Gjatë kontrolleve në dy ambientet, policia ka sekuestruar 34 njësi kompjuterike, 10 laptopë dhe 2 celularë.

Tiranë – Dy ambiente, të cilat ishin përshtatur për organizimin dhe ushtrimin e lojërave të fatit janë zbuluar, në Mjull Bathore dhe në Vaqarr, gjatë operacionit policor “Jackpot”.

Lidhur me këtë policia ka proceduar penalisht katër persona, një prej tyre shtetas kinez, dhe ka shpallur në kërkim dy të tjerë, gjithashtu kinezë.

Gjatë kontrolleve në dy ambientet, policia ka sekuestruar 34 njësi kompjuterike, 10 laptopë dhe 2 celularë.

Njoftimi i policisë:

Finalizohet nga Sektori për Hetimin e Krimeve Kibernetike, në bashkëpunim me Sektorin për Hetimin e Krimit Ekonomik dhe Financiar, operacioni policor i koduar “Jackpot”.

Zbulohen 2 ambiente të përshtatura për organizimin dhe ushtrimin e veprimtarisë së paligjshme të lojërave të fatit.

Sekuestrohen nga këto ambiente, 34 njësi kompjuterike, 10 laptopë dhe 2 celularë.

Procedohen 4 shtetas, shpallen në kërkim 2 të tjerë.

Strukturat e DVP Tiranë, në vijim të punës për goditjen e paligjshmërive në fushën e lojërave të fatit, në kuadër të operacionit policor të koduar “Jackpot”, kanë organizuar kontrolle në lokale dhe në ambiente të ndryshme të cilat mund të vihen në dispozicion për organizimin e lotarive të palejuara.

Gjatë kontrolleve, u konstatua se 2 ambiente, në Mjull Bathore dhe në Vaqarr, ishin përshtatur për organizimin dhe ushtrimin e veprimtarisë së paligjshme të lojërave të fatit.

Në vijim të veprimeve për këto dy raste, u referuan materialet në Prokurori ku nisi procedimi penal për shtetasit B. D., 65 vjeç, R. L., 33 vjeç, L. M., 63 vjeç dhe G. Ch., 43 vjeç (shtetas kinez), si dhe u shpallën në kërkim 2 shtetas kinezë W. Zh dhe Y. L. Punohet për kapjen e tyre.

Materialet procedurale iu referuan Prokurorisë së Tiranës, për veprime të mëtejshme.

Pesë persona janë proceduar penalisht në Fier për veprimtarinë e paligjshme të lojërave të fatit. Dy persona u proceduan pasi organizonin lojëra fati në një lokal në lagjen “Kastrioti”. Ndërsa tre të tjerë u proceduan në Mallakastër pasi nga kontrollet në lokale të ndryshme, u zbulua se ushtronin këtë aktivitet.

Nga kontrollet në kuadër të megaoperacionit “Sundimi i ligjit”, konstatohet dhe goditet një tjetër rast i organizimit të kundërligjshëm të lojërave të fatit.

Kishte përshtatur lokalin e tij, në Kurbin, për të luajtur Poker, arrestohet në flagrancë 29-vjeçari.
Procedohen në gjendje të lirë 6 shtetas që u kapën duke luajtur në këtë lokal.

Sekuestrohen 1 tavolinë për Poker, sende të tjera të kësaj loje dhe një shumë parash (në lekë dhe në euro) e përfituar nga kjo veprimtari e kundërligjshme.

Si rezultat i administrimit të menjëhershëm të informacioneve të siguruara nga inteligjenca policore, se një shtetas kishte përshtatur lokalin e tij, në Kurbin, për organizim të kundërligjshëm të lojërave të fatit, Komisariati i Policisë Kurbin ka kapur dhe arrestuar në flagrancë pronarin e ambientit, shtetasin R. V., 29 vjeç banues në Milot.

Nga kontrollet u konstatua 29-vjeçari e kishte përshtatur lokalin, me tavolinë dhe sende të tjera për organizimin e kundërligjshëm të lojës Poker.

Në vijim të veprimeve procedurale për rastin, u referuan materialet në Prokurori, ku nisi procedimi në gjendje të lirë, për veprën penale “Organizimi ose ushtrimi i veprimtarive të lojërave të fatit në kundërshtim me ligjin”, për 6 shtetas që u kapën në flagrancë duke luajtur në këtë lokal.

Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm, Lezhë.