Kosova shënoi rritjen më të madhe në botë për qytetarët që e vlerësojnë jetën e tyre si shumë të mirë. Sipas Qendrës amerikane të Kërkimeve Gallup, përqindja e qytetarëve të kënaqur u rrit nga 11% një dekadë më parë në 51% vitin e kaluar.

Ndryshime të ngjashme, por më të vogla, janë regjistruar edhe në disa shtete të rajonit, si Serbia dhe Bosnje e Hercegovina, ndërsa Zvicra ka përjetuar ulje në të njëjtën periudhë.

Autorët e hulumtimit theksojnë se këto matje reflektojnë progresin njerëzor më mirë se indikatorët ekonomikë, si Prodhimi i Brendshëm Bruto. Rritja e kënaqshmërisë lidhet me më shumë optimizëm për standardin e jetës, liritë personale dhe mirëqenien e fëmijëve.

Në vitin 2024 u regjistruan 177 aksidente të punë të raportuara nga Inspektorati Shtetëror i Punës dhe Shërbimeve Shoqërore.

Të paktën 33 persona kanë humbur jetën nga këto aksidente. Të dhënat zyrtare të institucionit tregojnë se dy sektorët më problematikë vijojnë të mbeten ndërtimi dhe minierat.

“Sektori i ndërtimit mbetet më i rrezikuari me 24% të aksidenteve, duke reflektuar zhvillimin e shpejtë të këtij sektori me 1,019 kantiere leje ndërtimi të lëshuara në vitin 2024″,– sipas INSTAT.

Pavarësisht kontrolleve intensive nga ISHPSHSH, aksidentet në këtë sektor vazhdojnë të jenë një sfidë. Është e domosdoshme forcimi i sistemeve të sigurisë dhe shëndetit në nivel ndërmarrjeje, veçanërisht për rolin e Koordinatorit të Sigurisë dhe ndërgjegjësimin e punëdhënësve për zbatimin korrekt të ligjit.

Sektori “Miniera-Kariera” përfaqëson 18% të aksidenteve, duke mbetur një nga sektorët me risk shumë të lartë. Inspektimet në nëntokë janë kompetencë e AKSEM, me të cilin ISHPSHSH bashkëpunon për trajtimin e aksidenteve në këtë sektor” thuhet në raportin vjetor 2024 të Inspektoratit.

Të paktën 90% e aksidenteve janë raportuar nga punëdhënësit, një rritje prej 2.4% krahasuar me vitin e kaluar, që sipas institucionit tregon një ndërgjegjësim më të lartë për deklarimin e ngjarjeve.

Sipas raportit në vitin 2024, është vënë re një rritje e përqindjes së subjekteve që disponojnë “Dokument Vlerësim Risku”, kanë emëruar Koordinatorin e Sigurisë dhe Shëndetit në Punë, krijuar Këshillat e Sigurisë dhe Shëndetit në Punë dhe kanë angazhuar Mjekun e Ndërmarrjes.

Në vitin 2024 u inspektuan në total nga ana e Inspektoratit 190,340 vende pune në 9,860 subjekte me rritje në masën 22% të total inspektimeve të realizuara krahasuar me vitin paraardhës./Monitor