Tiranë- Këshilli i Ministrave ka miratuar disa ndryshime dhe shtesa në vendimin që përcakton strukturën dhe nivelet e pagave, si edhe shtesat mbi pagë për funksionarët dhe nëpunësit e administratës publike.

Propozimi, i ardhur nga zëvendëskryeministri, synon përmirësimin dhe përditësimin e kuadrit rregullator të pagave në shërbimin civil, duke reflektuar nevojat aktuale të strukturave shtetërore.

Ndryshimet përfshijnë zëvendësimin e tabelave përkatëse që janë pjesë përbërëse e vendimit fillestar me një version të ri, të bashkëlidhur në vendimin më të fundit. Kjo nënkupton një riformatim të strukturës së pagave dhe kategorizimeve të pozicioneve brenda administratës.

Në mënyrë specifike, vendimi parashikon një shtesë mujore prej 65,000 lekësh për pozicionet “Sekretar i Përgjithshëm” dhe “Zëvendëssekretar i Përgjithshëm”, duke sjellë një rritje të konsiderueshme në përfitimet për këto role drejtuese.

Gjithashtu, është bërë një saktësim në lidhje me pozicionin e “Koordinatorit”, i cili tashmë përcaktohet më qartë brenda njësive të menaxhimit që veprojnë pranë sekretarëve të përgjithshëm dhe zëvendëssekretarëve. Ky përcaktim mund të ndikojë edhe në nivelin e përfitimeve financiare për këtë kategori.

Efektet financiare të këtij vendimi do të mbulohen nga buxheti i miratuar për Kryeministrinë për vitin 2025 dhe do të hyjnë në fuqi në momentin e emërimit të punonjësve në pozicionet përkatëse.

Vendimi pritet të ndikojë drejtpërdrejt në të ardhurat e një numri të rëndësishëm nëpunësish dhe drejtuesish në administratën publike shqiptare.

KOSOVË- Nga viti 2010 deri në mars të vitit 2025, në Kosovë janë vrarë 59 gra. Sipas një infografike të publikuar nga Radio Evropa e Lirë, vitet më tragjike kanë qenë 2018 dhe 2020, kur u regjistruan nga 7 viktima, ndërsa vitet tjera shënojnë luhatje, me një rënie të lehtë në vitet e fundit, por me një prani të vazhdueshme të rasteve.

Organizatat për mbrojtjen e të drejtave të njeriut kanë theksuar se institucionet kanë dështuar në shumë raste në mbrojtjen e grave që kanë raportuar dhunë apo kanë kërkuar ndihmë. Sipas raporteve, shumica e vrasjeve janë kryer nga bashkëshortët, ndërsa në raste të tjera kur krimet janë kryer nga baballarët dhe djemtë e viktimave.

Ndryshe, gjatë dy ditëve të kaluara në Vushtrri janë shënuar tre vrasje me armë zjarri, mes të cilave edhe një grua. Rrjeti i Grave të Kosovës është shprehur thellësisht i shqetësuar për vrasjen e gruas në Vushtrri.

“Kjo tragjedi tregon edhe një herë se gratë nuk janë të sigurta dhe se kjo pasiguri ndaj tyre vazhdon t’ua marrë jetën. Kërkojmë me ngulm që institucionet të veprojnë menjëherë dhe të sigurojnë mbrojtje maksimale për gratë në Kosovë”, ka thënë kjo organizatë përmes një postimi në Facebook.

Kjo situatë tregon nevojën urgjente për masa më të forta institucionale për parandalimin e dhunës në familje dhe mbrojtjen e grave të rrezikuara. Aksionet e shoqërisë civile dhe presioni mbi autoritetet mbeten vendimtare për të ndryshuar këtë realitet të dhimbshëm./ REL

Muaji tetor i këtij viti ka shënuar një numër prej 142 aksidentesh rrugore, krahasuar me 98 rastet në tetorin e 2023, duke e çuar në 44 më shumë numrin e aksidenteve të ndodhura.

Sërish sa i takon të njëjtës periudhë të një viti më parë, të dhënat më të fundit të publikuara nga INSTAT tregojnë se 90,1 % e rasteve kanë ndodhur si pasojë e sjelljes së drejtuesit të mjetit, shkak edhe mosrespektimi i rregullave të qarkullimit rrugor, që ka përfshirë grupmoshat nga 25-34 vjeç, dhe që zënë 23,2 % të numrit në total.

Dita e enjte ka rezultuar më fatale, ku ka patur një numër më të lartë të aksidenteve, ndërsa e premtja ka qenë dita më e ulët në numër aksidentesh.

Nga 142 aksidenteve rrugore të ndodhura brenda një muaji në vendin tonë, afro 36 prej tyre kanë ndodhur përgjatë harkut kohor 08:00-12:00,

Kryeqyteti rezulton me numrin me të lartë të aksidenteve rrugore të ndodhura, që shkon në 45, e ndjekur nga Vlora dhe Shkodra me 18 aksidente rrugore secila, ndërsa qyteti që ka 0 është Berati, Korça me dy e ndjekur nga Elbasani dhe Kukësi me 3 aksidente rrugore.

Sipas të njëjtave të dhëna nga INSTAT, statistikat tregojnë se gjatë 10 mujorit të këtij viti mesatarja është 7 aksidente rrugore çdo ditë në totalin prej 1,857 aksidenteve rrugore që u shënuan që në muajin e parë të këtij viti.

Krahasuar me të njëjtën periudhë të një viti më parë, rastet janë rritur me 44,9%. Ndërsa vdekshmëria në aksidentet rrugore është 9,7 për 100 aksidente, nga 15,8 që ishte në të njëjtën periudhë të një viti më parë.

/a.r