Deputeti i Lëvizjes Vetëvendosje, Dimal Basha, është zgjedhur kryetar i Kuvendit të Kosovës të martën.

Zgjedhja e Bashës kryeparlamentar i hap rrugën konstituimit të Kuvendit dhe formimit të Qeverisë së re, pas një ngërçi të gjatë politik, pas zgjedhjeve të 9 shkurtit.
Basha i mori 73 vota për, 30 kundër dhe tri abstenime./REL

Presidentja e Kosovës, Vjosa Osmani, i dorëzoi këngëtares dokumentet zyrtare të shtetësisë në një ceremoni solemne të premten, duke e cilësuar atë si “një nga figurat më ikonike kulturore në historinë e vendit tonë”.

KOSOVË- Policia e Kosovës ka kërkuar që deputetët të dalin nga Kuvendi, para seancës konstitutive të kësaj të shtune. Sipas deputetit të Partisë Demokratike të Kosovës, PDK-së, Abelard Tahiri, ka dyshime për një kërcënim dhe vendosjen e një bombe. Tahiri deklaroi se u është kërkuar nga autoritetet që të largohen menjëherë nga objekti.

“Na dhanë udhëzime me dalë, sepse ka një kërcënim me gjasë. Nuk e dimë çka po ndodh dhe na kërkuan me dalë. Policia na tha për çështje të sigurisë”, tha Abelard Tahiri, deputet i Partisë Demokratike të Kosovës.

Kryeministri në detyrë, Albin Kurti, ka deklaruar se siguria nacionale në Republikën e Kosovës është përmirësuar ndjeshëm falë bashkërendimit institucional dhe veprimeve të organeve të inteligjencës, sigurisë dhe drejtësisë.

“Sipas masave dhe veprimeve të ndërmarra, siguria është përforcuar në vazhdimësi përgjatë viteve të fundit, veçanërisht në katër komunat në veri ku problemet e sigurisë ishin më të theksuara,” deklaroi Kurti.

Ai theksoi se “veriu i Kosovës nga një regjion me prani jo vetëm të terroristëve dhe kriminelëve serbë, por edhe një nga lokacionet më proruse, tashmë është stabilizuar dukshëm.”

Kurti përmendi një sërë masash që kanë ndikuar në këtë përmirësim të gjendjes, përfshirë largimin e barrikadave, luftimin e kontrabandës dhe mbylljen e rrugëve ilegale, si dhe shpalljen e “Mbrojtjes Civile” dhe “Brigadës së Veriut” organizata terroriste.

“Reduktimi i kapaciteteve destabilizuese të Serbisë në Kosovë, përmirësimi i situatës së sigurisë dhe sundimi i rendit dhe ligjit kanë ndikuar në një ambient më të sigurt, jo vetëm në katër komunat veriore, por edhe në vendbanimet tjera me shumicë serbe,” theksoi Kurti.

Ai shtoi se Serbia ka humbur forcën destabilizuese që kishte më parë: “Nuk ka më mekanizma të fortë kërcënues brenda Kosovës.”

Në deklaratën e tij, Kurti nënvizoi gjithashtu arrestimin e bashkëpunëtorëve të shërbimeve serbe të inteligjencës, luftën kundër ekstremizmit dhe ndikimin e ulët të Rusisë, Kinës dhe Iranit në Kosovë. Ai përmendi gjithashtu avancimin e bashkëpunimit ndërinstitucional dhe ndërkombëtar në fushën e sigurisë dhe inteligjencës, si dhe rritjen e besimit të qytetarëve në institucionet e sigurisë.

“Institucionet relevante kanë shtuar bashkëpunimin dhe koordinimin e aktiviteteve në kundërvënie ndaj luftës hibride nga Serbia dhe Rusia,” deklaroi Kurti.

Ministri i Mbrojtjes i Kosovës, në detyrë, Ejup Maqedonci i është përgjigjur kërcënimeve direkte të lëshuara nga Serbia për luftë dhe pushtim.

Ai thekson se kërcënimet janë reale dhe se Beogradi zyrtar ka vendosur 70 për qind të ushtrisë në kufirin tonë, por garantoi se FSK, bashkë me aleatët amerikanë dhe të NATO-s, do të mbrojnë çdo pëllëmbë tokë të Kosovës.

