Autostrada kombëtare Athinë-Selanik mbetet e mbyllur pas motit të keq që goditi Thesalinë , ndërsa problem ka edhe rrjeti hekurudhor.

Nga ana tjetër, në trekëndëshin Larisa, Kardita, Trikala, të gjitha arteriet kryesore rrugore në Thesali janë të hapura, përveç aksit Trikala-Larisa, tha zëvendës përfaqësuesi i Zjarrfikësve, Giannis Artophios, gjatë konferencës emergjente nga nQendra e Koordinimit të Operacioneve në Larisa.

Përveç kësaj, ai vuri në dukje se po bëhen përpjekje dhe se në një të ardhme të afërt do t’i jepet energji elektrike Larisës.

Njëkohësisht ai theksoi se qendra operative e Brigadës së Zjarrfikësve dhe Mbrojtjes Civile ka marrë më shumë se 11725 thirrje në shkallë vendi me 4592 shpëtime dhe evakuime të bashkëqytetarëve tanë në vende të sigurta, prej të cilave 807 janë kryer nga ajri.

Stuhitë e tërbuara që goditën jugun e Ballkanit, përfshinë gjatë natës edhe veriperëndimin e Turqisë.

5 persona humbën jetën dhe 4 të tjerë janë shpallur të zhdukur në qytetin më të populluar të Turqisë, atje ku ujërat e rrëmbyer të përmbytjeve morën me vete automjete dhe përmbytën qindra ndërtesa.

Ndërsa në Greqi u thellua në 2 të vdekur dhe 3 të zhdukur, bilanci i stuhisë katastrofike që goditi të martën rajonet qëndrore dhe perëndimore të vendit. Mediat greke bëjnë të ditur se një prej viktimave është një fermer shqiptar 51-vjeçar, i cili humbi jetën pas shembjes së një muri në Volos, qytetin e goditur më rëndë nga përmbytjet katastrofike.

Dy viktima nga përmbytjet e të martës edhe në Carevo të Bullgarisë, aty ku autoritetet e shpallën këtë të mërkurë ditë zie. Stuhitë dhe përmbytjet kanë shkaktuar katastrofë edhe përtej kontinentit, në Brazil atje ku 21 persona humbën jetën në Lazhedu qytetin jugor që u përmbyt i gjithi.