VLORË – Një ngjarje shqetësuese është regjistruar sot rreth orës 14:00 pranë tregut të Çoles, ku një punonjës i Ndërmarrjes së Pastrimit është dhunuar rëndë nga dy persona ende të paidentifikuar.

Sipas burimeve nga spitali rajonal i Vlorës, i lënduari është 70-vjeçari Kozma Kukli, i cili u dërgua me urgjencë pas agresionit të dhunshëm. Ai ka pësuar plagë në kokë dhe dëmtime të rënda në syrin e djathtë, për të cilin ekziston rreziku i humbjes së shikimit.

Vetë Kukli ka deklaruar në spital se dy persona, të cilët lëviznin me një furgon, janë afruar dhe e kanë goditur papritur. Sipas dëshmisë së tij, gjithçka ndodhi pa ndonjë përplasje apo paralajmërim verbal. Banorët e zonës kanë ndërhyrë menjëherë dhe kanë lajmëruar shërbimin e ambulancës dhe policinë.

Policia është në vendngjarje dhe ka nisur hetimet për të identifikuar autorët dhe motivet e sulmit. Deri më tani nuk ka një reagim zyrtar mbi rrethanat e plota të incidentit.

Ngjarja ka shkaktuar reagime në komunitetin lokal dhe ngre shqetësime serioze për sigurinë e punonjësve të shërbimeve publike.

Në orët e para të mëngjesit të kësaj të enjte është përfshirë nga flakët një banesë.
Ngjarja është regjistruar në fshatin Pocestë të bashkisë së Maliqit ndërkohë sipas informacioneve kanë qenë dy mjete zjarrfikëse që kanë ndërhyrë për shuarjen e flakëve.

Paraprakisht dyshohet se shkak i zjarrit të jetë një shkëndijë elektrike ndërsa sipas asaj që raporton policia fatmirësisht nuk ka të lënduar por banesa ka pësuar dëme të shumta materiale.

Ish-kryeministri Sali Berisha ka reaguar pas vendimit të Asamblesë Kombëtare, e cila votoi PRO që Kosova të avancojë edhe më tej drejt anëtarësimit në Këshillin e Europës.

Berisha e ka quajtur moment historik votimin dhe realizim të një ëndrre fisnike të presidentit Ibrahim Rugova.

Berisha: Sonte dua të përshëndes në emër tuaj dhe të PD, një ngjarje historike për Kosovën dhe kombin. Sot, Asambleja Parlamentare e Këshillit të Europës votoi me mbi dy të tretat e të pranishmëve për Kosovën anëtare të Këshillit të Europës. Për Kosovën e lirë dhe të pavarur.

Të dashur miq, kjo është një arritje historike, është realizimi i një ëndrre fisnike të madhe të presidentit Ibrahim Rugova. Realizimi i një ëndrre të mijëra e mijëra vajzave dhe djemve të Kosovës që ranë për t’u bërë të pavdekshëm për një Kosovë të lirë, të pavarur dhe evropiane.

Votimin e ka përshëndetur edhe presidenti Begaj dhe ministri për Evropën dhe Punët e Jashtme, Igli Hasani. Në një postim në Facebook, Begaj shkruan se tashmë pritet edhe votimi final, për të përcaktuar edhe momentin për të festuar.