“Ne i shohim gjithmonë si të mundshme këto kërcënime. Ne e shohim gjithmonë të mundshme që Serbia në një moment mund të ndërmarrë veprime për të destabilizuar rajonin. Kjo është edhe arsyeja pse ne jemi të përkushtuar që të ndërtojmë një forcë ushtarake të aftë për të mbrojtur territorin e Kosovës, për të mbrojtur jetën e qytetarëve tanë dhe për të kontribuar për paqen dhe stabilitetin në botë, duke përqafuar gjithmonë vlerat e NATO-s, vlerat perëndimore dhe duke shtyrë përpara interesat, të cilat i kemi si vendet demokratike.

Ne në vazhdimësi e ngremë si shqetësim prezencën e bazave të përparme operacionale të ushtrisë dhe xhandarmërisë serbe përgjatë vijës kufitare me Republikën e Kosovës. Diku 70% e të gjitha kapaciteteve ushtarake të ushtrisë së Serbisë janë të vendosura në jug të territorit të saj, pra jo larg Republikës së Kosovës.

Dhe kësaj duke i shtuar edhe këto 48 bazat e përparme që ne gjithmonë vlerësojmë se paraqesin kërcënim. Kur fqinji ti vendos në kufi forcat ushtarake në një farë forme apo një tjetër e kërcënon sigurinë dhe stabilitetin e atij vendi. Kjo nuk po bëhet rastësisht.

Dhe kur e kemi gjithë këtë prezencë dhe kemi një mbështetje të grupeve kriminale dhe terroriste siç ishte ai i Radoiçic, që tentoi aneksim të Veriut të vendit tonë, tregon për qasjen agresive që Serbia vijon ta ketë në raport me Republikën e Kosovës”, tha për A2 CNN, Ejup Maqedonci, Ministër i Mbrojtjes në detyrë.

Deputetët e Kuvendit të Kosovës mblidhen sot në përpjekjen e dhjetë për të konstituar përbërjen e re të dalë nga zgjedhjet parlamentare të shkurtit.

Para përpjekjes paraprake, më 1 maj, kreu i Lëvizjes Vetëvendosje, Albin Kurti, ftoi në takim udhëheqësit e Partisë Demokratike të Kosovës dhe Lidhjes Demokratike të Kosovës.

Kreu i PDK-së, Memli Krasniqi, pranoi ftesën, por pas takimit ai nuk njoftoi për një ujdi se si të shkohet përpara.

Po atë ditë, deputetët u mblodhën, por kryesuesi i seancës, Avni Dehari, nga LVV-ja kërkoi që të krijohet një komision për votim të fshehtë për kryeparlamentarin e ri. Por, PDK-ja, LDK-ja, Aleanca për Ardhmërinë e Kosovës dhe Lista Serbe refuzuan të propozonin ndonjë deputet për këtë komision dhe seanca u ndërpre.

Seanca konstituive e legjislaturës së nëntë ka nisur më 15 prill dhe deri më tani, deputetët kanë kaluar vetëm dy pika të agjendës së seancës konstituive: raportin e Komisionit të përkohshëm për verifikimin e mandateve dhe atë të betimit të deputetëve.

Por, procesi ka ngecur te pika e tretë: zgjedhja e kryeparlamentarit.

Propozimi për kryeparlamentar është e drejtë ekskluzive e fitueses së zgjedhjeve, LVV-së, por në gjashtë votime, kandidatja e tyre, Albulena Haxhiu, nuk ka arritur t’i marrë votat e nevojshme, përkatësisht 61.

Prishtinë- Në përpjekjen e tretë, deputetët e Kosovës kanë miratuar raportin e komisionit të përkohshëm për verifikim të mandateve duke i hapur kështu rrugën betimit të deputetëve dhe konsituimit të kuvendit.

Miratimi i raportit me 119 vota nga 120 sa janë gjithsej, erdhi pas deponimit zyrtar të dorëheqjeve të kabinetit qeveritar, çështje që u bë shkak për dështimin e dy seancave të mëparshme, mes kundërshtive të opozitës.

