Në ditën e fundit për dorëzimin e listave të kandidatëve për deputetë, Partia Demokratike ka mbledhur Kryesinë për të finalizuar emrat. Lideri i PD-së, Sali Berisha, ka komentuar lajmet mbi përjashtimin e Dash Sulës nga listat, si dhe largimin e Aleancës së Maqedonasve nga koalicioni.

Para selisë blu, Berisha deklaroi se listat ende nuk janë miratuar. Ai theksoi se Sula nuk është përjashtuar dhe se ai ka meritat e tij.

“S’është përjashtuar dhe s’mund të përjashtohet. Ka meritat e veta. Nuk kam komunikuar me zotin Sula. Telefoni im ka mijëra mesazhe, edhe mund të më ketë shkruar. Ai është njeri i respektuar,” tha Berisha.

Nga ana tjetër, ai e quajti “tradhti” largimin e Vasil Sterjovskit të Aleancës së Maqedonasve, duke shtuar: “Saç është i vjetër njeriu, është edhe tradhtia.”

Ndërkohë, Berisha tha se ai është i fokusuar te përgatitja për qeverisjen pas zgjedhjeve të 12 majit, duke shmangur debatet mbi listat. “Unë them po përgatis qeverinë, ti thua dorëheqjen,” përfundoi ai.