Ministri i Mbrojtjes Niko Peleshi ka njoftuar ditën e sotme se anija shqiptare e patrullimit Oriku ka shpëtuar një gomone me emigrantë që rrezikonin të mbyteshin në detij Egje.

Përmes një postimi në Facebook Peleshi tha se emigrantët i janë dorëzuar Rojës Bregdetare greke për procedurat e mëtejshme, për shkak se ndodheshin në ujërat territoriale që i përkasin Greqisë.

Gjithashtu anija Oriku është caktuar prej kohësh si një ekuipazh paqeruajtës që ndihmon në monitorimin e Egjeut me detyrë të caktuar nga NATO.

“Anija shqiptare Oriku me mision në detin Egje vijon kontributin në parandalimin e emigracionit të paligjshëm në ujërat e Aleancës. Ekuipazhi shqiptar, gjatë lundrimit në rajonin e patrullimit, shpëtoi një gomone në vështirësi me 20 persona në bord. Shtetasit nga Palestina iu dorëzuan Rojës Bregdetare greke për procedurat e mëtejshme,” shkruan Peleshi.

GAZA- Sulmet ajrore izraelite vranë më shumë se 60 palestinezë në Gazën jugore dhe qendrore gjatë ditë së djeshme dhe natës së shkuar, raportojnë agjencitë e lajmeve.

Njëri prej sulmeve goditi një “zonë të sigurt”, të shpallur nga Izraeli, e cila ishte e mbushur me mijëra njerëz të zhvendosur.

Duke iu referuar mesa duket këtij sulmi, ushtria izraelite tha se kishte në shënjestër një komandant në njësinë detare të grupit militant, Xhihadi Islamik, në perëndim të qytetit Kan Jonis.

Ajo tha se është duke i analizuar raportet për vrasjen e civilëve.

Zyrtarët në Spitalin Naser të Kan Jonisit thanë se së paku 17 persona janë vrarë vetëm në këtë sulm.

Ushtria izraelite kreu disa sulme vdekjeprurëse në ditët e fundit në Gazë, përfshirë një më 13 korrik në kampin e refugjatëve, Al Mavasi, ku u vranë më shumë se 90 njerëz.

Lufta në Gazë nisi tetorin e kaluar, kur Hamasi – grup i shpallur terrorist nga SHBA-ja dhe fuqi të tjera – sulmoi Izraelin, duke vrarë rreth 1.200 njerëz dhe duke marrë peng qindra të tjerë.

Në përgjigje, Izraeli nisi një fushatë intensive sulmesh në Gazën e kontrolluar nga Hamasi, e cila vazhdon ende.

Sipas autoriteteve atje, mbi 38.000 njerëz u vranë prej se nisi lufta.

Sekretari amerikan i Shtetit, Antony Blinken, tha këtë javë se numri i viktimave në Gazë “është në mënyrë të papranushme i lartë”.

Ndërmjetësuesit ndërkombëtarë, përfshirë ata nga Egjipti dhe Katari, janë duke punuar për të bindur Izraelin dhe Hamasin për një marrëveshje, që do t’i ndalonte luftimet dhe do t’i lironte rreth 120 pengje që mbahen ende nga grupi militant në Gazë./REL

Ministria e Shëndetësisë e Gazës thotë se 37,900 palestinezë janë vrarë dhe 87,060 janë plagosur që kur Izraeli filloi luftën e tij në enklavën bregdetare në tetor.

Numri përfshin të paktën 23 vdekje gjatë 24 orëve të fundit, tha një deklaratë e ministrisë.

Numri i të vdekurve ka të ngjarë të jetë shumë më i lartë me mijëra trupa të pagjetur që besohet se janë varrosur në rrënojat e ndërtesave të shkatërruara.

Të paktën 200 persona kanë mbetur të vrarë në Izrael që kur militantët e Hamasit nisën një sulm të befasishëm të shtunën herët në mëngjes, sipas shërbimit të shpëtimit emergjent të Izraelit, Zaka.

Sipas një bilanci paraprak, të paktën 1,452 njerëz kanë mbetur të plagosur, tha ministria izraelite e shëndetësisë.

Këshilli i Sigurimit i OKB-së do të mbajë një takim urgjent të dielën për të trajtuar situatën në Lindjen e Mesme.

Presidenti amerikan Joe Biden zhvilloi më herët një bisedë me kryeministrin Benjamin Netanyahu ku konfirmoi se mbështetja e SHBA për sigurinë e Izraelit “është e fortë dhe e palëkundur”.

Në një fjalim nga Shtëpia e Bardhë, Biden dënoi grupin militant Hamas për fillimin e një sulmi të befasishëm ndaj Izraelit, duke theksuar se: “Nuk ka asnjëherë justifikim për sulmet terroriste.”

Sipas Biden, SHBA-të do të kenë mbështetjen e Izraelit. “Ne do të sigurohemi që ata të kenë ndihmën për të cilën qytetarët e tyre kanë nevojë dhe ata mund të vazhdojnë të mbrojnë veten,” tha presidenti.

Presidenti amerikan dekurajoi palët e tjera armiqësore ndaj Izraelit, nga shfrytëzimi i sulmeve në avantazhin e tyre.

“Bota po shikon”- paralajmëroi udhëheqësi amerikan./tch