Kolegji i Posaçëm i Apelimit vendosi të rikthejë në detyrë prokurorin e Tiranës, Bajram Breçani, i cili u shkarkua nga detyra nga Komisioni i Pavarur i Kualifikimit.

Sipas njoftimit për medie, trupi gjykues i Kolegjit të Posaçëm të Apelimit, i përbërë nga Ina Rama kryesuese, Sokol Çomo relator, Mimoza Tasi, Natasha Mulaj, Rezarta Schuetz anëtare, shpalli vendimin për çështjen nr. 47/2022, datë 01.11.2022, që i përket ankimit të subjektit të rivlerësimit Bajram Breçani kundër vendimit të Komisionit të Pavarur të Kualifikimit nr. 558, datë 06.09.2022. Komisioni i Pavarur i Kualifikimit, shkarkoi më 6 shtator 2022 prokurorin e Tiranës, Bajram Breçani për probleme në kriterin pasuror.

Kolegji i Posaçëm të Apelimit, KPA njoftoi të martën më 4 mars vendimarrjen për lënien në fuqi të shkarkimit nga detyra të prokurorit të Vlorës, Erjon Çelaj. Vendimi u mor në mënyrë unanime nga trupi gjykues i Kolegjit i kryesuar nga Ina Rama, me relator Sokol Çomon dhe anëtare Albana Shtylla, Natasha Mulaj e Rezarta Schuetz, pas shqyrtimit në dhomë këshillimi të ankimit të Çelajt.

Prokurori i Vlorës, Erion Çelaj u shkarkua nga detyra prej Komisionit të Pavarur të Kualifikimit më 21 shtator të vitit 2021 për deklarim të pasaktë dhe të pamjaftueshëm të pasurisë, si dhe për cënim të besimit të publikut tek drejtësia.

Erion Çelaj e filloi karrierën në sistemin e drejtësisë në vitin 1998 dhe punoi fillimisht si prokuror në Përmet dhe në Fier. Prej vitit 2008 dhe deri në shkarkimin nga detyra, ai e ushtroi funksionin në Prokurorinë e Rrethit Vlorë./ BIRN

Prokurori i Tiranës, Lazër Çardaku u shkarkua nga detyra prej Komisionit të Pavarur të Kualifikimit, KPK më 8 nëntor 2024 për probleme në kriterin e pasurisë, që në vlerësimin tërësor u konsideruan se e vendosnin në kushtet e cenimit të besimit të publikut tek drejtësia.

Ndërkohë, Çardaku u vlerësua i besueshëm në kriterin e pasurisë dhe se kishte arritur nivelin minimal kualifikues për profesionalizmin.

Komisioni konstaton se Çardaku ka kryer deklarim të rremë në deklaratën veting lidhur me çmimin e blerjes së një apartamenti me sipërfaqe 73 m2 në Shkodër dhe një shtese bashkëngjitur, si dhe se ka qenë në pamundësi financiare. Si burim krijimi të kësaj pasurie subjekti ka deklaruar kursimet prej të ardhurave nga paga për vitet 1982 – 1992, si specialist në kooperativë bujqësore; si hetues e më pas prokuror në Pukë, nga viti 1992 deri në vitin 1999; si dhe nga kursimet e pagës së bashkëshortes si mësuese.
ILDKPKI ka konstatuar deklarim të pasaktë lidhur me vlerën e blerjes së këtij apartamenti në ’99-ën, pasi në deklaratën e pasurisë veting është shënuar vlera 200 mijë lekë sa figuron dhe në aktin e shitblerjes, kurse në deklaratën e interesave privatë ndër vite është deklaruar vlera 2.4 milionë lekë dhe 2 milionë lekë. ILDKPKI është shprehur se vlera 200 mijë lekë gjykohet si e ulët për blerjen e këtij apartamenti në vitin 1999.

