Tiranë, 13 maj 2025 – Pas përfundimit të procesit zgjedhor të 11 majit dhe konfirmimit të Partisë Socialiste si forcë fituese me shumicë të qartë parlamentare, kanë nisur urimet nga liderët ndërkombëtarë.

Ndër të parat që reagoi ishte Kryeministrja e Italisë, Giorgia Meloni, e cila i dërgoi një mesazh urimi homologut të saj shqiptar, Edi Rama, për rizgjedhjen në krye të qeverisë.

Në një deklaratë zyrtare, Meloni thotë:

“Dua ti shpreh urimet e mia më të sinqerta kryeministrit Edi Rama për rikonfirmimin tij në krye të qeverisë shqiptare.

Miqësia e thellë dhe bashkëpunimi strategjik që lidh dy vendet tona është forcuar edhe më tej falë iniciativave të përbashkëta, fryt i një dialogu konstruktiv dhe një vullneti të përbashkët për të përballuar sfidat globale me zgjidhje inovative.

Do të vazhdojmë të punojmë për të konsoliduar më tej lidhjen mes dy qeverive dhe për të arritur objektivat tona të përbashkëta, përfshirë forcimin e stabilitetit në Ballkan dhe përparimin e rrugëtimit evropian të Shqipërisë.”

Kryeministri Edi Rama nuk vonoi në përgjigje, duke e falënderuar Melonin me një mesazh publik ku shkroi:

“Grazie, Sorella. Është një nder të shërbej për një marrëdhënie të jashtëzakonshme afërsie dhe miqësie si ajo mes Shqipërisë dhe Italisë, dhe një privilegj të bashkëpunoj me një lidere si ti, që thotë atë që bën dhe bën atë që thotë.

Nuk e di nëse kam shkruar saktë un leader apo una leader, por di me siguri që më e mira për vendet tona është ende për të ardhur.” /noa.al

Disa vite më parë, do të ishte e paimagjinueshme që Italia të ishte vendi i një prej qeverive më të qëndrueshme në Evropë.

Qeveritë në Itali priren të zgjasin pak më shumë se një vit përpara se të shemben, duke e bërë vendin dhe politikat të paparashikueshme.

Por një sërë faktorësh, përfshirë krizat e qeverisë në vende relativisht të qëndrueshme si Franca dhe Gjermania, dhe popullariteti në rritje i koalicionit aktual në Itali, i udhëhequr nga kryeministrja e ekstremit të djathtë Giorgia Meloni, e cila është në pushtet që nga viti 2022, e kanë bërë Romën lojtarin kryesor në marrëdhëniet e Evropës me SHBA-të nën presidencën e dytë të Donald Trump.

Gjatë mandatit të tij të fundit, Trump e quajti Evropën “armike” të SHBA-ve. Këtë herë, Meloni ka potencialin ta ndryshojë këtë qasje, pjesërisht falë mikut të tyre të përbashkët Elon Musk.

Musk, Trump dhe Meloni darkuan së bashku në praninë e presidentit francez Emmanuel Macron pas rihapjes zyrtare të Katedrales “Notre Dame” në Paris fundjavën e kaluar, një përvojë që Trump më vonë i tha The New York Post se “ishte pozitive”.

“Kaluam shumë mirë” tha ai, duke shtuar se ai dhe Meloni kishin kaluar “shumë kohë së bashku”.
Duke e përshkruar figurën e Melonit, ku shpesh ka bërë shaka me gjatësinë e saj, Trump e ka cilësuar mjaft të “gjallë e të shkathët”, duke theksuar se “bashkë mund ta ndreqin pak botën”.

Dy liderët, edhe pse të ngjashëm politikisht, nuk janë domosdoshmërisht të lidhur me të gjitha konfliktet më urgjente në botë.

Meloni ka qenë një nga mbështetësit më të fortë të Ukrainës, pasi është takuar shumë herë me Presidentin Volodymyr Zelensky që nga pushtimi i Rusisë.

Megjithatë, nëse ajo mund të ndikojë në çfarëdo mënyre në atë që mund të bëjë Trump, është e vështirë të parashikohet.

