Policia Kufitare ka finalizuar operacionin policor të koduar “Borders 3”, duke arrestuar një 19-vjeçar që ndihmonte emigrantë të paligjshëm nga vendet e treta të kalonin kufirin me Malin e Zi, kundrejt një pagese prej 400 eurosh për person.

I riu, me inicialet V. T., banues në Durrës, u kap në flagrancë nga shërbimet e Stacionit të Policisë Kufitare Bajzë, në fshatin Vukpalaj, teksa po transportonte me automjet katër emigrantë që synonin të kalonin kufirin në mënyrë të paligjshme.

Gjatë operacionit u sekuestruan automjeti me të cilin kryhej transporti, si dhe një aparat celular që dyshohet se përdorej për koordinimin e veprimtarisë.

Sipas hetimeve paraprake, i riu dyshohet se ka qenë i përfshirë në ndihmën ndaj emigrantëve për kalimin fillimisht të kufirit me Greqinë, dhe më pas të atij me Malin e Zi.

Një ngjarje e rëndë ka ndodhur sot në mëngjes në Shkodër, ku një person ka humbur jetën.

Sipas informacioneve zyrtare nga Policia e Shkodrës, në lagjen “Guerile” është gjetur pa shenja jete nga familjarët shtetasi P. L., 47 vjeç.

Dyshohet se ai ka ndërruar jetë aksidentalisht, pasi gjatë punimeve në oborr pasi ka rënë në kontakt me energjinë elektrike.

Ky incident tragjik tregon riskun e punëve të munguara dhe kujdesin e nevojshëm që duhet treguar në situata të tilla.

Në kuadër të hetimeve për vrasjen e dyfishtë të ndodhur më herët gjatë ditës në Shkodër, ku mbetën të vrarë Armando Pali dhe Liridon Kraja, si dhe u plagosën Erogen Vaso dhe Meri Kaceri, Policia ka kryer një kontroll blic në banesën e motrës së Mustafa Licit, emër i njohur për autoritetet.

Sipas burimeve nga terreni, gjatë kontrollit janë sekuestruar katër armë zjarri, të cilat janë dërguar për ekspertizë balistike për të verifikuar nëse ndonjë prej tyre është përdorur në atentatin e sotëm.

Ndërkohë, autori i dyshuar i ngjarjes, Ragip Gila, i cili ndodhet në pranga, dyshohet se ka vepruar për llogari të Lulzim Kullës, dhëndër në familjen Lici. Pistat hetimore janë përqendruar në lidhjet e ngushta mes autorëve të dyshuar dhe grupeve kriminale që operojnë në veri të vendit.

Hetimet zbulojnë lidhje të mundshme mes atentatit dhe grupeve kriminale

Policia dyshon se shtetasi Erogen Vaso ishte shënjestra e atentatit mafioz të ndodhur mëngjesin e kësaj të hënë në një lokal në mes të Shkodrës.

Viktimë e masakrës që tronditi Shkodrën mbeti Armando Pali, ish- këshilltar bashkiak, si dhe i riu Liridon Kraja, shoqërues i Erogen Vasos.

Edhe pse shënjestra ishte ky i fundit, ai është i plagosur dhe ndodhet i shtruar në spital. E po ashtu, plumbat kanë kapur edhe kamerieren e lokalit.

Vaso, i cili ka edhe mbiemrin Brajoviç, është vëllai i Denis Brajoviç, të ekstraduar pak kohë më parë nga Emiratet.

Brajoviç ka vrarë Gjon Boriçi në gusht të vitit 2020.

Një aksident i rëndë ka ndodhur në aksin Lezhë-Shkodër.

Nga pamjet  dallohen dy automjete të cilat janë përplasur teksa njëri ka dalë nga rruga duke përfunduar në arë.

Nuk dihet ende nëse ka dëmtime në njerëz apo vetëm dëme materiale. Shërbimet e policisë janë në vendin e ngjarjes e po kryejnë veprimet procedurale hetimore.

