Përleshjet me armë zjarri dhe bombardimet tronditën të shtunën qytetin Rafah në pjesën jugore të Gazës, thanë dëshmitarët. Ndërkohë, ushtria izraelite njoftoi se ndihmat e para humanitare kishin hyrë në territorin e rrethuar përmes një platforme pluskuese të ndërtuar nga ushtria amerikane.

Luftimet mes forcave izraelite dhe militantëve palestinezë janë ndezur përsëri në pjesën veriore të Gazës ndërsa kanë kaluar 10 ditë që kur ushtria izraelite njoftoi fillimin e një operacioni të kufizuar në Rafah. Spitali kuvajtian tha se një sulm izraelit gjatë natës la dy të vrarë në një kamp në Rafah. Dëshmitarët njoftuan për luftime të ashpra dhe bombardime në juglindje të qytetit dhe avionë që bombarduan zonat lindore.

Korrespondentë të agjencisë franceze të lajmeve, AFP, dëshmitarë dhe mjekë thanë se gjatë natës pati luftime intensive në kampin e refugjatëve në Jabalia. Një ditë më parë ushtria izraelite njoftoi për luftimet më të ashpra në qytet në më shumë se shtatë muaj luftë. Ushtria izraelite tha se deri në mbërritjen e saj, disa ditë më parë, qyteti kishte qenë tërësisht nën kontrollin e Hamasit. Militantët e Hamasit sulmuan Izraelin më 7 tetor duke vrarë 1200 njerëz dhe marrë peng më shumë se 250 të tjerë, sipas Izraelit, çka shkaktoi ndërhyrjen në shkallë të gjerë në territorin palestinez. Izraeli është zotuar ta shkatërrojë Hamasin.

Ushtria izraelite ka goditur militantët e Hamasit në pjesën veriore të territorit ndërsa në jug militantët sulmuan tanket izraelite që po grumbullohen rreth qytetit Rafah. Ndërkohë, ushtria amerikane njoftoi se ndihmat e para humanitare u futën në territorin e rrethuar detar, vala e parë e ndihmave prej disa javësh që mbërrin në Gazë. Ushtria amerikane ndërtoi një platformë pluskuese për të ndihmuar në dërgimin e ndihmave përmes rrugëve detare.

Komanda Qendrore e Shteteve të Bashkuara njoftoi se gjatë ditëve të ardhshme pritet dërgimi i rreth 500 tonë ndihma në Gazë përmes platformës pluskuese.

Kombet e Bashkuara dhe grupet e ndihmave humanitare thonë se korridori detar dhe dërgesat e ndihmave nga ajri nuk mund të zëvendësojnë kolonat e kamionëve me ndihma që mund të futen në Gazë. Kombet e Bashkuara kanë paralajmëruan vazhdimisht rrezikun e urisë që po kanos popullsinë e zhvendosur.

Ndërkohë në Verona të Italisë, Papa Françesku bëri thirrje për paqe ndërsa përqafoi një izraelit dhe një palestinez, të afërmit e të cilëve ishin vrarë nga militantët e Hamasit dhe forcat izraelite. “Të lutemi për paqe dhe t’u themi këtyre dy vëllezërve që ta përcjellin tek populli i tyre dëshirën dhe vullnetin tonë për të punuar për paqen”,tha Papa Françesku.

Izraeliti Maoz Inon i tha Papës se prindërit e tij ishin vrarë nga Hamasi. Palestinezi Aziz Abou Sarah tha se vëllai i tij ishte vrarë nga forcat izraelite. Ai tha se dhimbja dhe pikëllimi i ka bashkuar ata për të krijuar mundësinë e një dialogu dhe një ardhme më të mirë për të dy popujt./ Voa

Në mëngjesin e kësaj të diele, Izraeli ka dërguar mjete të reja ushtarake në pjesën Veriore të Rripit të Gazës.

Forcat izraelite shtuan tanket në kampin e refugjatëve Jabalin pas një nate bombardimesh të rënda nga ajri dhe toka, që shkaktuar 19 të vrarë dhe dhjetëra të tjerë të plagosur, sipas zyrtarëve të shëndetësisë në Gazë.

Jabalia është më i madhi nga tetë kampet historike të refugjatëve të Gazës ku jetojnë më shumë se 100,000 persona, shumica e të cilëve pasardhës të palestinezëve që u dëbuan gjatë luftës arabo-izraelite të vitit 1948, e cila çoi në krijimin e shtetit të Izraelit.

Ushtria izraelite ka njoftuar se sapo ka nisur sulme ushtarake në lindje të qytetit Rafah, pavarësisht gjithë paralajmërimeve nga aleatët ndërkombëtarë, mes tyre edhe SHBA.

Izraeli ka njoftuar se forcat e tyre po godasin objektivat e Hamasit në rajon.

Më shumë se 1 milion palestinezë të zhvendosur nga vendbanimet e tyre në Gaza kanë kërkuar strehim në Rafah mes sulmeve të Izraelit në Gaza, ka raportuar Washington Pos

Një sulm izraelit në Rafah, në jug të Gazës, do të shkaktonte katastrofë për civilët, jo vetëm në Gazë, por në mbarë Lindjen e Mesme, tha kreu i grupit të ndihmës, Këshilli Norvegjez për Refugjatë.

Sipas Jan Egeland, një sulm në Rafah, që Izraeli ka paralajmëruar, do të bënte që rajoni të përballej me “numërimin së prapthi për një konflikt më të gjerë”.

Egeland tha për agjencinë Reuters se 1.3 milion civilë që po strehohen në Rafah – përfshirë edhe pjesë e stafit të Këshillit Norvegjez për Refugjatë – po jetojnë “në frikë të jashtëzakonshme” nga një ofensivë izraelite.

Gjatë kësaj jave, Izraeli ka intensifikuar sulmet ajrore ndaj Rafahut, pasi tha se do të evakuojë civilët para sulmit që planifikon të kryejë në këtë vendndodhje, pavarësisht se aleatët kanë paralajmëruar se një sulm i tillë do të shkaktonte viktima të shumta.

Egeland i bëri thirrje kryeministrit izraelit, Benjamin Netanyahu, që të mos kryejë operacion në Rafah.

“Netanyahu, ndaloje këtë. Do të ishte katastrofë jo vetëm për palestinezët, por edhe për Izraelin. Do të jetë njollë përgjithmonë në ndërgjegjen e Izraelit dhe historisë”, tha ai.

“Ne nuk na duhet një luftë e re në Lindje të Mesme. Në këtë moment, ndiej se ky është një numërim së prapthi për një konflikt më të madh”, shtoi ai.

Izraeli po kryen ofensivë tokësore dhe ajrore në Rripin e Gazës për më shumë se gjashtë muaj dhe ka thënë se qëllimi i tij është që të zhdukë Hamasin, grupin palestinez të shpallur organizatë terroriste nga Shtetet e Bashkuara dhe Bashkimi Evropian.

Lufta nisi pasi Hamasi më 7 tetor sulmoi jugun e Izraelit, duke vrarë afër 1.200 persona dhe duke rrëmbyer afër 250 të tjerë. Si pasojë e ofensivës ushtarake izraelite, në Gazë janë vrarë më shumë se 34.000 palestinezë.

“Gaza është përballur me bombardime më të mëdha sesa Alepo, Raka, apo Mosuli”, tha Egeland, duke iu referuar qyteteve në Siri dhe Irak, që janë përballur me fushata bombarduese të ashpra në dekadën e fundit.RE