Vettingu i KPA-së rikthen në detyrë gjyqtarin e shkarkuar të Gjykatës Administrative të Vlorës, Bevis Shehaj dhe prish në këtë mënyrë vendimin e shkallës së parë të KPK-së, i marrë tre vite më parë.

Pas shqyrtimit të ankimimit të depozituar nga magjistrati që nga muaji Shtator i vitit 2022, trupa gjykuese me Mimoza Tasin si kryesuese, vendosi sot (3 Shkurt), që të merrte parasysh argumentet e Shehajt dhe të rrëzonte shkallën e parë, që e kishte përjashtuar me 15 vite nga sistemi i drejtësisë.

Komisioni i Pavarur i Kualifikimit vendosi sot shkarkimin nga detyra të prokurorit Xhemal Saliaj, pas shqyrtimit të dokumentacionit dhe zhvillimit të seancës dëgjimore në datën 4 tetor. KPK e mori vendimin për subjektin e rivlerësimit me shumicë votash. Xhemal Saliaj mbante detyrën si prokuror në Prokurorinë pranë Gjykatës së Shkallës së Parë të Juridiksionit të Përgjithshëm, Vlorë.

Vendimi, i arsyetuar me shkrim, nga trupi gjykues i kryesuar nga Alma Faskaj, Pamela Qirko relatore, Xhensila Pine anëtare do t’i njoftohet subjektit të rivlerësimit, Komisionerit Publik dhe vëzhguesve ndërkombëtarë brenda 30 ditëve.

Komisioni i Pavarur i Kualifikimit ka shpallur këtë të mërkurë vendimin për konfirmimin në detyrë të kryetarit të Gjykatës së Tiranës, Flamur Kapllani.
Vendimi u mor në mënyrë unanime nga trupa e KPK e kryesuar nga Brunilda Bekteshi, me relator Lulzim Hamitajn dhe anëtare Etleda Çiftjan.
Gjatë seancës dëgjimore të martën, Kapllani dha shpjegime për disa bilance negative për pasurinë dhe për gjetje të konstatuara në denoncimet nga publiku. Për pastërtinë e figurës, ai mori vlerësim pozitiv.
Flamur Kapllani e ka nisur karrierën në sistemin e drejtësisë në vitin 2000 fillimisht si gjyqtar në Mirditë dhe më pas në 2007-ën u transferua në Gjykatën e Rrethit Gjyqësor Kukës. Në vitin 2010, Kapllani u zgjodh anëtar i Këshillit të Lartë të Drejtësisë dhe prej asaj kohe punon pranë Gjykatës së Tiranës, ku së fundmi mban edhe pozicionin e drejtuesit.

Kolegji i Posaçëm i Apelimit, ka shkarkuar përfundimisht nga detyra gjyqtaren Lindita Sinaj.

Trupi gjykues i KPA, i përbërë nga Sokol Çomo kryesues, Ina Rama relatore, Albana Shtylla, Mimoza Tasi, Rezarta Schuetz anëtarë, rrëzoi ankimin e bërë nga Sinaj kundër vendimit të KPK më datë 8 korrik 2021 kur gjyqtarja u shkarkua nga detyra për fshehje pasurie.

“Në përfundim të gjykimit në dhomë këshillimi, trupi gjykues, bazuar në nenin 66, pika 1, germa “a” e ligjit nr. 84/2016, “Për rivlerësimin kalimtar të gjyqtarëve dhe prokurorëve në Republikën e Shqipërisë”, në mënyrë unanime, vendosi:
Lënien në fuqi të vendimit nr. 417, datë 08.07.2021 të Komisionit të Pavarur të Kualifikimit, që i përket subjektit të rivlerësimit Lindita Sinanaj”- thuhet në njoftimin e publikuar.

Vendimi i marrë sot nga KPA është përfundimtar dhe ka efekt të menjëhershëm.

Komisioni i Pavarur i Kualifikimit shkarkoi sot nga detyra gjyqtaren e Gjykatës së Shkallës së parë në Durrës, Mimoza Margjeka.

Sipas njoftimit të publikuar nga KPK, vendimi u mor nga trupi gjykues i i kryesuar nga Genta Tafa Bungo, Roland Ilia relator, Suela Zhegu anëtare.

“Komisioni i Pavarur i Kualifikimit njofton se pas shqyrtimit të dokumentacionit dhe zhvillimit të seancës dëgjimore në datën 26 shkurt për subjektin e rivlerësimit,  Mimoza Margjeka, bazuar në ligj vendosi shkarkimin nga detyra të subjektit të rivlerësimit Mimoza Margjeka, gjyqtare në Gjykatën e Shkallës së Parë të Juridiksionit të Përgjithshëm Durrës”, njofton KPK.

“Vendimi, i arsyetuar me shkrim, nga trupi gjykues i kryesuar nga Genta Tafa Bungo, Roland Ilia relator, Suela Zhegu anëtare do t’i njoftohet subjektit të rivlerësimit, Komisionerit Publik dhe vëzhguesve ndërkombëtarë brenda 30 ditëve”, vijon njoftimi.

Mimoza Margjeka, e cila në kohën kur u ndalua, në shtator të vitit 2020, ishte e komanduar në gjykatën e Apelit Korçë, u dënua se mori 6 mijë euro përmes bashkëshortit Arben Cara për të lehtësuar masën e sigurisë së një personi të ndaluar në Pogradec.

Margjeka u dënua me 4 vjet e 6 muaj burgim, por u urdhërua pezullimi i ekzekutimit të vendimit të dënimit me burgim për pjesën e mbetur pa vuajtur, si dhe u caktua në provë për 3 vjet. Po ashtu, iu hoq e drejta për të ushtruar funksione publike për një afat kohor 5-vjeçar.