimbjes dhe revoltës së thellë për jetët e humbura, por edhe për gjendjen në të cilën ndodhemi si shoqëri. Ne nuk mund t’i kthejmë bashkëqytetarët tanë të dashur, por jemi të detyruar të luftojmë për nder të tyre dhe që ta ndryshojmë këtë sistem joefikas që nuk na ofron siguri, mirëqenie dhe drejtësi”, thuhet në një postim në faqen Koçani (Zëri i Koçanit) në Facebook.