Ernest Muçi është përshtatur shpejt dhe shumë mirë te Besiktasi, skuadër të cilën e riktheu pas tri vitesh në finalen e Kupës së Turqisë falë golit vendimtar që realizoi përballë Ankaragucut.

Talenti i kombëtares shqiptare nuk e fshehu gëzimin e tij për golin, fitoren dhe kualifikimin, teksa ua dedikon tifozëve kalimin në finalen e madhe. Përballë fituesit të çiftit Karagumruk-Trabzonspor (2-3).

“Ndeshje shumë e rëndësishme, jemi të lumtur që fituam. Zhvilluam një ndeshje të madhe për të shpëtuar sezonin. E dinim që tifozët e donin me çdo kusht këtë fitore, dhe ne ia dolëm për ta.

Treguam karakter, ndërkohë që tifozët na motivuan me mbështetjen e tyre. Shënova një gol të rëndësishëm, arritëm një fitore të rëndësishme. Jemi të gjithë shumë të lumtur”.

23-vjeçari u ndal edhe te shokët e rinj të skuadrës, ku sigurisht veçon Milot Rashicën, shqiptarin tjetër të skuadrës nga Stambolli. Mikun e tij më të mirë.

“Mund të them se jam përshtatur mjaft mirë me skuadrën dhe shokët. Të gjithë djemtë janë miqësorë. Më i miri është Miloti, ai është shoku im. Po argëtohemi, kalojmë shumë bukur me njëri-tjetrin”.

Armenia dhe Kosova po luajnë një ndeshje miqësore në futboll. Sfida në stadiumin e Yeravanit nisi në orën 17:00, teksa vendasit çuditën me gjestin në fanellë.

Nëse shohim në bluzat e Armenisë, në sektorin ku vendosen dy flamujt e shteteve që luajnë përballjen (pjesa e gjoksit), flamuri i Kosovës është përmbys. Ende nuk ka një përgjigje për arsyen e këtij gabimi, që në rastin më të mirë do ishte nga padija.

Asnjë reagim as nga Federata e Futbollit të Kosovës, që mbase nuk e ka vënë re diçka të tillë. Dueli u zhbllokua nga Milot Rashica në minutën e 25-të.