Kolegji i Posaçëm i Apelimit, KPA, shpalli të enjten me 19 dhjetor vendimin për shkarkimin nga detyra të prokurorit të Krujës, Florian Bonjaku. Vendimi u mor pas shqyrtimit të ankimit të Komisionerit Publik, Florian Ballhysa që e kundërshtoi si të pabazuar vendimarrjen e Komisionit të Pavarur të Kualifikimit, KPK për konfirmimin në detyrë të Bonjakut.

Prokurori Bonjaku e kaloi vetingun në shkallë të parë me shumicat e votave të treshes së KPK që kreu hetimin administrativ ndaj tij. Shumica e përbërë nga relatori Olsi Komici dhe anëtarja Valbona Sanxhaktari, arsyetoi se disa pasaktësi në deklarimin e pasurive nuk mund të sillnin penalizimin e subjektit. Ndërsa kryesuesja Xhensila Pine në pakicë vlerësoi se Bonjaku kishte kryer deklarim të pasaktë e të pamjaftueshëm për pasuritë, si dhe ka cënuar besimin e publikut tek drejtësia nëpërmjet mangësive në kryerjen e veprimeve hetimore dhe arsyetimin e akteve procedurale.

Komisioneri Ballhysa ushtroi ankim dhe po ashtu arsyetoi se Bonjaku ka bërë deklarim të pasaktë të pasurisë dhe së bashku me problemet e gjetura në kriterin e figurës dhe atë të aftësive profesionale, në vlerësim tërësor duhej të sillnin shkarkimin e tij për “cënim të besimit të publikut te drejtësia”.

Bonjaku i kundërshtoi si të pabazuara shkaqet e Komisionerit dhe paraqiti pretendimet e tij në Kolegj gjatë disa seancave.
Në përfundim të gjykimit, trupi gjykues i KPA i kryesuar nga Rezarta Schuetz kryesuese, me relatore Natasha Mulajn dhe anëtarë Albana Shtylla, Mimoza Tasi e Sokol Çomo, në mënyrë unanime vendosi shkarkimin nga detyra të prokurorit Florian Bonjaku.

Kryesuesja Schuetz parashtroi në mënyrë të përmbledhur argumentet në të cilat është bazuar vendimmarrja. Për një apartament në Durrës që subjekti rezulton ta ketë blerë nga vjehrri, Kolegji konstaton se Bonjaku ka nënshkruar dy kontrata dhe se nuk e ka deklaruar atë që ka shërbyer për marrjen e një kredie që ka shërbyer për pagesën e një banese tjetër në Tiranë.

Sipas KPA, pavarësisht pretendimeve për qëllimin e përdorimit të kontratës për përfitimin e kredisë, duket se deklarimet e subjektit nuk kanë qenë të sinqerta. Po ashtu, nuk janë gjetur të besueshme deklarimet se këtë kontratë nuk e disponon për shkak të kalimit të një kohe të gjatë dhe se i është sjellë në vëmendje kur është pyetur nga Komisioni.

KPA vëren se të dyja kontratat janë nënshkruar në vitin 2003 dhe mundësia për kujtesë duhej të ishte e njëjtë. Mosdeklarimi i një prej kontratave gjatë procesit, konsiderohet se nuk ka qenë thjeshtë çështje harrese, por një përpjekje për ta mbajtur jashtë hetimit.

KPA i ka gjetur të drejta shkaqet e Komisionerit se subjekti nuk ka deklaruar të drejtat dhe përfitimin e titullit të pronësisë për apartamentin në Tiranë. Megjithëse është deklaruar kredia e marrë për blerjen e këtij apartamenti, Kolegji vlerëson se mosdeklarimi tregon për moszabtimin e detyrimit për deklarim dhe bie në kontradiktë me sjelljen që duhet të ketë një prokuror.

Këto gjetje të konstatuara në kriterin e pasurisë, Kolegji ka çmuar t’i konsiderojë në vlerësimin e përgjithshëm.

