Një tërmet me magnitudë 6 ballë goditi lindjen e rajonit të Ishujve Kuril në Rusi, tha Qendra Sizmologjike Evropiane-Mesdhetare.

Tërmeti ishte në një thellësi prej 10 km, shkruan Reuters.

Bëhet e ditur se tërmeti u ndje deri në Japoni pasi Ishujt Kuril janë një arkipelag i vendosur pranë Hokkaidos, një nga ishujt më të mëdhenj të Japonisë.

\Deri më tani nuk ka informacione për dëme ose viktima.

Gjithashtu, autoritetet japoneze dhe ruse ende nuk kanë publikuar informacione nëse ekziston rreziku i një cunami.

Lindja e Rusisë ka qenë një vend me aktivitet sizmologjik jashtëzakonisht intensiv në periudhën e fundit.

Tërmeti më i fuqishëm goditi Gadishullin Kamchatka më 30 korrik, dhe paralajmërime për cunami u lëshuan në Rusi, Japoni dhe SHBA për shkak të këtij tërmeti.

Hungaria dhe Sllovakia kanë vendosur të mos e mbështesin planin e BE-së për paketën e 18-të të sanksioneve kundër Rusisë, njoftoi të hënën ministri i Jashtëm hungarez, Peter Szijjarto.

Duke folur në një konferencë për shtyp, Szijjarto theksoi se Hungaria dhe Sllovakia vendosën ta bllokojnë paketën e sanksioneve si përgjigje ndaj planeve të Bashkimit Evropian për ta ndërprerë dalëngadalë importin e energjisë nga Rusia.

“E bëmë këtë sepse Bashkimi Evropian … dëshiron t’ua ndalojë shteteve anëtare, përfshirë Hungarinë dhe Sllovakinë, blerjen e gazit natyror dhe naftës së lirë nga Rusia, siç kanë bërë më parë”, u shpreh Szijjarto.

Hungaria dhe Sllovakia vazhdojnë të mbështeten në furnizimet me gaz dhe naftë ruse dhe kanë ruajtur marrëdhënie të ngrohta me Moskën.

Komisioni Evropian, më 10 qershor, propozoi një rund të ri sanksionesh kundër Rusisë për shkak të pushtimit të Ukrainës më shumë se tri vjet më parë, duke shënjestruar të ardhurat e Moskës nga energjia, bankat dhe industrinë ushtarake.

Kryeministri sllovak, Robert Fico, reagoi duke thënë se Sllovakia nuk do ta mbështesë paketën e sanksioneve nëse Komisioni Evropian nuk ofron një zgjidhje për situatën me të cilën përballet Sllovakia nëse BE-ja ndalon importet e energjisë ruse.

Nevojitet pajtimi njëzëri i të gjitha shteteve anëtare për të kaluar propozimi për sanksione.

Të dielën në mbrëmje, kryeministri hungarez, Viktor Orban, i bëri thirrje BE-së ta heqë nga rendi i ditës propozimin për ndalimin e importimit të energjisë ruse, për shkak të rritjes së pritshme të çmimeve të energjisë pas bombardimit të Iranit nga SHBA-ja. /REL

Presidenti Vladimir Putin i Rusisë për muaj të tërë i ka portretizuar forcat e tij si gati për fitore në Ukrainë. Ai ka sugjeruar se ka pak arsye për të rënë dakord për një armëpushim, duke qenë se forcat ruse po përparojnë në fushën e betejës dhe janë të përgatitura të luftojnë për aq kohë sa zgjat. Dhe ka thënë se kur bëhet fjalë për trupat ukrainase, Moska ka arsye të besojë se “ne jemi gati t’i shkatërrojmë ato”. Kievi, gjatë fundjavës, ofroi kundërpërgjigjen e tij. Ukraina kreu një nga sulmet më të guximshme të luftës, duke futur dronë të fshehtë thellë në zemër të Rusisë dhe duke i lëshuar ata nga kamionë. Ajo shkatërroi ose dëmtoi të paktën një duzinë avionësh, përfshirë shumë nga bombarduesit strategjikë të Moskës me aftësi bërthamore, në pistat e Siberisë dhe Veriun e Largët të Rusisë. Por, nuk mbaroi me kaq. Shërbimet e Sigurisë së Ukrainës goditën shtyllat mbajtëse të Urës së Krimesë dje në mëngjes me një shpërthim nënujor të shkaktuar nga 1,100 kg TNT.

