Kryebashkiaku i Tiranës, Erion Veliaj ka ankimuar në Apelin e GJKKO masën arrest me burg të caktuar ndaj tij më 10 shkurt.

Avokati i Veliajt ka depozituar ankimin në Apel përmes postës me datë 14 shkurt, 2 ditë pasi GJKKO la në fuqi masën e arrestit me burg.

Burime për mediat pohojnë se mbrojtja nuk ka depozituar ankim për bashkëshorten e veliajt, Ajola Xoxa e cila është në masën ‘detyrim paraqitjeje’.

Veliaj është nën akuzë për dy vepra penale, korrupsion dhe pastrim parash. Por, kryebashkiaku mohon akuzat e ngritura ndaj tij, duke e quajtur një gjyq politik 3 muaj para zgjedhjeve dhe sipas tij në dosje nuk ka asnjë fragment ku thuhet se ka kërkuar apo ka marrë ryshfet.

Gjykata e Posaçme e Apelit ka rrëzuar dje kërkesat e anëtarëve të grupit kriminal të vëllezërve Çopja duke lënë në fuqi masat e sigurisë që u miratuan nga Shkalla e Parë. Të arrestuarit e operacionit “Plumbi i artë 2”, që zbuloi dhe aktivitetin e o0rganizatës kriminale të drejtuar nga Franc e Hajdar Çopja nga Elbasani kundërshtuan masat e sigurisë, mes të cilëve bënin pjesë edhe ish gjyqtarja e Gjykatës së Elbasanit Pajtime Fetahu që ndodhet në arrest shtëpie. Ish-gjyqtarja akuzohet për ‘Korrupsion pasiv të gjyqtarëve, prokurorëve dhe funksionarëve të tjerë të organeve të drejtësisë. Më 29 korrik 2024, GJKKO firmosi 33 masa sigurie, nga të cilat 13 u ekzekutuan ndërsa, 2 rezultojnë të arrestuar më parë jashtë Shqipërisë.

Ndërkohë që lidhur me këtë operacion nisi edhe një hetim nga SPAK mbi dyshimet se u dekonspirua, gjë e cila çoi në sekuestrimin apo vëzhgimin e telefonave të një sërë zyrtarëve të lartë të policisë, punonjësve që morën pjesë në ekzekutimin e masave si dhe të agjentëve të BKH-së. SPAK thotë se organizata kriminale, kishte arritur të rekrutonte edhe dy punonjës të policisë së shtetit dhe një punonjëse në gjykatën e Elbasanit që u jepte informacione sekrete. Shtrirja e tyre sa i takon trafikut të drogës ishte në Europë dhe më gjerë se kaq pasi kishin arritur të fuqizoheshin ekonomikisht. Të paktën 4 atentate me 6 të vrarë, 3 vrasje të mbetura në tentativë, 14 të porositura, dhe grabitja e 4.6 milion eurove në Rinas në prillin e vitit 2019 janë vetëm disa prej krimeve të zbardhura.