Zjarret masive që shkrumbuan pyjet e rajonit lindor grek të Evrosit, pranë kufirit me Turqinë, konsiderohen si më të mëdhatë të regjistruara ndonjëherë mes vendeve të Bashkimit Europian, të paktën që kur ka nisur përfshirja e tyre në regjistrat e Sistemit Europian të Zjarreve në Pyje, në vitin 2000.about:blank

Këtë e bëri të ditur zëdhënësi i Komisionit Europian, Balash Ujvari, i cili në një konferencë të posaçme për shtyp në Bruksel tha se këto zjarre kanë shkrumbuar një sipërfaqe tepër të madhe prej 81 mijë hektarësh me pyje. Për shuarjen e tyre, Bashkimi Europian dërgoi një ekip ndihmës emergjencash prej 12 mjetesh fluturuese, 400 efektivësh zjarrfikës dhe 60 mjetesh.

Zjarret e këtij rajoni që vijojnë edhe këtë të Martë në ditën e tyre në 11-të i kanë marrë jetën 21 personave, të gjithë emigrantë ilegalë që përdornin shtigjet mes pyjeve të këtij rajoni për të kaluar ilegalisht nga Turqia fqinje drejt vendeve të Bashkimit Europian. Në vënien nën kontroll të këtyre vatrave kontribuon edhe Shqipëria me 50 forca zjarrfikëse dhe 9 mjete.