Sulmi ndaj “xhevahirit të Putinit”

Ura e Krimesë, e njohur edhe si Ura e Kerçit, konsiderohet si xhevahiri i projekteve të infrastrukturës të presidentit Vladimir Putin, i përshkruar në mediat ruse si “projekti i shekullit”. Ndërtimi i urës, e njohur edhe si Ura e Kerçit, përveçse është një lidhje transporti ekzistenciale e rëndësishme për popullsinë e gadishullit me Rusinë dhe një rrugë logjistike për forcat pushtuese ruse në Ukrainë, ka edhe një vlerë të jashtëzakonshme simbolike për Moskën. Projekti prej 4 miliardë dollarësh ishte një akt politik i hartuar për të vërtetuar aneksimin e paligjshëm të Krimesë nga Rusia në vitin 2014, pasi Krimea nuk është e lidhur me Rusinë nga toka dhe ura është lidhja e vetme e gadishullit me tokën kontinentale ruse.

Edhe pse nuk ka informacion zyrtar, disa media dhe profile ukrainase në rrjetet sociale spekulojnë se sulmi është kryer nga një dron nënujor i tipit “Mariçka”. I përshkruar si një “dron nënujor sulmi shumëfunksional”, Mariçka është projektuar për të shkatërruar një gamë të gjerë objektivash, nga anijet zbarkuese dhe transportuesit e raketave deri te transportuesit e urës dhe bunkerët bregdetarë, siç shkruan United24media.

Një mësim për Rusinë

“Bëhet fjalë për përpjekjen për t’i bindur rusët, nëse do të ketë sukses, se tani ka një arsye që ata të negociojnë seriozisht”, tha James M. Acton, bashkëdrejtor i programit të politikës bërthamore në Carnegie Endowment for International Peace. Luftërat janë të vështira për t’u përfunduar, tha Acton, pjesërisht sepse pala që mendon se po fiton shpesh sheh pak nxitje për të negociuar seriozisht ose për të ofruar ndonjë lëshim. Operacioni ukrainas e gërryen disi aftësinë e Rusisë për të sulmuar Ukrainën duke eliminuar disa nga avionët që forcat ruse kanë përdorur për të lëshuar raketa me rreze të gjatë veprimi drejt objektivave ukrainase. Kohët e fundit, Rusia ka intensifikuar sulme të tilla ndaj qyteteve ukrainase, me sulme rekord me dronë dhe raketa.

Ukraina ka kryer vrasje të profilit të lartë në qytetet ruse, ka shkaktuar kaos në objektet ruse të prodhimit të naftës , ka pushtuar një sipërfaqe të konsiderueshme të territorit rus përgjatë kufirit , ka shkatërruar marinën ruse në Detin e Zi, ka dëmtuar urën që lidh Rusinë me Krimenë e pushtuar dhe ka shpërthyer dronë mbi Moskën. Sa më shumë që Ukraina lufton në fushën e betejës, thonë analistët, aq më shumë ka gjasa që Kievi të drejtohet drejt sulmeve të tilla me ndikim dhe asimetrike. Operacioni ishte treguesi më i fundit se sa shumë e ka revolucionarizuar Ukraina luftën me drone. David Shimer, i cili shërbeu si drejtor për Ukrainën në Këshillin e Sigurisë Kombëtare gjatë administratës Biden dhe ndihmoi në mbikëqyrjen e përpjekjeve të SHBA-së, tha se operacioni tregoi se si ukrainasit ende kanë ndikim, edhe pse Presidenti Trump i tha Presidentit Volodymyr Zelensky të Ukrainës, në një takim famëkeq në Zyrën Ovale më herët këtë vit, se ai nuk “kishte letrat e duhura”. “Sigurisht që ata kanë letra”, tha Shimer. “Ata po përpiqen ta bëjnë presion Rusinë të ulet në tryezën e negociatave.”