Lidhur me konstatimin në kriterin e figurës, KPA vëren se nga analiza e transkripteve të përgjimeve të dy të proceduarve për kultivim të narkotikëve të hetuar nga subjekti, ka rezultuar se ato paraqiten ndryshe në aktet fillestare, nga ato më vonë kur janë vendosur nën akuzë për moskallëzim krimi. Nisur dhe nga fakti se gjykata e ka kthyer çështjen për hetime të mëtejshme, KPA ka arritur në përfundimin se subjekti duhej të kishte vlerësuar përgjimet e të proceduarve. Shpjegimet e Bonjakut u konsideruan prej Kolegjit si një përpjekje për të mbrojtur konkluzionet e veta në atë çështje. Po ashtu, KPA vlerëson se është i drejtë konstatimi i Komisionerit për mungesë të argumenteve në kërkesën e dorëzuar në gjykatë për të proceduarit.

Kolegji konstatoi dhe mangësi profesionale, si mosnjoftime apo moskryerje e hetimeve për një kohë të gjatë, të pajustifikuar, që së bashku me gjetjet në kriterin e pasurisë dhe figurës janë konsideruar në vlerësimin tërësor duke konkluduar se prokurori Florian Bonjaku nuk e arrin të kalojë testin e besueshmërisë së publikut. Për rrjedhojë u vendos ndryshimi i vendimit të KPK dhe shkarkimi i këtij subjekti rivlerësimi.

Kolegji i Posaçëm i Apelimit njoftoi lënien në fuqi të vendimit të shkarkimit për ish-gjyqtarin Desart Avdulaj. “Në përfundim të gjykimit në dhomë këshillimi, trupi gjykues, bazuar në nenin 66, pika 1, shkronja “a” e ligjit nr. 84/2016, “Për rivlerësimin kalimtar të gjyqtarëve dhe prokurorëve në Republikën e Shqipërisë”, në mënyrë unanime, vendosi: – Lënien në fuqi të vendimit nr. 391, datë 26.05.2021 të Komisionit të Pavarur të Kualifikimit, që i përket subjektit të rivlerësimit Desart Avdulaj”, thuhet në njoftimin për shtyp të KPA.

Çështja e Avdulaj u shqyrtua nga një trupë e përbërë nga Ina Rama kryesuese, Sokol Çomo relator, Albana Shtylla, Natasha Mulaj, Rezarta Schuetz anëtare.

Avdulaj u shkarkua fillimisht nga Komisioni i Pavarur i Kualifikimit pasi u gjet me probleme të pasurisë. Ai e ankimoi çështjen në Kolegj, por ky i fundit e gjeti të drejtë vendimin e KPK-së.

Kolegji i Posaçëm i Apelimit, KPA vendosi të enjten më 5 dhjetor, lënien në fuqi të vendimarrjes së Komisionit të Pavarur të Kualifikimit për shkarkimin nga detyra të gjyqtares së Gjirokastrës, Mirela Iliopullo. Vendimi u mor në mënyrë unanime nga trupi gjykues i Kolegjit, i kryesuar nga Natasha Mulaj, me relator Sokol Çomon dhe anëtare Albana Shtyllën, Ina Ramën e Mimoza Tasin, pas shqyrtimit në dhomë këshillimi të ankimit të Iliopullos ndaj vendimarrjes së Komisionit.

KPK e shkarkoi nga detyra gjyqtaren Mirela Iliopullo më 13 korrik 2021, pasi arriti në përfundimin se kishte mungesë të burimeve financiare në vlera të mëdha për pasuritë dhe shpenzimet e kryera; se kishte kryer në mënyrë të përsëritur deklarime të pamjaftueshme dhe se kishte fshehur pasurinë, duke cënuar besimin e publikut në sistemin e drejtësisë.