“Përpara se të ketë një qeveri të re në Gjermani dhe me situatën aktuale në Francë, kur Trump të vijë në Shtëpinë e Bardhë, Italia do të ketë një lloj monopoli, si i vetmi vend me një qeveri të qëndrueshme”, tha për CNN Giovanni Orsina, drejtor i departamentit të Shkencave Politike në Universitetin e Luissit në Romë.

“Meloni dhe Musk kanë një marrëdhënie shumë të mirë të vazhdueshme dhe Musk mund të jetë një lloj shoku më i mirë për të dy, për sa kohë që do të zgjasë muaji i mjaltit Trump-Musk”

Musk dhe Meloni krijuan miqësinë e tyre shumë të fortë në verën e vitit 2023 dhe themeluesi i Tesla-s kryesoi konventën politike Vëllezërit e Italisë të Melonit, Atreju, në dhjetor të vitit të kaluar. Ai thuhet se do të bëjë një paraqitje befasuese në të njëjtin konventë këtë fundjavë në Romë, e cila është kryesuar nga presidenti argjentinas Javier Milei, një tjetër nga shokët populist të Trumpit.

Aq e afërt është marrëdhënia e tyre sa Meloni dhe Musk iu desh të reagonin në rrjetet sociale në fillim të këtij viti për të larguar thashethemet për një romancë mes tyre, pasi Musk komplimentoi bukurinë e saj teksa i dha çmimin Global Citizens Aëard në margjinat e Asamblesë së Përgjithshme të OKB-së në Neë.

Orsina beson se Musk mund ta bëjë më të lehtë për kryeministrin italian të “ketë kontakt” me Trumpin sa herë që ajo ndjen nevojën për të pasur bisedime.

“Ka shumë mundësi që Meloni të marrë iniciativën dhe të jetë një urë lidhëse midis administratës Trump dhe Evropës”, shprehet Orsina.

Për momentin, Meloni duket se është në anën e Musk-ut, dhe si rezultat, në anën e djathtë të Trumpit.

Orsina shton se Meloni do të jetë një politikane më reaktive sesa proaktive kur bëhet fjalë për qasjen e Trumpit ndaj Evropës.

Kryeministrja italiane, Giorgia Meloni, u zotua se do të “rinisë” bashkëpunimin me Kinën, pasi nënshkroi një plan veprimi 3-vjeçar gjatë vizitës së saj të parë zyrtare në Pekin që kur ka marrë postin e kryeministres.

Meloni, që udhëheq Qeverinë e krahut të djathtë që nga viti 2022, e bëri këtë njoftim gjatë takimit me kryeministrin kinez, Li Qiang, teksa Roma po synon të përmirësojë raportet tregtare me Pekinin pasi u largua nga Nisma kineze “Brezi dhe Rruga” vitin e kaluar. Kjo nismë, që ka në thelb investimet në infrastrukturë është projekti kryesor i presidentit kinez, Xi Jinping.

Liderja italiane tha se vizita pesëditore “demonstron vullnetin për të nisur një fazë të re, për të rinisur bashkëpunimin tonë dypalësh”. Plani i veprimit, që u nënshkrua gjatë vizitës, synon që të gjenden forma të reja të bashkëpunimit, tha ajo.

Memorandumi për bashkëpunim industrial i nënshkruar nga Italia dhe Kina “përfshin sektorët strategjikë të industrisë, sikurse lëvizshmëria elektrike dhe burimet e ripërtërishme”, tha Meloni.

Meloni, e cila i sheh investimet kineze si mënyrë për të nxitur rritjen ekonomike të Italisë, gjatë vizitës do të takohet edhe me Xinë dhe ligjvënësin më të lartë në Kinë, Zhao Leji, i cili është i treti në hierarikën e udhëheqjes.

Më 2019, Italia u bë shteti i vetëm i Grupit të Shtatë shteteve më të industrializuara (G7) që iu bashkua nismës “Brezi dhe Rruga”, por u tërhoq nga kjo nismë vitin e kaluar.

Kina është partnerja më e madhe tregtare e Romës – jashtë shteteve të Bashkimit Evropian – pas Shteteve të Bashkuara. /REL

Kryeministrja italiane, Georgia Meloni, zhvilloi ditën e sotme një vizitë zyrtare në vendin tonë.