S

Azerbajxhani dhe Rusia kanë pezulluar bisedimet për mbajtjen e një ndeshjeje miqësore mes ekipeve kombëtare të futbollit. Kjo u bë e ditur për “Sport24”, e cila citon disa burime të njohura me situatën.

Ambasada e Azerbajxhanit në një deklaratë në redaksinë e noamal pohon se ka tension pas rrëzimit të avionit,  mes Azerbajxhanit dhe Rusisë dhe se Azerbajxhani refuzon të luajë një ndeshje miqësore.

Ambasada vë në dukje dështimin e bisedimeve për të luajtur një ndeshje miqësore futbolli mes Azerbajxhanit dhe Rusisë pas tensionit në lidhje me rrëzimin e avionit azer pak ditë më parë.

Specifikohet se në një nga takimet e fundit të Unionit të Federatave Evropiane të Futbollit (UEFA), përfaqësuesit e Federatës Ruse të Futbollit (RFU) dhe Federatës së Azerbajxhanit (AFFA) komunikuan për zhvillimin e një ndeshjeje të mundshme miqësore në pranverë-verën e vitit 2025.

Gjithashtu u diskutuan edhe çështjet e bashkëpunimit ndërmjet dy federatave. Por sipas burimit, çështja nuk ka arritur në negociata zyrtare për ndeshjen.

Tani ndeshja e mundshme nuk po diskutohet për shkak të tensioneve në marrëdhëniet mes dy vendeve për shkak të avionit të fundit civil të Azerbajxhanit të qëlluar nga sistemet ruse të mbrojtjes ajrore, siç pretendon Baku.

Shënim: Disa imazhe gjenden nga interneti, që konsiderohen të jenë në domenin publik. Nëse dikush pretendon pronësinë, ne do të citojmë autorin, ose, sipas kërkesës, do të heqim menjëherë imazhin

Ish-drejtori i SHISH, Visho Ajazi Lika ka shpejuar në një emision televiziv qëllimin që ka në thelb politika ruse në raport me Ballkanin.

Sipas tij, zanafilla e kësaj marrëdhënie që ka krijuar Rusia me Ballkanin vjen jo vetëm për shkak të historisë, por edhe faktit që Rusia e ka “shfrytëzuar” Ballkanin sepse ka shërbyer gjithmonë si një urëlidhëse mes Lindjes dhe Perëndimit.

“Fillon historia qysh me perandorinë ruse. Rusia ka pasur gjithmonë një vëmdnej të veçantë për Ballkanin. Arsyeja e parë është se popullësia e këtij vendi është sllavo-folëse dhe gjithashtu e besimit ortodoks. Ballkani ka qenë një urë lidhëse mes perëndimit dhe lindjes, për këtë arsye janë përplasur gjithmonë interesat e fuqive të mëdha. Unë do të thosha që është trajtuar si oborri i mbrapëm i perandorisë ruse,” –u shpreh ish-drejtori i SHISH.

Sipas këndvështrimit të tij, nuk është qëllim vetëm sabotimi NATO-s dhe Perëndimit, por ndikon edhe fakti që Rusia kërkon të mbajë aleancat me vendet e që më parë ka pasur lidhje, në mënyrë që këto vende të mos kalojnë nën influencën e mirëfilltë perëndimore.

Shtetet e Bashkuara kanë informuar aleatët se besojnë se Irani ka dërguar raketa balistike me rreze të shkurtër veprimi në Rusi për luftën e saj kundër Ukrainës, sipas dy personave me dijeni për këtë çështje. Ata nuk thanë se sa armë janë dorëzuar apo kur mund të kenë ndodhur transferimet e tyre, por konfirmuan se zbulimi amerikan ka arritur në këtë përfundim. Ata folën në kushte anonimiteti për të diskutuar për një çështje që nuk është bërë publike.

Shtëpia e Bardhë nuk pranoi të konfirmojë dërgimin e armëve, por përsëriti shqetësimin se Irani po thellon mbështetjen ndaj Rusisë. Shtëpia e Bardhë e ka paralajmëruar Iranin prej muajsh që të mos transferojë raketa balistike në Rusi.

