Gjatë verës, temperaturat ekstreme dhe aktivitetet në plazh mund të bëhen rrezik për shëndetin e zemrës, veçanërisht për personat me sëmundje kardiovaskulare. Kardiologia Dr. Daniela Teferiçi, në një intervistë për Dritare TV, theksoi se i nxehti i madh dhe futja e menjëhershme në ujë të ftohtë janë faktorë të rrezikshëm që mund të shkaktojnë ndalje të zemrës apo aritmi fatale.

Kujdes me ujin e ftohtë pas diellit të fortë! Ndryshimi i menjëhershëm i temperaturës trupore, si nga nxehtësia ekstreme në ujë të ftohtë, mund të shkaktojë spazma të enëve të gjakut dhe ndalje të zemrës, paralajmëron mjekja.

Gjithashtu, gjatë sezonit të verës rritet rreziku për infarkte të miokardit, për shkak të dehidratimit, ekspozimit në diell dhe lodhjes së tepërt. Simptoma si dhimbja e fortë në gjoks, djegie ose shtrëngim gjatë lodhjes apo në të ftohtë, nuk duhen neglizhuar dhe duhet menjëherë konsultë mjekësore.

Kujdes i veçantë për personat mbi 50 vjeç, sidomos ata me hipertension, diabet, kolesterol të lartë apo që konsumojnë duhan. Këta janë faktorë të njohur që rrisin rrezikun për sëmundje koronare.

Çfarë të bëni në rast urgjence? Nëse dikush dyshohet se po përjeton një infarkt, ndihma e parë është transportimi i menjëhershëm në një qendër mjekësore. Çdo sekondë është jetike.

Këshilla për pushuesit në plazh:

Pini mjaftueshëm ujë

Mos ekspozohuni gjatë në diellin e mesditës

Futu në ujë gradualisht, jo menjëherë pas ekspozimit në diell

Kontrolloni shëndetin përmes një çekapi të plotë, pa dallim sezoni.

Për shkak të temperaturave të larta që priten në ditët në vijim, Qeveria e Kosovës ka marrë vendim për të kufizuar orarin e punës për disa kategori.

Sipas vendimit të Ministria e Shëndetësisë, kjo bëhet me qëllim mbrojtjen e shëndetit të qytetarëve.

Në bazë të këtij vendimi i cili hyn në fuqi nesër më 13 korrik, do të përfitojnë gratë shtatzëna, punëtorët e ndërtimit dhe qytetarët me sëmundje kronike.

Vendimi i qeverisë së Kosovës

Kufizim i orarit të punës përgjatë temperaturave të larta.

Në bazë të rekomandimeve të Institutit Kombëtar të Shëndetësisë Publike të Kosovës, për shkak të rritjes së konsiderueshme të temperaturave në ditët në vijim, me qëllim të mbrojtjes së shëndetit të qytetarëve, Ministria e Shëndetësisë merr vendim që të kufizohet orari i punës nga data 13.07.2024 deri më 20.07.2024 për këto kategori:

1. Nga data 13.07.2024 deri më 20.07.2024 lirohen nga puna gratë shtatzëna.

2. Në rast të pamundësisë së lirimit nga puna sipas paragrafit 1 të këtij vendimi, gratë shtatzëna punojnë nga shtëpitë.

3. Nga data 13.07.2024 deri më 20.07.2024 qytetarët me sëmundje kronike punojnë me orar të shkurtuar deri në 4 orë në ditë.

4. Nga data 13.07.2024 deri më 20.07.2024 ndalohet puna në sektorin e ndërtimtarisë në ambiente të hapura gjatë orarit 11:00 – 17:00 në të gjithë territorin e Republikës së Kosovës.

5. Varësisht prej temperaturave që mbizotërojnë gjatë muajit korrik dhe gusht 2024, ndërmerren masa të tjera.

6. Vendimi hyn në fuqi ditën e nënshkrimit.

Ky vendim është marrë duke pasur parasysh praktikat më të mira për mbrojtjen e shëndetit dhe sigurisë së punëtorëve gjatë periudhave me temperatura të larta.