Meloni së bashku me Ramën, vizituan dy zonat e Lezhës, Gjadër dhe Shëngjin, ku pritet të ndërtohen dhe dy qendrat e emigrantëve, që do të vinën ën vendin tonë, në kuadër të marrëveshjes së lidhur mes dy vendeve.

Gjatë vizitës, pati një konferencë të përbashkët për shtyp me kryeministrin Edi Rama, e cila u pasua nga një takim privat mes homologëve. Mësohet se mes diskutimeve, Rama i ka dhuruar Melonit edhe librin e tij “Kurbani”.

Nga Piaca del Popolo në Romë, kryeministrja italiane Giorgia Meloni, gjatë një fjalimi në fushatën elektorale, i ka sfiduar kundërshtarët e së majtës me planet e saj për të mposhtur trafikantët e qenieve njerëzore. Pak ditë para se të rivizitojë vendin tonë ku do të ndjekë nga afër punimet në qendrat e pritjes së emigrantëve në Portin e Shëngjinit dhe ne Gjadër, Meloni ka theksuar se marrëveshja me Shqipërinë është shembull për gjithë vendet e Bashkimit Europian në luftën ndaj emigracionit të paligjshëm.

“Tani po e kuptojnë edhe në Europë, ku tashmë Italia ka shënuar një ndryshim të ritmit të emigracionit. Tani shumë shtete po marrin shembullin tonë kur ne propozojmë marrëveshje me vendet e Afrikës veriore. Po na marrin si shembull edhe kur propozojmë zgjidhje inovative si ajo e marrëveshjes me Shqipërinë”, tha kryeministrja italiane.

Dhe kur përmend Shqipërinë, Meloni nuk harron homologun Edi Rama.

“Ti dërgojmë një përqafim kryeministrit socialist shqiptar Edi Rama që po e masakrojnë vetëm se donte të ndihmonte Italinë”, u shpreh ajo.

Duke thumbuar sërish të majtën italiane Meloni shprehet se ankesat e tyre në Bashkimin Europian për marrëveshjen me Shqipërinë kanë qenë reklama më e mirë për suksesin e këtij pakti.

“Janë ankuar tek çdo lider i mundshëm europian duke ju thënë se marrëveshja me Shqipërinë për emigrantët e paligjshëm është në kundërshtim me të drejtat e njeriut. Janë ankuar tek të gjithë. Dhe e dini se cili është rezultati? 15 nga 27 vendet e Bashkimit Europian, pra shumica, kanë kërkuar nga Komisioni Europian që të kopjojnë modelin e marrëveshjes së Italisë me Shqipërinë”, vijoi kryeministrja italiane.

Meloni të mërkurën do të ndërpresë për disa orë fushatën elektorale për zgjedhjet e Parlamentit Europian, për t’u nisur drejt qendrave të pritjes së emigrantëve në Portin e Shëngjinit dhe në Gjadër. Fakti që Meloni ka preferuar të fokusohet në Shëngjin e Gjadër, shihet si një mesazh i qartë politik që ve në dukje edhe njëherë rëndësinë që qeveria e saj po i kushton çështjes së flukseve emigratore dhe menaxhimit të tyre.

Koha e vizitës në tokën shqiptare është po aq e rëndësishme. E vendosur vetëm tre ditë para zgjedhjeve, vizita e Melonit përfaqëson një mundësi të fundit për kryeministren që të konsolidojë mesazhin e saj për votuesit, jo vetëm në Itali, por edhe në komunitetin shqiptar.

Klan News

Në një intervistë për televizionin RAI 3 kryeministrja, Giorgia Meloni, deklaroi se ngritja e qendrave të pritjes së emigrantëve në Shqipëri po ecën përpara.

Po ashtu, Meloni vlerësoi homologun e saj Edi Rama dhe tha se ai është sulmuar për këtë marrëveshje padrejtësisht.

“Problem, burokracitë italiane dhe rregullat e BE”, Rama skeptik për marrëveshjen për emigrantët: Si do të menaxhohen 3000 persona në 28 ditë?

Projekti me Shqipërinë për ngritjen e qendrave të pritjes së refugjatëve po ecën përpara dhe po shërben si model edhe për shtete të tjera.

Kështu deklaroi në një intervistë në televizionin RAI 3 kryeministrja italiane Giogria Meloni.