Pas betimit të deputetëve të legjislaturës së nëntë, Lëvizja Vetëvendosje si partia që doli e para në zgjedhje propozoi Albulena Haxhiun për postin e kryeparlamentarit, e cila në qeverinë e kaluar mbante postin e ministres së drejtësisë.

Por propozimi i shprehur nga Glauk Konjufca nuk mori mbështetjen e Kuvendit. Vetëm 57 deputetë votuan pro kandidaturës, 20 kundër dhe 3 abstenim. Ata që abstenuan ishin deputetët e Nismës Socialdemokrate, për të cilët u fol se mund të kishin një marrëveshje koalicioni me Vetëvendosjen, ndërsa ata të PDK dhe AAK nuk morën pjesë në votim.

Kryetari i Partisë Demokratike të Kosovës, Memli Krasniqi vërejti se votimi kishte treguar se Kurti nuk i ka votat për qeverinë, pasi vetëm 57 deputetë nga 61 që i duhen kishin votuar në favor të tij.

Pas votimit, drejtuesi i seancës, Avni Dehari ka kërkuar 20 minuta pushim për konsultime të mëtejshme.

Dardanët janë kualifikuar në Ligën B të Ligës së Kombeve, duke triumfuar edhe në sfidën e dytë të Play-Off-it kundër Islandës, me rezultat 1-3, të dielën mbrëma në Murcia të Spanjës.

Kalimi në Ligën B të Ligës së Kombeve është arritja më e madhe e kombëtares sonë.

Padyshim se njeriu i ndeshjes ishte sulmuesi Vedat Muriqi, duke shënuar het-trik e që është tregolëshi i tij i parë në fanellën e Dardanëve

Islandezët më mirë e nisen ndeshjen dhe vetëm pas dy minutave përmes Oskarsson kaluan në epërsi prej 1-0.

Megjithatë, Dardanët shumë shpejtë i rehabilituan radhët e veta duke e marrë dominimin e lojës në terren dhe duke rrezikuar vazhdimisht portën islandezëve.

Pas 35 minutave në lojë Muriqi barazoi shifrat në 1-1. Ylli i Mallorca-s nuk u ndal me kaq dhe minutën e 45-të kalojë për herë të parë Kosovën në avantazh prej 1-2, derisa në minutën e 79-të i dha goditjen e tretë Islandës, duke e kompletuar het-trikun në rezultatin përfundimtar 1-3.

Përfundimisht Kosova me rezultatin e përgjithshëm prej 5-2, kombëtarja jonë kalon në Ligën B të Ligës së Kombeve që është arritje e jashtëzakonshme për Dardanët.

Policia e Kosovës ka realizuar një aksion të suksesshëm në veri të Mitrovicës, ku janë gjetur dhe konfiskuar një sërë pajisjesh dhe armësh të paligjshme.

Në këtë operacion, janë sekuestruar katër granata dore, maska gazi me filtra, municione të ndryshme, fishekë, dhe një snajper. Po ashtu, janë gjetur pajisje për prodhimin e kriptovalutave, busulla ushtarake, drita për automjete, telefona, karta telefoni dhe një bluzë me mbishkrime të dyshimta.

Një person është arrestuar gjatë këtij aksioni, ndërsa hetimet vazhdojnë për të zbardhur plotësisht rrethanat e ngjarjes dhe përdorimin e këtyre pajisjeve.

KUKËS– Goditet një rast i tentativës për të kontrabanduar mallra nga Shqipëria në Kosovë, nëpërmjet kufirit të gjelbër.

Policia ka vënë në pranga  një 46-vjeçar, i cili merrej me transportin e mallrave kontrabandë.

Ai i kishte ngarkuar produktet në një kamionçinë dhe po përpiqej t’i fuste në Kosovë.

Personi i arrestuar është nga Kosova, ndërsa autoritetet kanë sekuestruar mallrat dhe automjetin ku u gjetën produktet kontrabandë.

Shënim: Disa imazhe gjenden nga interneti, që konsiderohen të jenë në domenin publik. Nëse dikush pretendon pronësinë, ne do të citojmë autorin, ose, sipas kërkesës, do të heqim menjëherë imazhin.