Takimi po zhvillohet në një nga periudhat më të vështira në mandatin e presidentit amerikan Joe Biden, i cili është nën presion në rritje për të hequr dorë nga gara presidenciale.81-vjeçari Biden do të japë një konferencë për shtyp sot të enjten, në margjinat e samitit të NATO-s, i cili është cilësuar gjerësisht si një tjetër “provë” për presidentin amerikan. Gazetarët pritet të vënë sërish në pikëpyetje aftësinë e tij për të qëndruar në garën për president përpara zgjedhjeve të 5 nëntorit. Udhëheqësit europianë, nga ana e tyre, kanë frikë se zgjedhjet presidenciale në nëntor do të çojnë në një ndryshim në qëndrimin e Uashingtonit dhe një reduktim të mbështetjes së Uashingtonit për Ukrainën dhe NATO-n. Kandidati 78-vjeçar republikan, Donald Trump ka shprehur kritika për ndihmën për Ukrainën dhe për mbështetjen e SHBA-së për aleatët.

Presidenti ukrainas Volodymyr Zelensky do të mbajë gjithashtu një konferencë të përbashkët për shtyp me Sekretarin e Përgjithshëm të NATO-s, Jens Stoltenberg të enjten, ndërsa të mërkurën u takua me ligjvënës republikanë dhe demokratë në Kapitolin e SHBA-së. Udhëheqësi ukrainas, i cili është i etur për të forcuar lidhjet e tij me ligjvënësit amerikanë nga të dyja partitë politike, u takua me krerët e Senatit dhe Dhomës së Përfaqësuesve, si dhe anëtarët e komisioneve që merren me mbrojtjen, shpenzimet, diplomacinë dhe sigurinë kombëtare.Ai u tha gazetarëve se e ftoi Mike Johnson, udhëheqësin republikan të Dhomës së Përfaqësuesve të SHBA-së, të vizitojë Kievin.

Paralajmërim për Putinin

Në një paralajmërim të qartë për presidentin rus Vladimir Putin, Shtetet e Bashkuara njoftuan të mërkurën se do të fillojnë vendosjen e raketave me rreze më të gjatë veprimi në Gjermani në vitin 2026, armët më të fuqishme amerikane që do të vendosen në kontinentin europian që nga Lufta e Ftohtë .Në një deklaratë të NATO-s thuhet gjithashtu se aleatët do të japin të paktën 40 miliardë euro ndihmë ushtarake vitin e ardhshëm. Anëtarët e NATO-s gjithashtu u zotuan të vazhdojnë të mbështesin Ukrainën “në rrugën e saj të pakthyeshme drejt integrimit të plotë euroatlantik, duke përfshirë anëtarësimin në NATO”.

Biden argumentoi se NATO është sot “më e fortë se kurrë” dhe se Ukraina mund dhe do ta ndalojë Putinin “me mbështetjen tonë të plotë kolektive”.Presidenti amerikan shtroi një darkë për aleatët dhe partnerët e NATO-s në Shtëpinë e Bardhë të mërkurën, duke theksuar rolin e tyre në sigurimin e “lirisë, sigurisë dhe demokracisë” për të gjithë qytetarët e shteteve anëtare. Ai u takua gjithashtu me kryeministrin e ri britanik Keir Starmer, kryeministrin kanadez Justin Trudeau dhe presidentin finlandez Alexander Stubb.

Dy këshilltarë kryesorë të Donald Trump i kanë paraqitur atij një plan për t’i dhënë fund luftës së Rusisë në Ukrainë, nëse ai fiton zgjedhjet presidenciale të 5 nëntorit, që përfshin t’i thotë Ukrainës se do të marrë më shumë armë amerikane vetëm nëse ajo hyn në bisedimet e paqes.Shtetet e Bashkuara do të paralajmëronin në të njëjtën kohë Moskën se çdo refuzim për të negociuar do të rezultonte në rritjen e mbështetjes së SHBA për Ukrainën, tha në një intervistë gjenerallejtënant në pension Keith Kellogg, një nga këshilltarët e Trumpit për sigurinë kombëtare. Sipas planit të hartuar nga Kellogg dhe Fred Fleitz, të cilët të dy shërbyen si shefa shtabi në Këshillin e Sigurisë Kombëtare të Trump gjatë presidencës së tij 2017-2021, do të kishte një armëpushim bazuar në linjat e betejës mbizotëruese gjatë bisedimeve të paqes, tha Fleitz. Ata ia kanë paraqitur strategjinë e tyre Trumpit dhe kandidati republikan presidencial është përgjigjur pozitivisht, shtoi Fleitz. “Unë nuk po pretendoj se ai ishte dakord me të ose ishte dakord me çdo fjalë të tij, por ne ishim të kënaqur që morëm reagimet që bëmë,” tha ai.

