Atentatori i kryeministrit të Sllovenisë, ka treguar motivin pse qëlloi me armë zjarri mbi Robert Ficon, duke e lënë të plagosur rëndë.

Shkrimtari 71-vjeçar Juraj Cintula, tha se qëlloi mbi kryeministrin e vendit të tij pasi “nuk ishte dakord me politikat e qeverisë”.

Autori i dyshuar Juraj Cintula kishte shërbyer në të kaluarën si një ish-punonjës i një kompanie private sigurie dhe është autor i një koleksioni poezish. Lajmi bëhet i ditur nga televizioni lokal Markiza.

Disa media raportojnë se Fico nuk është popullor në Sllovaki për shkak të pikëpamjeve të tij duke e cilësuar atë si një populist që erdhi në pushtet me një platformë pro-Ruse dhe anti-amerikane.

Ai u zotua t’i japë fund mbështetjes ushtarake të Sllovakisë për Ukrainën si dhe ka pretenduar se NATO dhe Shtetet e Bashkuara provokuan Moskën për të hyrë në luftë.

Pas fitores së tij në zgjedhje, qeveria e re ndaloi menjëherë dërgesat e armëve në Ukrainë. Mijëra qytetarë dolën në mënyrë të përsëritur në rrugë në të gjithë Sllovakinë për të protestuar kundër politikave pro-ruse të Ficos, duke përfshirë planet e tij për të ndryshuar kodin penal për të eliminuar një prokuror të posaçëm kundër korrupsionit dhe për të marrë kontrollin e medias publike.

Presidenti rus Vladimir Putin e quajti atentatin ndaj kryeministrit sllovak Robert Fico “një krim të neveritshëm”, në një mesazh drejtuar homologes së tij sllovake Zuzana Caputova.

Kundërshtarët politikë e kane akuzuar vazhdimisht Fico se ka marrë pozicione “miqësore ndaj Rusisë” në mes të luftës së Putinit kundër Ukrainës.

Marrëdhëniet midis Sllovakisë, një vend anëtar i BE-së dhe NATO-s, dhe fqinjit të saj Ukrainës u ftohën dukshëm kur nacionalisti i majtë Fico fitoi zgjedhjet parlamentare në vjeshtë dhe u kthye në pushtet.

Gjatë fushatës elektorale, Fico deklaroi se nuk do të furnizonte Ukrainën me armë.

“Unë e njoh Robert Fico si një person të guximshëm dhe me vullnet të fortë. Shpresoj shumë që këto cilësi do ta ndihmojnë atë të kalojë këtë situatë të vështirë”, tha Putin, sipas deklaratës së publikuar në faqen e internetit të Kremlinit.

Fico u qëllua dhe u plagos rëndë pas një takimi të kabinetit në qytetin Handlova.