Mirela Iliopullo e filloi karrierën në sistemin e drejtësisë në vitin 1997 si ndihmësgjyqtare në Gjykatës e Sarandës. Prej vitit 2000 dhe deri në momentin e shkarkimit, ajo e ushtroi funksionin e saj pranë Gjykatës së Rrethit Gjyqësor Gjirokastër./ BIRN

Kolegji i Posaçëm i Apelimi, KPA shpalli të mërkurën më 20 nëntor vendimin për lënien në fuqi të shkarkimi nga detyra të prokurorit të Lushnjës, Artan Hazbi.

Vendimi u mor në mënyrë unanime nga trupi gjykues i Kolegjit i kryesuar nga Rezarta Schuetz, me relator Sokol Çomon dhe anëtare Albana Shtylla, Mimoza Tasi dhe Natasha Mulaj, pas shqyrtimit në dhomë këshillimi të vendimmarrjes së Komisionit të Pavarur të Kualifikimit, KPK për largimin e tij nga detyra.

Artan Hazbi u shkarkua prej KPK më 26 prill 2021, pasi u gjet probleme në kriterin e pasurisë dhe se kishte cënuar besimin e publikut duke vepruar si biznesmen.

Kolegji i Posaçëm i Apelimit, ka rikthyer në detyrë prokurorin e Tiranës, Genci Qana, i cili u shkarkua pasi nuk kaloi me sukses hallkat e procesit të Vettingut.

Vendimi për rikthimin e tij në detyrë u mor nga trupa e përbërë nga Sokol Çomo kryesues, Rezarta Schuetz relatore, Albana Shtylla, Ina Rama, Natasha Mulaj anëtare.

Vetingu nxjerr nga radhët e drejtësisë Ardian Brahon prokurori i prokurorisë së Tiranës. Kolegji i Posaçëm i Apelimit vendosi sot lënien në fuqi të vendimit të të Komisionit të Pavarur të Kualifikimit nr. 469, që i përket këtij subjekti rivlerësimi.

Më 1 nëntor 2021 KPK vendosi të shkarkojë nga detyra prokurorin e Tiranës, Ardian Braho pasi konkludoi se nuk ka deklaruar saktë pasurinë dhe janë konstatuar elemente që ngrenë dyshime për fshehje të pasurisë.

Trupa gjykuese që shqyrtoi ankimimin e prokurorit në Kolegjin e Posaçëm të Apelimit përbëhej nga Rezarta Schuetz kryesuese, Natasha Mulaj relatore, Albana Shtylla, Ina Rama, Sokol Çomo anëtarë.

Në KPK vendimi për shkarkimin e tij u mor me 2 vota pro e një kundër.

Shumica vërejti paqartësi në destinacionin e disa shumave monetare të dërguara nga tezja që jeton në Shtetet e Bashkuara të Amerikës, SHBA në llogarinë e babait të subjektit, ndërsa Zhegu argumenton se janë provuar të ardhura të mjaftueshme të personave të tjerë të lidhur për krijimin e vlerave në fjalë, si dhe nuk rezulton që Braho apo familjarët e tij ti kenë përdorur apo të kenë pasur interes për to.

Braho ka qenë prokuror i disa çështjeve të rëndësishme në Tiranë, ndër të tjera ka hetuar dosjen e vrasjes së të riut Klodian Rasha apo atë të Lulzim Bashës, për Sheshin “Skënderbej”, dosje e cila u pushua , me argumentin se vendimi ishte marrë nga Këshilli Bashkiak i Tiranës.

Gjithashtu Ardian Braho ka hetuar Bankën e Shqipërisë dhe ish-guvernatorin Ardian Fullani apo dosjen e aparatit përgjues në zyrën e sekretares së ish-Ministrit të Brendshëm, Saimir Tahiri.

Por KPK në vendimin e saj për 2 kriteret e tjera vlerësoi pozitivisht prokurorin për pastërtinë e figurës dhe i aftë për profesionalizmin.