Plani i Trump

Zëdhënësi i Trump, Steven Cheung tha se vetëm deklaratat e bëra nga Trump ose anëtarët e autorizuar të fushatës së tij duhet të konsiderohen zyrtare. Strategjia e përshkruar nga Kellogg dhe Fleitz është plani më i detajuar ende nga bashkëpunëtorët e Trump, i cili ka thënë se ai mund ta zgjidhë shpejt luftën në Ukrainë nëse mposht Presidentin Joe Biden në zgjedhjet e 5 nëntorit. Propozimi do të shënonte një ndryshim të madh në pozicionin e SHBA-së për luftën dhe do të përballej me kundërshtimin nga aleatët evropianë dhe brenda vetë Partisë Republikane të Trump. Kellogg tha se do të ishte thelbësore që Rusia dhe Ukraina të futeshin shpejt në tryezën e bisedimeve nëse Trump fiton zgjedhjet. Sipas dokumentit të tyre kërkimor, Moska gjithashtu do të nxitej në tryezë me premtimin e anëtarësimit në NATO për Ukrainën që do të shtyhej për një periudhë të gjatë. Rusia pushtoi Ukrainën fqinje në shkurt 2022. Deri në disa arritje nga Rusia në muajt e fundit, linjat e frontit mezi lëviznin që nga fundi i atij viti, pavarësisht dhjetëra mijëra të vdekurve nga të dyja palët në luftën e pamëshirshme të llogoreve, luftimet më të përgjakshme në Evropë që nga Lufta e Dytë Botërore. Fleitz tha se Ukraina nuk duhet t’i dorëzojë zyrtarisht territorin Rusisë sipas planit të tyre.

Reagimi i Rusisë

Kremlini tha se çdo plan paqeje i propozuar nga një administratë e mundshme e ardhshme e Trumpit do të duhej të pasqyronte realitetin në terren , por se presidenti rus Vladimir Putin mbeti i hapur për bisedime. “Vlera e çdo plani qëndron në nuancat dhe në marrjen parasysh të gjendjes reale të punëve në terren,” tha zëdhënësi i Kremlinit Dmitry Peskov për Reuters. “Presidenti Putin ka thënë vazhdimisht se Rusia ka qenë dhe mbetet e hapur për negociata, duke marrë parasysh gjendjen reale të punëve në terren”, tha ai. Këshilltari presidencial ukrainas Mykhailo Podolyak tha të martën se ngrirja e armiqësive në vijat e frontit mbizotërues do të ishte “e çuditshme”, duke qenë se Rusia kishte shkelur ligjin ndërkombëtar duke pushtuar Ukrainën. “Paqja mund të jetë vetëm e drejtë dhe paqja mund të bazohet vetëm në ligjin ndërkombëtar”, tha ai për Reuters.

Epërsia e Rusisë

Disa analistë shprehën gjithashtu shqetësimin se plani i Kellogg dhe Fleitz mund t’i jepte Moskës dorën e sipërme në bisedime. “Ajo që Kellogg po përshkruan është një proces i prirur ndaj Ukraina të heqë dorë nga i gjithë territori që Rusia tani pushton,” tha Daniel Fried, një ish-ndihmës sekretar i shtetit që ka punuar në politikën e Rusisë.Gjatë një interviste në podcast javën e kaluar, Trump përjashtoi angazhimin e trupave amerikane në Ukrainë dhe u shfaq skeptik për ta bërë Ukrainën një anëtare të NATO-s. Ai ka treguar se do të lëvizte shpejt për të shkurtuar ndihmën për Kievin nëse zgjidhet. Biden ka kërkuar vazhdimisht më shumë ndihmë për Ukrainën dhe administrata e tij mbështet anëtarësimin e saj përfundimtar në NATO.

