Disa rajone të Italisë po përballen sërish me mot të keq, përmbytje dhe stuhi që kanë shkaktuar dëme dhe alarme në disa zona. Në Siçili, në Leonforte dy makina përfunduan në lumin Crisa dhe dy persona u shpëtuan nga zjarrfikësit, ndërsa një person tjetër rezulton i zhdukur.

Në Sardenjë, shiu dhe breshëri kanë shkatërruar hektarë të tërë me tokë bujqësore dhe kanë përmbytur disa qytete. Departamenti i Mbrojtjes Civile ka lëshuar një alarm portokalli për Ligurinë dhe Lombardinë duke filluar nga ora 21:00 e së martës. Në Milano dhe Bergamo, kopshtet dhe parqet publike do të mbyllen më 20 gusht.

Në Italinë Veriore dhe Qendrore, reshje të forta me stuhi priten në rajonet Valle d’Aosta, Piemonte, Liguria, Lombardi, Emilia-Romagna, Friuli-Venezia Giulia, Veneto dhe Toskana. Për këto zona, është lëshuar alarm i verdhë nga Mbrojtja Civile.

Arezzo ka përjetuar rrebeshin e tretë të rrëmbyeshëm brenda tre ditësh i cili ka shkaktuar përmbytje dhe ka bllokuar disa rrugë. Ndërkohë, në Peruxhia, erërat dhe reshjet e dendura rrëzuan pemë në autostradën Perugia-Bettolle, duke detyruar mbylljen e përkohshme të saj.

Autoritetet bëjnë thirrje për kujdes maksimal dhe ndjekje të udhëzimeve të emergjencës.

Një shqetësim i madh, i përqendruar aktualisht në zonën e Ballkanit, do të çojë në një përkeqësim gradual të kushteve të këqija të motit në Itali, me reshje të shpërndara në të gjithë territorin, veçanërisht në sektorët e Adriatikut, më të përhapura dhe të vazhdueshme në Emilia-Romagna dhe Marche, raportojnë mediat italiane.

Për më tepër, formimi i një zone me presion të ulët mbi detin e poshtëm Tirren do të gjenerojë një intensifikimin e erërave veri-lindore mbi sektorët qendror-veriorë të Adriatikut.

Bazuar në parashikimet e disponueshme, Departamenti i Mbrojtjes Civile ka lëshuar një paralajmërim për kushtet e pafavorshme të motit.
Paralajmërimi parashikon reshje të përhapura dhe të vazhdueshme nga orët e para të ditës së nesërme, duke përfshirë shira ose stuhi, në Emilia-Romagna dhe Marche, dhe nga mëngjesi, reshje të shpërndara, duke përfshirë shira ose stuhi, në Abruzzo dhe Molise, veçanërisht në sektorët bregdetarë dhe në Kampania, Pulia dhe Bazilikata.

Këto dukuri do të shoqërohen me reshje të dendura shiu, aktivitet të shpeshtë elektrik (rrufe), stuhi lokale breshëri dhe me erëra të forta. Për më tepër, nga nesër herët në mëngjes priten erëra të forta deri në stuhi në Friuli Venezia Giulia, Veneto, Emilia-Romagna dhe Marche, veçanërisht në sektorët bregdetarë dhe Apenin.

Në bazë të fenomeneve të pritshme dhe të vazhdueshme, alarm i verdhë është vlerësuar për nesër në një pjesë të Emilia-Romagna, Marche, Umbria, Lazio, Abruzzo, në të gjithë territoret e Molise, Basilicata dhe Puglia, në një pjesë të Campania-s dhe Sardenjës.

Autoritetet ruse thanë të martën se një rafineri dhe një depo nafte u goditën nga sulmet ukrainase me dronë dhe raketa në disa rajone ruse, ndërsa zyrtarët ukrainas thanë se Rusia e shkatërroi një ndërtesë banimi në Kupiansk.

Ministria e Mbrojtjes e Rusisë tha se nëntë rajone të saj u sulmuan nga dronët ukrainas, dhe se mbrojtja e saj ajrore rrëzoi raketa ukrainase në rajonin Belegorod mëngjesin e së martës.

Ministria ruse tha se 25 dronë ukrainas u “vërejtën dhe u shkatërruan”. Njëmbëdhjetë u rrëzuan mbi rajonin Kursk, shtatë mbi Belgorod, ndërsa të tjerët në Briansk, Leningard, Moskë, Oriol dhe Tula. U raportua edhe për rrëzimin e një droni mbi qytetin Voronezh në perëndim të Rusisë. Ukraina nuk i ka komentuar këto raportime.

Guvernatori i Belgorodit, Vyacheslav Gladkov, tha në Telegram se një dron ukrainas i hodhi katër mjete shpërthyese mbi rajonin e tij. Ai tha se një grua civile u plagos në Shebekin, derisa shtëpitë dhe rrugët u dëmtuan dhe se disa fshatra mbetën pa rrymë. Pretendimet e tij nuk kanë mundur të verifikohen në mënyrë të pavarur. Në rajonin Oriol, droni e goditi një ndërtesë për ruajtjen e naftës, duke shkaktuar zjarr, thanë autoritetet lokale, duke shtuar se 17 njerëz u evakuuan nga ndërtesat e larta në afërsi.

Në Nizhni Novgorod, droni e goditi një depo të naftës e cila u përfshirë nga zjarri, sipas guvernatorit të këtij rajoni, Gleb Nikitin.

Shërbimi Emergjent Shtetëror i Ukrainës, ndërkohë, tha se Rusia e hodhi një bombë në një ndërtesë banimi në qytetin Kupiansk, në lindje të rajonit Harkiv, të martën. Bomba shkaktoi dëme të mëdha dhe zjarr, por nuk u raportua për viktima, tha ky shërbim në Telegram.

Në rajonin perëndimor të Ukrainës, Ternopil, administrata rajonale ushtarake raportoi se një dron rus e dëmtoi infrastrukturën, por nuk u raportua për viktima. Ushtria ukrainase tha se sistemet e saj të mbrojtjes ajrore i rrëzuan 17 nga 22 dronët e lëshuar nga Rusia.