VLORË- Një protestë është zhvillur ditën e sotme në Vlorë nga banorët e lagjes “1 Maji” pas aksionit për prishjen e banesave të tyre.

Banorët kanë dalë kundër prishjes së banesave dhe janë shprehur se janë të gjitha me leje. Një qytetare është shprehur se janë nxjerrë njerëzit në rrugë dhe më pas janë prishur shtëpitë. Sipas saj, qëllimi i vërtetë i prishjes së banesave është ndërtimi i një pallati.

Ajo ka treguar se ka shkuar te kryebashkiaku i Vlorës por ai nuk e ka dëgjuar dhe i ka thënë të dalë jashtë. Gjithashtu thotë se nuk ju ka premtuar asnjë dëmshpërblim për prishjen e shtëpive.

“Kryetari nuk na premtoi asgjë. Na tha dil përjashta. Nuk do pranojmë të dalim nga shtëpia. Do digjem unë dhe do digjet shtëpia. Nuk do ja lë shtetit.”, është shprehur ajo.

Në plazhet e Lukovës e Piqerasit IKMT ka filluar prishjen e disa struktura provizore që përdoren gjatë sezonit turistik si bare verore.

Disa prej bizneseve me këtë natyrë në plazhin e Shpellës në Lukovë kanë denoncuar sot prishjen selektive të një pjese të objekteve ndërsa i gjithë bregdeti sipas tyre ka leje të njëjta shfrytëzimi për sezonin.

Disa struktura janë shembur nga IKMT në këtë zonë sot ndërsa aksioni pritet të vijojë edhe nesër. Aksioni nuk ishte paralajmëruar dhe shumë biznese nuk kishin larguar nga këto godina orenditë e shërbimit.

Kryeinspektori i IKMT-së Ervin Hoxha, që ndoqi nga afër ndërhyrjen, tha se ky territor është zaptuar dhe nuk ka nevojë për të marrë masa e rekomandime, por ky plazh do të kthehet në gjendjen e mëparshme.

“IKMT do vijojë në përmbushje të detyrave të saj, bashkë me Policinë e Shtetit aksionin në bregdet me qëllim pastrimin e menjëhershëm të plazheve të zaptuara. Aksioni do të shtrihet deri në vijën fundore bregdetare, me ndëshkime e penalitete për personat dhe subjektet që zaptojnë plazhet“, deklaroi Hoxha.

Marrja e lejeve provizore për të ushtruar aktivitetin në këtë zonë është shoqëruar çdo vit mes konflikte të shumta mes vetë bizneseve por edhe me njësitë vendore.