PENSILVANI- Një oficer policie u vra dhe pesë persona të tjerë u plagosën, pasi një 49-vjeçar mori peng stafin mjekësor dhe hapi zjarr në një spital në York, Pensilvani në SHBA. Personi i armatosur, i identifikuar nga autoritetet si Diogenes Archangel Ortiz, 49 vjeç, u vra gjatë shkëmbimit të zjarrit me oficerët e policisë. Gjithashtu bëhet e ditur se autori i ngjarjes shkoi ditën e djeshme në ambientet e spitalit dhe nën kërcënimin e armës mori peng stafin mjekësor të spitalit.

Gjatë shkëmbimit të zjarrit me policinë, 49-vjeçari qëlloi për vdekje një oficer policie, ndërsa plagosi pesë persona, 3 prej tyre nga staf mjekësor dhe 2 policë. CNN shkruan se grupi hetimor nuk ka dhënë ende informacione lidhur me motivin e sulmit. Sakaq spitali siguroi se asnjë pacient nuk është lënduar nga ngjarja.

“Asnjë pacient nuk është lënduar. Spitali tani është i sigurt”, tha për CNN Susan Manko, zëdhënëse e UPMC Memorial në York.

Oficeri që humbi jetën ishte Andrew Duarte, konfirmoi departamenti i tij në Facebook. Duarte i ishte bashkuar departamentit në vitin 2022 pas pesë vitesh në Departamentin e Policisë së Denverit, sipas profilit të tij në LinkedIn. Guvernatori Josh Shapiro vizitoi spitalin pas incidentit tragjik dhe vlerësoi oficerin që humbin jetën Duarte dhe kolegët e tij për misionin e tyre.

Një plagosje me armë zjarri ka ndodhur në ‘Lagjen 17’, në Durrës, pranë Drejtorisë së Ujësjellës Kanalizimeve, pasditen e sotme.

Mësohet se një 31 vjeçar ka qëlluar një 70- vjeçar person të moshuar, i cili më pas është dërguar në spital.

Policia ka arrestuar 31- vjeçarin pasi tentoi që të largohej nga vendi i ngjarjes, ndërsa po punon për zbardhjen e plotë të kësaj ngjarje.

Njoftimi i policisë:

Durrës/Informacion paraprak

Plagosi me armë një 70-vjeçar,  dyshohet pas një konflikti të çastit në një lokal në lagjen nr. 17, falë  reagimit në kohë të Policisë, kapet në tentativë për t’u larguar dhe shoqërohet në Polici autori i dyshuar.

Policia gjeti në brendësi të lokalit  ku ndodhi ngjarja dhe sekuestroi në cilësinë e provës materiale armën e zjarrit pistoletë.

Rreth orës 19.30, në një lokal në lagjen nr. 17, dyshohet se si pasojë e një konflikti të çastit , shtetasi A. H., 31 vjeç, banues në lagjen nr. 17 Durrës, ka plagosur me armë zjarri pistoletë shtetasin F. H, rreth 70 vjeç, banues në Durrës, i cili ndodhet në spital nën kujdesin e mjekëve.

Falë reagimit të menjëhershëm të shërbimeve Operacionale dhe Shqiponja kapet në tentativë për t’u larguar dhe shoqërohet në Polici,për veprime të mëtejshme autori i dyshuar i plagosjes.

Ndërkohë shërbimet e Policisë kanë shoqëruar dhe një shtetas tjetër, konkretisht shtetasin  A.T, 56 vjeç, që ishte bashkë me autorin e dyshuar të ngjarjes në  momentin kur ka ndodhur ngjarja

Grupi hetimor nën drejtimin e Prokurorisë vijon veprimet në vendngjarje për sqarimin dhe dokumentimin e plotë ligjor të kësaj ngjarjeje.

Deputeti i Partisë Demokratike në Serbi, Srdan Milivojeviç ka shpërthyer sot me tone të ashpra ndaj Presidentit Aleksandër Vuçiç se duhet të japë dorëheqjen pasi, siç tha ai “ka sakrifikuar rininë serbe në Kosovë në luftën njëditore mes tij dhe Albin Kurtit”.

Duke komentuar raportimet se në sulmin terrorist të së dielës ndaj Policisë së Kosovës, organizator ka qenë krimineli dhe terroristi, njëherit nënkryetari i Listës Serbe partisë më të madhe të serbëve të Kosovës Milan Radoijçiç, ka theksuar se pjesëmarrja e tij në sulmin terrorist nuk do të ishte befasi.

“Nëse Radojiçiç ka marrë pjesë në atë akt të çmendur, atëherë është plotësisht e qartë se pas gjithçkaje qëndron regjimi në Beograd i drejtuar nga Aleksandër Vuçiç. Po ta kishte organizuar Radoijçiç apo dikush tjetër pa pëlqimin dhe urdhrat e Beogradit, ai tashmë do të ishte arrestuar ose do të ishte fundi për Vuçiç-in”, ka pohuar, transmeton media opozitare sebe “Nova”.

Milivojeviç tha se tashmë është e konfirmuar se Vuçiç është gjeneratori i konfliktit dhe shkaktari i problemeve, raporton media serbe nova.rs

“Vuçiç është gjeneratori i konfliktit dhe shkaktari i problemeve. Pas luftës njëditore mes Vuçiç-it dhe Kurtit, Serbia humbi. A beson dikush më se Vuçiç është faktor paqeje në Serbi dhe në rajon? Është vërtetuar se Vuçiç është gjeneratori i konfliktit dhe shkaktari i problemit dhe nëse ka ndonjë moral do të duhej të jepte dorëheqjen sepse sakrifikoi serbët në Kosovë”, tha ai.

Ai theksoi se institucionet shtetërore do të duhet të njoftojnë se sa persona kanë vdekur në Banjskë dhe sa janë plagosur dhe arrestuar.

“Në konferencën për shtyp të dielën në mbrëmje, Vuçiç ka bërë të ditur të gjitha informacionet e pasakta. Qeveria është e detyruar t’i informojë familjet se si dhe pse vdiqën të dashurit e tyre”, tha Milivojeviç.

Ai tha se “Vuçiçit nuk i intereson nëse serbët në Kosovë do të dëbohen, vriten apo do të përfundojnë nën represionin e autoriteteve të Prishtinës”.

Të hënën mediumi boshnjak “Istraga.ba”, raportoi se nënkryetari i Listës Serbe, krimineli dhe terroristi, Milan Radojiçiç është plagosur të dielën në Veri, konkretisht në fshatin Banjskë të Zveçanit ku rreth 30 terroristë gjuajtën në drejtim të Policisë së Kosovës.

Në një audio-incizim që e ka publikuar ky medium, thuhet se kanë provuar disa herë ta kontaktojnë Radojiçiç-in, po kontakti me të ka qenë i pamundur.

“Fillimisht një person i panjohur i cili i është përgjigjur numrit të tij të telefonit ka thënë se nuk është Radojiçiç, ndërsa më pas i njëjti person ka pohuar se Radojiçiç është mirë”, raporton mediumi boshnjak.

Sipas këtij mediumi, Radojiçiç, i cili është në listën e zezë të Shteteve të Bashkuara të Amerikës dhe është i dyshuar edhe për vrasjen e politikanit serb nga Kosova Oliver Ivanoviç, ndodhet në Serbi i cili po trajtohet.