SHKODËR- Dy automjete në pronësi të një 35-vjeçari nga fshati Prekal në Shkodër janë djegur gjatë orëve të para të mëngjesit të së dielës. Blutë bëjnë me dije se dy automjete tip “Benz” dhe “Range Rover”, ishin në përdorim të shtetasit Eduard Ndou të cilat kanë qenë të parkuara në rrugë, në afërsi të banesës së tij. Ndërkohë grupi hetimor po punon për sqarimin e plotë të rrethanave dhe të shkakut të rënies së zjarrit.

Njoftimi i Policisë:

Rreth orëve të para të mëngjesit, në fshatin Prekal, kanë marrë flakë dhe janë djegur dy automjete tip “Benz” dhe “Range Rover”, në përdorim nga shtetasi E. N., 35 vjeç, të cilat kanë qenë të parkuara në rrugë, në afërsi të banesës së tij. Grupi hetimor po punon për sqarimin e plotë të rrethanave dhe të shkakut të rënies së zjarrit.

Një aksident i rëndë ka ndodhur paraditen e sotme në aksin rrugor “Shkodër-Velipojë”, ku raportohet se tre persona kanë mbetur të plagosur.

Policia bën me dije se shtetasi J. H., 20 vjeç, duke drejtuar automjetin, ka humbur kontrollin dhe si pasojë automjeti ka dalë nga rruga.

Nga aksidenti janë dëmtuar 3 pasagjerët në automjet, të cilët janë në kujdesin e mjekëve.

Ndërkohë, shoferi 20-vjeçar është arrestuar dhe policia ka nisur punën për zbardhjen e plotë të rrethanave të ngjarjes.

Policia e Shkodrës ka finalizuar operacionin e koduar “Itinerari”, duke goditur një tjetër rast të dhënies ndihmë për kalim të paligjshëm të kufirit.

Në kuadër të operacionit, u arrestua në flagrancë S. M., 28 vjeç, banues në Shkodër, i cili u kap duke transportuar 5 emigrantë nga vende të treta, me qëllim kalimin e tyre ilegal drejt Malit të Zi.

Hetimet kanë zbuluar se 28-vjeçari u merrte emigrantëve 600 euro për person, duke i sjellë fillimisht nga kufiri i gjelbër me Greqinë e më pas duke i transportuar drejt kufirit verior.

Altin Luli, një nga emrat më të njohur dhe të respektuar në fushën e startup-eve dhe tregtisë elektronike në Shqipëri, ka humbur jetën tragjikisht në një aksident rrugor të ndodhur të hënën në aksin Shkodër-Lezhë. Viktima, 47 vjeç, po udhëtonte me bashkëshorten dhe dy fëmijët e mitur kur automjeti i tyre u përplas me një kamion.

Luli, djali i pedagogut të njohur Fran Luli nga Shkodra, ishte një nga themeluesit e parë të ekosistemit të startup-eve në vend. Ai u bë i njohur në vitet e para të zhvillimit të tregtisë online në Shqipëri, përmes krijimit të platformës “Dyqan Taxi”, një ndër iniciativat më inovative të kohës.

Gjatë karrierës së tij mbi 25-vjeçare, Altin Luli ndërtoi dhe udhëhoqi projekte të rëndësishme në sektorin e teknologjisë dhe e-commerce, si Beba.al – platformë për nënat dhe fëmijët – dhe Bukinist.al, një librari online që sot konsiderohet si një nga më të mëdhatë në vend për botime të çdo lloji.

Ai ishte gjithashtu themelues dhe drejtues i kompanive NetTrade Albania dhe CodeVider, të cilat operonin në fushën e zhvillimit të tregtisë elektronike dhe zgjidhjeve teknologjike.

Në rrjetet sociale, kolegë, bashkëpunëtorë dhe figura të ekosistemit digjital shqiptar kanë shprehur dhimbjen dhe respektin për kontributin e Altin Lulit. Themeluesi i “Patoko”, Arbër Kadia, u shpreh:

“Një forcë pioniere pas një prej startup-eve të para në Shqipëri, Altini ishte më shumë sesa një mendje teknologjike – ai ishte një vizionar që e kuptonte vlerën e njerëzve shumë kohë para produktit.”

Altin Luli la pas një trashëgimi të çmuar në fushën e teknologjisë dhe inovacionit në Shqipëri, si dhe një ndikim të pashlyeshëm për brezat e rinj të sipërmarrësve digjitalë.