Kryeministri i Indisë, Narendra Modi, do ta vizitojë Rusinë, njoftoi të martën Kremlini.

Këshilltari i presidentit rus Vladimir Putin për punë të jashtme, Yuri Ushakov, tha se janë duke u bërë përgatitje për vizitën e Modit, por nuk tregoi datë, duke shtuar se për këtë do të vendosej bashkërisht më vonë.

Rusia ka mbajtur lidhje të forta me Indinë prej Luftës së Ftohtë, dhe rëndësia e Nju Delhit si partnere kyçe tregtare për Moskën është rritur edhe më shumë prej se Kremlini e dërgoi ushtrinë në Ukrainë në shkurt 2022 për ta nisur pushtimin e saj.

Kina dhe India janë bërë blerësit kryesorë të naftës ruse pasi Shtetet e Bashkuara dhe aleatët e tyre vendosën sanksione ndaj eksportit të naftës ruse në shumicën e tregjeve perëndimore.

Nën sundimin e Modit, India nuk e ka dënuar luftën e Rusisë në Ukrainë, derisa e ka theksuar nevojën për gjetjen e një zgjidhjeje paqësore.

Modi së fundmi u rizgjodh kryeministër për mandatin e tretë radhazi.

Ai e vizitoi Rusinë për herë të fundit më 2019, për një forum ekonomik në portin Vladivostok. Vizita e tij e fundit në Moskë ishte më 2015.

Bjellorusia i ka filluar të martën stërvitjet ushtarake me raketat dhe avionët luftarakë që janë në gjendje të bartin armë taktike bërthamore, të cilat aleatja e saj e ngushtë, Rusia, i zhvendosi atje kohë më parë.

Ushtrimet ushtarake të Bjellorusisë filluan vetëm një ditë pasi Rusia njoftoi se synon të kryejë stërvitje të ngjashme për simulimin e përdorimit të armëve bërthamore të fushëbetejës, si përgjigje ndaj deklaratave të zyrtarëve perëndimorë, për të cilat thotë se janë shenjë se Perëndimi mund të përfshihet më shumë në luftën në Ukrainë.

Kjo ishte hera e parë që Moska ka njoftuar publikisht për një ushtrim të tillë.

Ministri i Mbrojtjes i Bjellorusisë, Viktor Khrenin, tha se një njësit i raketave me rreze të mesme veprimi, Iskander, dhe një skuadrilje e avionëve luftarakë, Su-25, do të marrin pjesë në stërvitje.

Këto stërvitje nisën gjithashtu në ditën kur presidenti i Rusisë, Vladimir Putin, e bëri betimin për mandatin e tij të pestë të martën, duke u zotuar për garantimin e sigurisë së Rusisë.

Vitin e kaluar, Rusia i zhvendosi disa armë të veta taktike bërthamore në Bjellorusi, e cila kufizohet gjithashtu edhe me Ukrainën dhe anëtaret e NATO-s, Poloninë, Letoninë dhe Lituaninë.

Presidenti autoritar i Bjellorusisë, Alyaksandr Lukashenka, mbështetet në lidhjet e ngushta me Rusisë dhe e ka ofrur vendin e vet si terren strategjik për luftën në Ukrainë.

Moska ka nënvizuar se armët taktike bërthamore të zhvendosura në Bjellorusi mbesin nën kontrollin ushtarak të Rusisë.

Zhvendosja e armëve taktike bërthamore në Bjellorusi, e cila ndan një vijë kufitare prej 1.084 kilometrash me Ukrainën, do t’ia mundësonte raketave dhe avionëve luftarakë rusë ta arrijnë cakun e tyre të mundshëm atje me më shumë lehtësi dhe shpejtësi, nëse Moska vendos t’i përdorë ato.

Gjithashtu ia mundëson Rusisë t’i godasë më lehtë disa aleatë të NATO-s në Evropën Lindore dhe atë Qendrore.

Për dallim nga raketat interkontinentale balistike bërthamore, të cilat mund të shkatërrojnë qytete të tëra, armët taktike bërthamore, të dizajnuara për t’u përdorur kundër trupave në fushëbeteja, janë më pak të fuqishme./rel