“Projekti me Shqipërinë po ecën përpara dhe do të jetë plotësisht funksional pas një kohe jo shumë të gjatë. Ky projekt dëshmon se ne po i bëjmë këto lëvizje për të mirën e vendit tonë. Mendoj se kemi të bëjmë me një projekt shumë strategjik. Të gjithë duhet të kuptojnë se nëse protokolli me Shqipërinë funksionon siç duhet, do të ndikonte pozitivisht në menaxhimin e duhur të refugjatëve të paligjshëm edhe në nivel europian”, tha Meloni.

Meloni është ndalur të flasë edhe për homologun e saj shqiptar, Edi Rama ku nuk i ka kursyer vlerësimet për të.

“Dua të falenderoj publikisht Edi Ramën sepse ai ka qenë objekt i çdo lloj sulmi, që kur vendosi që të nënshkruajë këtë protokoll me ne. Fakti që e majta këtu kërkonte përjashtimin e tij nga Partia Socialiste Europiane që e quan Shqipërinë narko-shtet, fakti që atij i atribuojnë fjalë që nuk i ka thënë, është padrejtësi. Ajo që dëshiron të bëjë Edi Rama është që të ndihmojë Italinë”, tha ajo.

Projekti për ngritjen e qendrave të pritjes së refugjatëve në Gjadër dhe në Shëngjin pritet të nisë nga funksionimi në muajt në vijim, duke pritur në të refugjatët e shpëtuar në det nga policia italiane.

Kryeministrja italiane Giorgia Meloni njoftoi të dielën se do të kandidojë në zgjedhjet evropiane që mbahen në muajin qershor në një përpjekje për të rritur mbështetjen për partinë e saj ‘Vëllezërit e Italisë’, po ajo shtoi se nëse zgjidhet nuk do të marrë detyrën e ligjvënëses evropiane.

Zgjedhjet që mbahen prej 6 deri më 9 qershor për Parlamentin Evropian shihen si një provë kyçe për forcës që gëzon në elektorat koalicioni i saj i djathtë 18 mujor.

“Ne duam të bëjmë në Evropë atë që bëmë në Itali, të krijojmë një shumicë që bashkon forcat e qendrës së djathtë e që do ta çojë të majtën në opozitë”, u tha zonja Meloni mbështetësve në një konferencë partie në qytetin bregdetar të Peskarës, nga ku dhe nisi fushatën.

Zonja Meloni, partia e së cilës i ka rrënjët tek grupi fashist i Benito Musolinit, bëri thirrje për daljen e Italisë nga euro-zona kur ishte opozitë dhe fitorja e saj në zgjedhjet e vitit 2022, ngriti shqetësime në disa kryeqytete evropiane.

Megjithatë, ajo ka ndjekur një linjë gjerësisht pro-evropiane gjatë qëndrimit në detyrë, veçanërisht mbi çështjet e politikës së jashtme, si Ukraina dhe Lindja e Mesme.

Partia e saj gëzon mbështejen më të madhe popullore në Itali me 27%, sipas sondazheve të fundit, duke kaluar Partinë Demokratike të opozitës me rreth 20% dhe “Lëvizjes me Pesë Yje”, një formacion i majtë qëe gëzon 16% mbështetje.

Emri i zonjës Meloni do të jetë i parë në fletën e votimit për partinë ‘Vëllezërit e Italisë’, në të pesë zonat zgjedhore të Italisë, por ajo u zotua se nuk do të përdorë “asnjë minutë” nga koha e saj si kryeministre, për të bërë fushatë për zgjedhjet për Parlamentin Evropian.

Kryetarja e Partisë Demokratike Elly Schlein, njoftoi javën e kaluar se edhe ajo do të kandidojë gjithashtu, sikurse Antonio Tajani, kreu i partisë së qendrës “Forza Italia”, një parti pjesë e koalicionit qeverisës.

Të tre udhëheqësit shpresojnë të fitojnë votat e atyre që kanë pak interes për politikën, por që tërhiqen nga emrat e shefave të partive në fletëvotim.

Duke supozuar se do të zgjidhen, si zonja Meloni ashtu edhe zonja Schlein e zoti Tajani, pritet të heqin dorë nga vendet e tyre, duke u hapur rrugën kandidatëve të dytë, në listën e partoive të tyre./VOA