Tashmë që janë numëruar mbi 95% e kutive të votimit, por mbeten dhe rreth 45 mijë vota nga diaspora, ndryshon dhe renditja e kandidatëve më të votuar, nga lista e preferuar.

Lista kryesohet nga ministri Blendi Gonxhja në Tiranë, i cili tashmë numëron mbi 21 800 vota.

Në vend të dytë renditet ish-zv.kryeministri Erion Braçe me 20261.

Podiumin e tre të parëve e plotëson Jorida Tabaku me 18850 të preferencave të demokratëve të Tiranës, e ndjekur nga ministri Ervin Hoxha me 18764.

Kandidati i 5 më i votuar është Arkend Balla nga lista e socialistëve në Durrës, i cili le pas me një grusht votash Sara Milan në Elbasan me 18626.

Ceno Klosi është më i votuari i radhës nga socialistët me 16638 vota, i ndjekur nga Ilir Alimehmeti i cili ndonëse ka 16426 fletë votimi që e mbështetin, nuk mundet të futet në parlament, pasi PD siguroi vetëm 1 vend nga lista e hapur në Tiranë, që tashmë pothuajse është blinduar nga Jorida Tabaku.

Apeli i GJKKO lë në burg vëllain e deputetit Eduard Ndreca, i akuzuar për kultivim kanabisi dhe përfshirje në grup kriminal

Gjykata e Posaçme e Apelit për Korrupsionin dhe Krimin e Organizuar (GJKKO) ka refuzuar kërkesën për lirimin nga burgu të Gentian Ndrecës, vëllai i deputetit socialist Eduard Ndreca. Ai u arrestua në kuadër të një hetimi të SPAK për një grup të dyshuar kriminal që merrej me kultivimin dhe trafikimin e lëndëve narkotike.

Në seancën gjyqësore, avokatët e tij kërkuan ndryshimin e masës së sigurisë nga “arrest në burg” në “arrest shtëpie”, por trupa gjyqësore e Apelit e konsideroi të bazuar vendimin e Gjykatës së Shkallës së Parë për mbajtjen e tij në qeli.

Sipas dosjes hetimore, Gentian Ndreca dyshohet se ishte pjesë e një grupi që kishte organizuar kultivimin e kanabisit në disa zona të qarkut të Lezhës. Hetimet kanë zbuluar prova që përfshijnë edhe përgjime telefonike, ku Ndreca rezulton të ketë pasur rol të rëndësishëm në organizimin e aktivitetit kriminal.

Ndërkohë, deputeti Eduard Ndreca nuk ka komentuar mbi çështjen penale të vëllait të tij. Megjithatë, burime nga Partia Socialiste bëjnë me dije se ai po përpiqet të distancohet nga veprimet e Gentian Ndrecës, duke i cilësuar si “veprime personale që nuk lidhen me politikën”.

Dosja e SPAK për këtë grup kriminal është ende në fazë hetimi, dhe pritet që të ketë zhvillime të tjera në lidhje me këtë rast.