Katër persona mbetën të plagosur në metronë e qytetit të Lionit, në Francë, pasi një agresor i sulmoi me armë të ftohtë.

Autori i sulmit u ndal nga forcat e policisë. Sipas të dhënave zyrtare, dy nga të plagosurit u lënduan në bark dhe gjendja e tyre është e rëndë, por jo në rrezik për jetën.

Ndërsa dy të tjerët u prekën nga thika vetëm tek pjesa e krahëve. Ndërkohë, një grua që pa ngjarjen e rëndë u transportua në spital në gjendje shoku.

Për ngjarjen nuk është angazhuar Prokuroria e Antiterrorit, por është hapur një hetim nga policia kriminale për “tentativë vrasjeje”.

Agresori është një shtetas maroken, 27 vjeç dhe paprecedent penal. Sipas mediave franceze, në të kaluarën ai ka qenë disa herë i shtruar në spital për probleme mendore.

Edhe dëshmitarët e përjashtuan mundësinë që përpara sulmit ai të ketë shqiptuar fjalë me përmbajtje ideologjike apo fetare.

Episodi i dhunshëm ndodhi në një vagon treni, por njerëzit e kishin parë të dyshuarin edhe në stacion, ku sillej në mënyrë të çuditshme.

Sipas një zëdhënësi të forcave të rendit, vagoni ishte i mbushur me njerëz në momentin kur agresori u hodh në aksion.

Menjëherë më pas ai u përpoq të hiqte qafe armën, një thikë me sustë, që më pas iu gjet në posedim bashkë me një pasaportë.

 Një apartament në katin e pestë të një pallati u përfshi nga flakët në rrugën “Nënë Tereza” në Fushë Kosovë gjatë ditës së premte, ku për pasojë 16 persona kanë kërkuar ndihmë mjekësore.
Si pasojë e zjarrit disa banorë janë evakuuar nga objekti, ndërsa si pasojë e tymit 12 qytetarë, dy zyrtarë policorë dhe dy zjarrfikës kanë marrë ndihmën mjekësore.
Shkaqet e rënies së zjarrit janë të paqarta, ndërsa autoritetet po hetojnë për zbardhjen e plotë të ngjarjes.